نو مئی کیس،علیمہ خان کے بیٹے شاہ ریز کا 8روزہ جسمانی ریمانڈ منظور،دوسرے بیٹے کی بھی گرفتاری کا دعویٰ

لاہور (اُردو پوائنٹ اخبارتازہ ترین - این این آئی۔ 22 اگست2025ء) پاکستان تحریک انصاف کے بانی عمران خان کے بھانجے اور علیمہ خان کے بیٹے شاہ ریز کو 9مئی کے مقدمے میں انسداد دہشت گردی عدالت میں پیش کردیا گیا، عدالت نے پولیس کی جانب سے ریمانڈ کی درخواست منظور کرتے ہوئے شاہ ریز کا 8روزہ جسمانی ریمانڈ منظور کر لیا جبکہ پی ٹی آئی کی جانب سے علمیہ خان کے دوسرے بیٹے شیر شاہ خان کی بھی گرفتاری کا دعویٰ کیا گیا ہے ۔

بانی پی ٹی آئی کے بھانجے اور علیمہ خان کے بیٹے شاہ ریز عظیم کو 9مئی جلا ئو گھیرائو کے مقدمے میں لاہور میں ان کی رہائش گاہ سے گرفتار کیا گیا تھا۔شاہ ریز عظیم کو لاہور کی انسداد دہشت گردی عدالت میں پیش کیا گیا جہاں ان کے کیس کی سماعت خصوصی عدالت کے جج منظر علی گل نے کی۔

(جاری ہے)

پولیس نے موقف اختیار کیا کہ ملزم کو 9مئی کے جناح ہائوس حملہ کیس میں ضمنی بیان میں نامزد کیا گیا، ملزم کو جمعرات کی شب گرفتار کیا، جس سے فون اور دیگر چیزیں ابھی ریکور کرنی ہیں۔

ملزم کے وکیل سلمان اکرم راجہ نے سوال اٹھایا کہ 27ماہ گزر گئے، پولیس کو اب ان کے ملوث ہونے کا پتہ چلا ،ضمنی بیان ڈیڑھ ہزار مرتبہ عدالت میں پڑھا گیا کہیں یہ نام نہیں، کل بانی کی ضمانت ہوئی اور شام کو یہ ان کے بھانجوں کو گرفتار کرنے پہنچ گئے، بدنیتی واضح نظر آرہی ہے۔انہوں نے مزید کہا کہ شاہ ریز عظیم عالمی لیول کے سپورٹس مین ہیں، کئی بار یہ ملک سے باہر گئے واپس آئے، کبھی کسی مقدمہ میں طلب نہیں کیا گیا، 6سے 13مئی تک یہ چترال میں تھے، انہیں فی الفور نہ صرف رہا کیا جائے بلکہ ڈسچارج کیا جائے۔

سلمان اکرم راجہ نے دلائل دیتے ہوئے کہا کہ آپ نے آرڈر دے رکھا ہے کہ اتنی دیر بعد جب آپ ملزمان کو نامزد کرتے ہیں تو اس میں بدنیتی نظر آتی ہے، ان کی والدہ کو آپ پہلے بھی ڈسچارج کرچکے ہیں۔دوسری طرف پولیس نے شاہ ریز عظیم کا 30دن کا ریمانڈ طلب کیا ، جس پر سلمان اکرم راجہ نے کہا کہ یہ 30دن کا ریمانڈ مانگ رہے ہیں جو زیادتی ہے۔عدالت نے ریمارکس دیئے کہ ضمنی کی فائل آجائے تو دیکھتا ہوں، پولیس نے شاہ ریز کے خلاف جناح ہائوس کیس کا ریکارڈ عدالت میں پیش کیا، ڈی ایس پی لیگل نے بتایا کہ ملزم شاہ ریز جناح ہائوس کیس کے علاوہ کسی اور مقدمے میں مطلوب نہیں۔

عدالت نے ریکارڈ دیکھنے اور دلائل کے بعد فیصلہ محفوظ کر لیا، بعدازاں عدالت نے پولیس کی درخواست پر فیصلہ سناتے ہوئے شاہ ریز کا 8روزہ جسمانی ریمانڈ منظور کر لیا۔دوسری جانب پی ٹی آئی کی جانب سے علیم خان کے دوسرے بیٹے شیر شاہ خان کی بھی گرفتاری کا دعویٰ کیا گیا ہے ۔خاندانی ذرائع کے مطابق شیر شاہ خان کو ان کی رہائش گاہ کے قریب سے حراست میں لیا گیا، گرفتاری سادہ کپڑوں میں ملبوس افراد نے کی جبکہ ان کے ساتھ پولیس اہلکار بھی موجود تھے۔