ملک بھر میں مون سون کے چوتھے سپیل کا آج سے آغاز، سیلابی صورتحال کا خدشہ

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔19 جولائی ۔2025 )ملک بھر میں مون سون بارشوں کا چوتھا سلسلہ اتوارسے شروع ہونے کا امکان ہے جس کے باعث پنجاب، خیبر پختونخوا، سندھ اور بلوچستان کے متعدد علاقوں میں شدید بارشوں اور آندھی کا امکان ہے. محکمہ موسمیات کے مطابق پنجاب، سندھ، گلگت بلتستان، بلوچستان اور خیبرپختونخوا کے بعض علاقوں میں بارش کی توقع ہے پراونشل ڈیزاسٹر مینجمنٹ اتھارٹی (پی ڈی ایم اے ) پنجاب نے تمام ضلعی انتظامیہ کو ہائی الرٹ جاری کر دیا ہے جبکہ دریائے سندھ میں مختلف مقامات پر سیلابی کیفیت پیدا ہو گئی ہے پی ڈی ایم اے پنجاب کے ترجمان کے مطابق 20 سے 25 جولائی کے دوران لاہور، راولپنڈی، مری، گلیات، اٹک، چکوال، منڈی بہاﺅالدین، گجرات، جہلم، گوجرانوالہ، فیصل آباد، سیالکوٹ، نارووال، جھنگ، سرگودھا، میانوالی، ڈیرہ غازی خان، بہاولپور، بہاولنگر اور ملتان میں بارشیں متوقع ہیں.

ڈی جی پی ڈی ایم اے عرفان علی کاٹھیا کے مطابق بارشوں کے باعث دریائے سندھ میں تربیلا، کالاباغ اور چشمہ کے مقامات پر نچلے اور درمیانے درجے کے سیلاب کی صورتحال پیدا ہو چکی ہے جبکہ چشمہ کے مقام پر اونچے درجے کے سیلاب کا خدشہ ہے کالاباغ کے مقام پر دریائے سندھ کا پانی قریبی علاقوں کمر مشانی، مدت والا، چھینہ پوڑا، کچہ گجرات اور ڈھینگانہ میں داخل ہو چکا ہے، ہزاروں ایکڑ پر کھڑی فصلیں زیر آب آ گئیں، ریسکیو حکام نے اب تک 223 افراد اور 162 مویشیوں کو محفوظ مقامات پر منتقل کر دیا ہے، جناح بیراج پر پانی کی آمد 2 لاکھ 96 ہزار 629 کیوسک اور اخراج 2 لاکھ 89 ہزار 79 کیوسک ریکارڈ کیا گیا.

پی ڈی ایم اے کے مطابق پنجاب میں جاری مون سون بارشوں نے تباہی مچا دی ، جہاں گزشتہ 2 روز میں ہلاکتوں کی تعداد 70 سے تجاوز کر گئی، جب کہ مجموعی طور پر اموات کی تعداد 123 تک جا پہنچی ہے پی ڈی ایم اے کے مطابق 25 جون سے اب تک 462 افراد زخمی ہو چکے ہیںاور 150 عمارتوں کو نقصان پہنچا، اموات کی وجوہات میں آسمانی بجلی گرنا، کرنٹ لگنا، نہاتے ہوئے ڈوبنا اور مخدوش مکانات گرنا شامل ہیں جب کہ کئی علاقے شدید سیلاب کی لپیٹ میں ہیں چکوال بدستور سب سے زیادہ متاثرہ ضلع ہے، جہاں شدید بارشوں کے نتیجے میں زمین کھسکنے، چھتیں گرنے اور ندی نالوں میں طغیانی سے کئی جانیں ضائع ہو چکی ہیں.

پی ڈی ایم اے اور متعلقہ اداروں نے عوام سے اپیل کی ہے کہ بارشوں کے دوران دریاﺅں، ندی نالوں اور خطرناک مقامات کے قریب نہ جائیں، اور کسی بھی ایمرجنسی کی صورت میں ریسکیو 1122 سے فوری رابطہ کریں ادھر محکمہ موسمیات نے خبردار کیا ہے کہ آج 20 جولائی سے صوبے میں مزید شدید بارشوں کا سلسلہ شروع ہو سکتا ہے نئے ویدر سسٹمز کے باعث گرج چمک کے ساتھ طوفانی بارشوں، شہری سیلاب اور لینڈ سلائیڈنگ کا امکان ظاہر کیا گیا ہے محکمے نے پنجاب سمیت خیبرپختونخوا، سندھ، بلوچستان، کشمیر اور گلگت بلتستان کے درجنوں اضلاع کے لیے ہائی الرٹ جاری کر دیا ہے.

دریائے سندھ میں کالا باغ اور چشمہ کے مقامات پر اونچے درجے کے سیلاب کی پیش گوئی کی گئی ہے، جس کے ساتھ ہی پی ڈی ایم اے نے مقامی حکام کو فوری احتیاطی تدابیر اختیار کرنے کی ہدایت جاری کی ہے ڈی جی پی ڈی ایم اے عرفان علی کاٹھیا نے بتایا کہ پوٹھوہار ریجن میں 1000 سے زائد افراد کو ریسکیو کر کے محفوظ مقامات پر منتقل کیا گیا ان میں راولپنڈی سے 450، جہلم سے 398 اور چکوال سے 209 افراد شامل ہیں محکمہ موسمیات کے مطابق 19 سے 26 جولائی کے دوران ملک بھر میں موسلادھار بارشوں کا امکان ہے.

سندھ کے بیشتر اضلاع، خیبرپختونخوا کے شمالی و جنوبی علاقے، پنجاب کے میدانی و پہاڑی شہر، بلوچستان کے متعدد مقامات، آزاد کشمیر اور گلگت بلتستان اس طوفانی موسم کی زد میں ہوں گے ملک بھر میں ندی نالوں میں طغیانی، مقامی سیلاب، لینڈ سلائیڈنگ اور نشیبی علاقوں میں پانی جمع ہونے کے خطرات بڑھ چکے ہیں متاثرہ علاقوں کی ضلعی انتظامیہ کو ہنگامی پلان ترتیب دینے اور مقامی آبادی کو بروقت الرٹ کرنے کی ہدایت کی گئی ہے.

ادھر کراچی میں موسم ابر آلود ہے اور آ ئندہ24گھنٹوں میں ہلکی بارش کا امکان ہے، محکمہ موسمیات کے مطابق شہر کا موجودہ درجہ حرارت 31 ڈگری اور ہوا میں نمی کا تناسب 72 فیصد ریکارڈ کیا گیا ہے، زیادہ سے زیادہ درجہ حرارت35 ڈگری سینٹی گریڈ تک جانے کا امکان ہے جبکہ جنوب مغرب سے 11 کلومیٹر فی گھنٹہ کی رفتار سے سمندری ہوائیں چل رہی ہیں محکمہ موسمیات خیبر پختونخوا کے مطابق چترال، دیر، سوات، بونیر، مالاکنڈ، ایبٹ آباد، بٹگرام، شانگلہ، ہری پور، کوہستان، تورغر اور مانسہرہ میں بارش کا امکان ہے۔

(جاری ہے)

گزشتہ روز کاکول میں 14 ملی میٹر اور بالاکوٹ میں 3 ملی میٹر بارش ریکارڈ کی گئی، مالم جبہ میں سب سے کم درجہ حرارت 13 ڈگری جبکہ کالام میں 17 ڈگری سینٹی گریڈ ریکارڈ کیا گیا.

بلوچستان کے بیشتر اضلاع میں موسم گرم اور مرطوب ہے، بارکھان، سبی، موسی خیل، ژوب، لورالائی، ڈیرہ بگٹی، آواران اور دیگر علاقوں میں موسلا دھار بارش کا امکان ظاہر کیا گیا ہے سبی اور تربت میں زیادہ سے زیادہ درجہ حرارت 41 ڈگری، نوکنڈی میں 46 ڈگری، چمن میں 36 ڈگری، گوادر و جیوانی میں 33 ڈگری ریکارڈ کیا گیا.