امریکی اخبار واشنگٹن ٹائمز نے فیلڈ مارشل کو مرد آہن قرار دے دیا

امریکہ میں پاک فوج کے سربراہ کو جنوبی ایشیاء کی سلامتی کیلئے با اثر ترین شخصیت کے طور پردیکھا جاتا ہے، عاصم منیر جنوبی ایشیاء میں صدرٹرمپ کے نئے اسٹریٹجک پارٹنر بن سکتے ہیں؛ واشنگٹن ٹائمز کا آرٹیکل

ساجد علی جمعرات 21 اگست 2025 11:53

امریکی اخبار واشنگٹن ٹائمز نے فیلڈ مارشل کو مرد آہن قرار دے دیا

واشنگٹن (اُردو پوائنٹ اخبارتازہ ترین۔ 21 اگست2025ء) امریکہ سے تعلق رکھنے والے عالمی جریدے واشنگٹن ٹائمز نے فیلڈ مارشل سید عاصم منیر کو مرد آہن قرار دے دیا۔ واشنگٹن ٹائمز کے مطابق فیلڈ مارشل سید عاصم منیر انتہائی مضبوط اعصاب کے مالک اور سخت فیصلے لینے کی بھرپور صلاحیت رکھتےہیں، فیلڈ مارشل سید عاصم منیر جنوبی ایشیاء میں صدرٹرمپ کے نئے اسٹریٹجک پارٹنر بن سکتے ہیں کیوں کہ امریکہ میں فیلڈ مارشل کو جنوبی ایشیاء کی سلامتی کیلئے با اثر ترین شخصیت کے طور پردیکھا جاتا ہے، آرمی چیف ایک پیشہ ور، خاموش طبع، اورنظم و ضبط کے پابند فوجی افسر سمجھے جاتے ہیں۔

امریکی اخبار نے لکھا کہ فیلڈ مارشل عاصم منیر کو خودنمائی اور سیاست میں دلچسپی نہیں ہے، پاک بھارت کشیدگی کے دوران فیلڈ مارشل کی عوامی مقبولیت میں نمایاں اضافہ ہوا، فیلڈ مارشل عاصم منیر کی خوبیاں انہیں صدر ٹرمپ کے لیے ایک فطری شراکت داربناتی ہیں، بھارت سےبگڑتے تعلقات کے تناظر میں فیلڈ مارشل سید عاصم منیرکی ٹرمپ سے ملاقات زیادہ اہم ہے، صدرٹرمپ نے مداخلت کرکے پاکستان اور بھارت میں جنگ بندی کرائی۔

(جاری ہے)

واشنگٹن ٹائمز کے آرٹیکل میں کہا گیا ہے کہ پاکستان نے جنگ بندی پر ٹرمپ کا شکریہ اور مودی نے ثالثی کا انکار کیا، فیلڈ مارشل نے افغانستان اور ایران سے لاحق خطرات پرفوجی حکومت عملی میں اہم کردار ادا کیا، فیلڈ مارشل دہشت گرد تنظیموں کیخلاف مؤثر کارروائی کا مطالبہ کرتےہیں، پاک امریکہ تعلقات انسداد دہشت گردی میں تعاون کے حوالے سے مزید مضبوط ہوئے ہیں، پاکستان نے کابل ایئرپورٹ حملے کے ماسٹر مائنڈ کو گرفتار کرکے امریکہ کے حوالےکیا، صدر ٹرمپ نےدہشتگردی کے خلاف پاکستان کی کاوشوں کی تعریف کی، ٹرمپ انتظامیہ پاکستان کے ساتھ تعلقات کو بحال کرنے کے لیے سرگرم نظرآرہی ہے۔