ریاست مخالف سرگرمیوں کا الزام؛ سائبر کرائم اینڈ انویسٹی گیشن ایجنسی نے علیمہ خان کو طلب کرلیا

اسلام آباد ( اُردو پوائنٹ اخبارتازہ ترین۔ 17 جولائی 2025ء ) نیشنل سائبر کرائم اینڈ انویسٹی گیشن ایجنسی ( این سی سی آئی اے ) نے سوشل میڈیا پر ریاست مخالف سرگرمیوں کے الزام میں سابق وزیراعظم عمران خان کی بہن علیمہ خان کو 17 جولائی کو طلب کرلیا۔ تفصیلات کے مطابق نیشنل سائبر کرائم انویسٹی گیشن ایجنسی نے پاکستان تحریک انصاف کے پیٹرن انچیف عمران خان کی ہمشیرہ علیمہ خان کو 17 جولائی کو صبح ساڑھے 11 بجے لاہور میں ایجنسی کے دفتر میں ذاتی طور پر پیش ہونے کی ہدایت کی ہے۔

علیمہ خان پر الزام ہے کہ وہ سوشل میڈیا کے ذریعے ریاست مخالف سرگرمیوں میں ملوث رہی ہیں، جس پر علیمہ خان کو رواں سال 27 مئی کو شروع کی جانے والی ایک انکوائری کے تحت طلب کیا گیا ہے، طلبی کا مقصد علیمہ خان کا ان کے دفاع میں بیان ریکارڈ کرنا ہے۔

(جاری ہے)

وزارت داخلہ کے ماتحت نیشنل سائبر کرائم انویسٹی گیشن ایجنسی نے اپنے نوٹس میں خبردار کیا ہے کہ اگر ملزمہ پیش نہ ہوئیں تو یہ تصور کیا جائے گا کہ ان کے پاس اپنے دفاع میں کچھ پیش کرنے کو نہیں ہے، اس لیے عدم حاضری کی صورت میں علیمہ خان کے خلاف دفعہ 174 کے تحت قانونی کارروائی کی جا سکتی ہے۔

ادھر انسداد دہشت گردی راولپنڈی کی خصوصی عدالت نے تحریک انصاف کے 26 نومبر کے پر تشدد احتجاج کے مقدمات میں نامزد سابق وزیراعظم عمران خان کی ہمشیرہ علیمہ خان کی درخواست ضمانت پر پولیس سے تمام مقدمات کا ریکارڈ طلب کر لیا ہے ، علیمہ خان، تحریک انصاف پنجاب کی چیف آرگنائزر عالیہ حمزہ، سابق صوبائی وزیر بشارت راجہ اور میجر (ر) طاہر صادق کی بیٹی ایمان وسیم کے خلاف مقدمات کی سماعت کے موقع پر 4 مقدمات میں نامزد عالیہ حمزہ عدالت میں پیش نہ ہوئیں، ان کے وکلا نے ایک دن کے حاضری سے استثنیٰ کی درخواست دائر کردی۔

بتایا جارہا ہے کہ علیمہ خان کے وکیل نے ان کے خلاف تمام مقدمات کی تفصیلات طلب کرنے کی استدعا کی جس پر عدالت نے آر پی او راولپنڈی کو ہدایت کی ہے کہ علیمہ خان کے خلاف تمام مقدمات کی تفصیلات 30 جولائی کو عدالت میں پیش کی جائیں، جب کہ راجہ بشارت بھی طبیعت ناساز ہونے کے باعث عدالت میں پیش نہ ہوئے ، اس موقع پر وکلا کی استدعا پر عدالت نے سماعت 21 جولائی تک ملتوی کردی ۔

دریں اثنا عدالت کے باہر میڈیا سے گفتگو میں علیمہ خانم نے کہا کہ ہم پر امید ہیں جلد ہماری جان چھوٹے گی‘ ہمارا فوکس بے گناہ قیدیوں کی رہائی ہے، پاکستانی قوم محنتی قوم ہے لیکن پاکستان امیر نہیں ہو رہا ہے، اگر عوام کے ساتھ ظلم ہو رہا ہے تو وہ خود اٹھیں، مذاکرات پر عمران خان نے کہا کہ قوم کے مسائل پر بات کرنے کے لئے تیار ہوں ، ذات کے لئے ڈیل نہیں کروں گا ، اسی لیے بشریٰ بی بی پر سختی بانی پی ٹی آئی کو توڑنے کے لئے کی جا رہی ہے ، عمران خان کی زندگی خطرے میں ہے، بانی پی ٹی آئی کے لئے سپریم کورٹ میں جائیں گے ، ان کے بارے میں دنیا گواہ ہے کہ وہ جھوٹ نہیں بولتے، سپرنٹنڈنٹ جیل کو چن کر لگایا گیا ہے اور سپرنٹنڈنٹ جیل جھوٹا ہے اس وقت جیل مریم نواز کے کنٹرول میں ہے۔