Live Updates

پوری قوم کو یکجا ہوکر سیلاب کا مقابلہ کرنا ہوگا‘ باہر ہوتا تو ضرور فنڈ ریزنگ کرتا، عمران خان

اس وقت پورا ملک سیلاب میں ڈوبا ہوا ہے، اپنی قوم سے کہتا ہوں بڑھ چڑھ کر اور دل کھول کر ریلیف کے کاموں اور سیلاب متاثرین کی امداد میں حصہ لیں؛ سابق وزیراعظم کی جیل میں وکلاء سے گفتگو

ساجد علی منگل 9 ستمبر 2025 11:06

پوری قوم کو یکجا ہوکر سیلاب کا مقابلہ کرنا ہوگا‘ باہر ہوتا تو ضرور ..

راولپنڈی ( اُردو پوائنٹ اخبارتازہ ترین۔ 09 ستمبر 2025ء ) پاکستان تحریک انصاف کے پیٹرن انچیف عمران خان کا کہنا ہے کہ پوری قوم کو یکجا ہوکر سیلاب کا مقابلہ کرنا ہوگا، اگر باہر ہوتا تو ضرور فنڈ ریزنگ کرتا۔ اڈیالہ جیل میں وکلاء اور فیملی سے گفتگو کرتے ہوئے انہوں نے کہا کہ اس وقت پورا ملک سیلاب میں ڈوبا ہوا ہے، پنجاب اور خیبر پختونخواہ کے سیلاب کی وجہ سے لوگوں کا بہت نقصان ہوا ہے، پوری قوم کو یکجا ہو کر اس صورتحال کا مقابلہ کرنا ہو گا، میں اگر جیل سے باہر ہوتا تو ضرور فنڈ ریزنگ اور ٹیلی تھون کرتا مگر اب اپنی قوم سے کہتا ہوں کہ وہ بڑھ چڑھ کر اور دل کھول کر ریلیف کے کاموں اور سیلاب متاثرین کی امداد میں حصہ لیں، اسی طرح بلوچستان میں سیاسی جلسے پر ہونے والے حملے کے خلاف احتجاج میں پوری تحریک انصاف کو شرکت کرنی چاہیئے۔

(جاری ہے)

سابق وزیراعظم کہتے ہیں کہ خیبر پختونخواہ میں اپنے ہی لوگوں کے خلاف ملٹری آپریشن، ڈرون حملوں اور علاقوں سے بے دخلی کروانے کا عمل دراصل تحریک انصاف کی عوامی مینڈیٹ سے بننے والی حکومت کو غیر مقبول کرنے کے لیے کیا جا رہا ہے، علی امین گنڈا پور کو اس آپریشن کے خلاف بھر پور مزاحمت کرنی چاہیئے، صوبے کی عوام پہلے ہی سیلاب سے تباہ حال ہے، اگر وہاں ڈرون حملے اور آپریشن نہ رکا تو یہ بہت بڑی زیادتی ہو گی، ہمارے کتنے پولیس اہلکار بھی جام شہادت نوش کر چکے ہیں، یہ آپریشن جب تک بند نہیں ہو گا، لوگوں کی مشکلات میں مزید اضافہ ہوتا رہے گا اور دہشت گردی مزید بڑھے گی۔

عمران خان نے کہا کہ خیبرپختونخواہ کے وزیراعلیٰ علی امین گنڈاپور کو خصوصی ہدایت کرتا ہوں کہ وہ افغانستان جائیں، ان کے ساتھ جا کر بیٹھیں اور باہمی مسائل اور امن و امان کے حوالے سے بات کریں تاکہ حالات کو مزید بگاڑ سے بچایا جا سکے، جعلی وفاقی حکومت کو اس بات کا بھی جواب دینا چاہیئے کہ اگر مریم نواز جاپان اور تھائی لینڈ جا سکتی ہے تو خیبر پختونخواہ کا وزیراعلیٰ اپنے صوبے میں امن کے لیے افغانستان کیوں نہیں جا سکتا؟۔