ڈونلڈ ٹرمپ نے کانگریس سے اپنے پہلے خطاب میں پاکستان کی کھل کر تعریف کی،امریکی اخبار

جمعرات 21 اگست 2025 17:30

واشنگٹن(اُردو پوائنٹ اخبارتازہ ترین - این این آئی۔ 21 اگست2025ء)امریکی اخبار نے کہا ہے کہ صدر ڈونلڈ ٹرمپ نے کانگریس سے اپنے پہلے خطاب میں پاکستان کی کھل کر تعریف کی،پاکستان کو ایبی گیٹ بم دھماکے کے ماسٹر مائنڈ کو گرفتار کرنے پر سراہا گیا۔امریکی اخبار کے مطابق بتایا گیاکہ اس ملاقات کا محور امریکا پاکستان تعلقات کو مضبوط بنانا تھا، انسداد دہشت گردی تعاون، غیرملکی سرمایہ کاری اور تجارت سے پاکستانی معیشت دوبارہ فعال بنانے پر گفتگو ہوئی۔

اخبار نے کہا کہ پاکستانی وزیراعظم شہباز شریف نے بھی اس موقع پر عالمی توجہ حاصل کی، شہباز شریف صدر ٹرمپ کو نوبل امن انعام کے لیے نامزد کرنے والے پہلے عالمی رہنما بنے، یہ تجویز مبینہ طور پر فیلڈ مارشل عاصم منیر کا خیال تھی۔

(جاری ہے)

امریکی اخبار نے کہاکہ امریکا پاک تعلقات فوجی اور انسدادِ دہشت گردی تعاون سے کہیں آگے تجارتی محصولات پر مذاکرات میں معاونت تک پھیلے ہیں، ٹرمپ پاکستان میں موجود قیمتی معدنیات، اہم وسائل اور کرپٹو کرنسی منڈیوں میں بڑی صلاحیت دیکھتے ہیں، صدر ٹرمپ کے دور میں پاکستان کی جانب امریکی پالیسی کے مثبت رجحان کو نظر انداز کرنا مشکل ہے۔

امریکی اخبار نے کہا کہ صدر ٹرمپ امریکا کیلئے بہتر تجارتی معاہدے چاہتے ہیں، وہ مضبوط قیادت رکھنے والے رہنماؤں کو سراہتے ہیں، صدر ٹرمپ نہیں چاہتے کہ جنگیں معاشی ترقی میں خلل ڈالیں، ٹرمپ روس اور چین سے آنے والے چیلنجز اور ان کے مقابلے کے لیے جنوبی ایشیاء کی اہمیت بخوبی سمجھتے ہیں، ایسا لگتا ہے صدر ٹرمپ کو مودی کا توڑ اور مسٹر منیر کی صورت میں ایک شراکت دار مل گیا ہے۔