سرفراز ڈوگر نے بطور چیف جسٹس اسلام آباد ہائیکورٹ حلف اٹھا لیا

آج ہی سندھ اور پشاور ہائی کورٹس کے چیف جسٹسز نے بھی اپنے عہدوں کا حلف اٹھایا

ساجد علی منگل 8 جولائی 2025 15:31

سرفراز ڈوگر نے بطور چیف جسٹس اسلام آباد ہائیکورٹ حلف اٹھا لیا

اسلام آباد ( اُردو پوائنٹ اخبارتازہ ترین۔ 08 جولائی 2025ء ) جسٹس سرفراز ڈوگر نے چیف جسٹس اسلام آباد ہائیکورٹ کے عہدے کا حلف اٹھا لیا۔ تفصیلات کے مطابق چیف جسٹس اسلام آباد ہائیکورٹ کی حلف برداری کی تقریب ایوان صدر میں منعقد ہوئی جہاں صدر مملکت آصف علی زرداری نے جسٹس سردار سرفراز ڈوگر سے ان کے عہدے کا حلف لیا، تقریب میں سینئر وکلا کی بڑی تعداد شریک ہوئی، وفاقی وزیر قانون اعظم نذیر تارڑ، وزیر داخلہ محسن نقوی، چیئرمین سینیٹ یوسف رضا گیلانی، وزیراعلیٰ پنجاب مریم نواز نے بھی حلف برداری کی تقریب میں شرکت کی۔

بتایا گیا ہے کہ چیف جسٹس سندھ ہائیکورٹ جسٹس محمد جنید غفار نے بھی اپنے عہدے کا حلف اٹھا لیا، گورنر سندھ کامران ٹیسوری نے چیف جسٹس سندھ ہائیکورٹ سے حلف لیا، تقریب میں ججز اور سینئر وکلاء نے شرکت کی، وزیراعلیٰ سندھ مراد علی شاہ بھی حلف برداری تقریب میں شریک ہوئے، تقریب حلف برداری پہلی بار اس جگہ ہوئی جہاں بانی پاکستان محمد علی جناح نے بطور گورنر جنرل حلف لیا تھا، بعدازاں چیف جسٹس سندھ ہائیکورٹ جسٹس جنید غفار نے مزار قائد پر حاضری دی اور فاتحہ خوانی کی، مزار قائد آمد پر پاکستان نیوی کے دستے نے چیف جسٹس سندھ ہائی کورٹ جسٹس جنید غفار کو سلامی پیش کی، سینئر پیونی جج جسٹس ظفر احمد راجپوت اور دیگرججز بھی موجود تھے۔

(جاری ہے)

معلوم ہوا ہے کہ پشاور ہائی کورٹ کے چیف جسٹس کی حلف برداری کی تقریب بھی منعقد ہوئی، جس میں جسٹس ایس ایم عتیق شاہ نے پشاور ہائی کورٹ کے چیف جسٹس کے عہدے کا حلف اٹھایا، گورنر خیبرپختونخوا فیصل کریم کنڈی نے چیف جسٹس ایس ایم عتیق شاہ سے حلف لیا، وزیراعلیٰ خیبرپختونخوا علی امین گنڈاپور بھی تقریب حلف برداری میں شریک ہوئے۔ یاد رہے کہ یکم جولائی کو چیف جسٹس آف پاکستان جسٹس یحییٰ آفریدی کی زیر صدارت جوڈیشل کمیشن کے اجلاس میں جسٹس سرفراز ڈوگر کو چیف جسٹس اسلام آباد ہائیکورٹ، جسٹس جنید غفار کو چیف جسٹس سندھ ہائیکورٹ، جسٹس عتیق شاہ کو چیف جسٹس پشاور ہائیکورٹ، جسٹس روزی خان کو چیف جسٹس بلوچستان ہائیکورٹ تعینات کرنے کی منظوری دی گئی تھی۔