بھارت کے خلاف جنگ میں کامیابی نے سبز پاسپورٹ کی عزت اور وقار میں اضافہ کیا، وزیر اطلاعات

اسلام آباد (اُردو پوائنٹ اخبارتازہ ترین - این این آئی۔ 22 اگست2025ء)وزیر اطلاعات و نشریات عطاء اللہ تارڑ نے کہاہے کہ بھارت کے خلاف جنگ میں کامیابی نے سبز پاسپورٹ کی عزت اور وقار میں اضافہ کیا، یہ جنگ افواج پاکستان، وزارت اطلاعات اور میڈیا نے مل کر لڑی، دشمن کا میڈیا جھوٹا پروپیگنڈا کرتا رہا ،پاکستانی میڈیا نے ریاست کے بیانیہ کو عالمی سطح پر اجاگر کیا۔

وفاقی وزیر اطلاعات عطاء اللہ تارڑ نے سی پی این ای کے زیر اہتمام تقریب سے خطاب کرتے ہوئے کہاکہ اللہ تعالیٰ کے خاص فضل و کرم سے پاکستان نے بھارت کے خلاف حالیہ جنگ کامیابی سے لڑی۔ انہوںنے کہاکہ دنیا بھر میں پاکستان کے حوالے سے شکوک و شبہات تھے، بعض لوگ پاکستان کو رائٹ آف کر رہے تھے، اس جنگ نے سبز پاسپورٹ کی عزت اور وقار میں اضافہ کیا، دنیا نے دیکھا کہ پوری قوم متحد ہو کر کھڑی ہے۔

(جاری ہے)

وفاقیو زیر نے کہاکہ ہائوس کے فلور پر میں نے بطور وزیر اطلاعات یہ کہا کہ یہ وقت ہے کہ ہم متحد ہو کر قومی سطح پر یہ جنگ لڑیں، اللہ تعالیٰ کا شکر ہے کہ ہم نے اپنی زندگی میں یہ منظر دیکھا کہ پاکستان نے فتح حاصل کی، ہم سب کو اس میں حصہ ڈالنے کی توفیق ملی۔ انہوںنے کہاکہ سب سے پہلے بیانیہ کی جنگ شروع ہوئی، دشمن کے پاس وسائل، افرادی قوت اور انٹرنیشنل لابنگ زیادہ تھی لیکن ہمارے پاس سچ کی طاقت تھی، اسی سچ نے دشمن کو چاروں شانے چت کیا۔

عطاء اللہ تارڑ نے کہاکہ وزیراعظم نے کاکول میں خطاب کے دوران پہلگام واقعہ کی تحقیقات کی پیشکش کی، ہمارے موقف کو عالمی سطح پر تقویت ملی۔ وفاقی وزیر نے کہاکہ وزارت اطلاعات نے جدید ’’ڈیجیٹل وار روم‘‘ قائم کیا جو بیانیہ کی جنگ میں فیصلہ کن ثابت ہوا، آئی ایس پی آر سے لمحہ بہ لمحہ رابطہ رہا اور عالمی میڈیا میں پلیسمنٹ کے حوالے سے مشترکہ حکمت عملی اپنائی گئی۔

وزیر اطلاعات نے کہاکہ یہ جنگ افواج پاکستان، وزارت اطلاعات اور میڈیا نے مل کر لڑی، دشمن کا میڈیا جھوٹا پروپیگنڈا کرتا رہا جبکہ پاکستانی میڈیا نے ریاست کے بیانیہ کو عالمی سطح پر اجاگر کیا، ملک کے دفاع اور سالمیت کے لئے موثر کردار ادا کیا، یہی وجہ ہے کہ آج دنیا میں پاکستانی عوام کی عزت اور وقار میں اضافہ ہوا ہے۔انہوںنے کہاکہ عسکری قیادت نے نیشنل سیکورٹی کونسل کے فیصلوں پر عمل درآمد کرتے ہوئے دشمن کو ناکام بنایا۔

وزیر اطلاعات نے کہاکہ ایئر فورس کے شاہینوں نے تاریخ ساز کارنامہ انجام دیا، نیوی کے جوان ہر لمحہ دفاع وطن کے لئے تیار تھے کہ آپریشن دوارکا کی تاریخ دوہرانا پڑی تو دوہرائیں گے۔ وفاقی وزیر نے کہاکہ دشمن کو جب لگا کہ یہ کراچی پورٹ تباہ نہیں کر سکے تو اس نے لاہور اور ملتان کی خیالی پورٹس کو تباہ کرنے کا جھوٹا پروپیگنڈا کیا،پاکستانی قوم نے رات کے اندھیرے میں ہونے والے حملے کا فجر کے وقت بھرپور جواب دیا۔

عطاء تارڑ نے کہاکہ پوری قوم سیسہ پلائی دیوار بن کر کھڑی رہی، اللہ تعالیٰ نے جنگ سے پہلے، جنگ کے دوران اور بعد میں پاکستان کو عزت و وقار سے نوازا۔ وفاقی وزیر نے کہاکہ یوٹیوب چینلز کی بندش کے بعد انڈیا میں پاکستانی اشتہارات کے چلنے کی حکمت عملی نے دشمن کو سخت مشکل میں ڈالا، وزارت اطلاعات اور اس کے دروازے سی پی این ای کے لئے چوبیس گھنٹے کھلے ہیں۔