بھارتی جارحیت پر پاکستانی میڈیا نے بہترین کردار ادا کیا، آج بھی آزادی صحافت سے متعلق چیلنجز ہیں، بلاول بھٹو

ڈس اور مس انفارمیشن ہتھیار بن چکا، جسے بھارت نے استعمال کیا، کشمیر پر پڑوسی ممالک پروپیگنڈا کرتے ہیں، چیئرمین پیپلز پارٹی کا تقریب سے خطاب

جمعہ 1 اگست 2025 22:25

کراچی(اُردو پوائنٹ اخبارتازہ ترین - این این آئی۔ 01 اگست2025ء)چیئرمین پیپلزپارٹی بلاول بھٹو نے کہا ہے کہ جنگ کے دوران عالمی سطح پر پاکستان اور بھارتی میڈیا آمنے سامنے تھے، بھارتی جارحیت پر پاکستانی میڈیا نے بہترین کردار ادا کیا، پی ایف یو جے نے آزادی صحافت کیلئے تحریک چلائی۔کراچی میں پاکستان فیڈرل یونین آف جرنلسٹس کے 75سال مکمل ہونے پر فیڈرل ایگزیکٹو کمیٹی کے اراکین کے اعزاز میں وزیراعلی ہائوس سندھ میں دیئے گئے عشائیے سے خطاب کرتے ہوئے بلاول بھٹو نے کہا کہ پی ایف یو جے نے آزادی صحافت کیلئے تحریک چلائی۔

انہوں نے کہا کہ بینظیربھٹو شہید تحریک میں صحافیوں کے ساتھ کھڑی رہیں، تحریک بحالی جمہوریت میں صحافیوں نے بھی جدوجہد کی، آج بھی آزادی صحافت سے متعلق چیلنجز ہیں۔

(جاری ہے)

انہوں نے کہا کہ بھارتی جارحیت کے دوران عالمی سطح پر پاکستان اور بھارتی میڈیا آمنے سامنے تھے، بھارتی جارحیت پر پاکستانی میڈیا سے بہترین کردار ادا کیا۔انہوں نے کہا کہ ڈس اور مس انفارمیشن ہتھیار بن چکا، جسے بھارت نے استعمال کیا، انہوں نے کہا کہ کشمیر پر پڑوسی ممالک پروپیگنڈا کرتے ہیں۔

انہوں نے کہا کہ جنگ سے پہلے ڈیجیٹل میڈیا پر پابندی تھی، پھر پتاچلا کہ یہ بہترین ہتھیار ہے، حکومت نے بھارت سے جنگ کے بعد ڈیجیٹل میڈیا سے پابندی ہٹائی تھی۔انہوں نے کہا کہ پیپلزپارٹی آزادی اظہار رائے پر یقین رکھتی ہے، صحافیوں کے تحفظ کیلئے قانون سازی ہونی چاہیے۔بلاول بھٹو نے کہا کہ سندھ میں سیلاب متاثرین کیلئی21 لاکھ گھر بنا رہے ہیں، ہم گھر بناکر خواتین کو مالکانہ حقوق دے رہے ہیں۔