گور نر خیبر پختونخوا کی بیلجیئم کے سابق وزیر اعظم و ممبر یورپین پارلیمنٹ، ایلیو ڈی روپو سے ملاقات، باہمی دلچسپی کے امورپر تبادلہ خیال

فیصل کریم کنڈی نے موسمیاتی تبدیلیوں کے باعث پاکستان میں حالیہ سیلاب اور ان کے نتیجے میں ہونے والے جانی و مالی نقصان سے آگاہ کیا

جمعہ 22 اگست 2025 18:28

گور نر خیبر پختونخوا کی بیلجیئم کے سابق وزیر اعظم و ممبر یورپین پارلیمنٹ، ..

برسلز (اُردو پوائنٹ اخبارتازہ ترین - این این آئی۔ 22 اگست2025ء)گورنر خیبر پختون خواہ فیصل کریم کنڈی نے بیلجیئم کے سابق وزیر اعظم و ممبر یورپین پارلیمنٹ، ایلیو ڈی روپو سے ملاقات کی جس میں دو طرفہ تعلقات، موسمیاتی تبدیلی کے مضمرات سمیت باہمی دلچسپی کے امور پر تبادلہ خیال کیا گیا ۔گورنر خیبر پختون خواہ فیصل کریم کنڈی نے موسمیاتی تبدیلیوں کے باعث پاکستان میں حالیہ سیلاب اور ان کے نتیجے میں ہونے والے جانی و مالی نقصان سے آگاہ کیا ۔

فیصل کریم کنڈی نے کہاکہ موسمیاتی تبدیلی کے مضمرات سے نمٹنے کیلئے عالمی برادری کو مشترکہ لائحہ عمل اختیار کرنا ہو گا،اگر اس مسئلے پر فوری توجہ نہ دی گئی تو شدید غذائی قلت پیدا ہو سکتی ہے۔گورنر خیبر پختون خواہ نے ممبر یورپین پارلیمنٹ کو مقبوضہ جموں و کشمیر میں جاری انسانی حقوق کی سنگین خلاف ورزیوں کے حوالے سے آگاہ کیا۔

(جاری ہے)

فیصل کریم کنڈی نے کہاکہ مسئلہ کشمیر کے مستقل اور پائیدار حل کے بغیر خطے میں امن کا خواب شرمندہ تعبیر نہیں ہو سکتا۔

ایلیو ڈی روپو نے کہاکہ یورپی یونین پاکستان کے ساتھ تعلقات کو خصوصی اہمیت دیتا ہے، موسمیاتی تبدیلی کے حوالے سے پاکستان کی معاونت کی راہ ہموار کریں گے۔سابق وزیراعظم بیلجیم نے کہاکہ خیبر پختونخوا میں سیلاب متاثرہ علاقوں میں ہر ممکن امداد کو یقینی بنائیں گے، انڈس واٹر ٹریٹی کے یکطرفہ خاتمے کے معاملے کو بھی یورپی پارلیمنٹ میں زیر بحث لائیں گے۔چیئرمین کشمیر کونسل ای یو علی رضا سید، بیلجیم کی کاروباری شخصیت سید حسن افتخار، بیلجیم میں پاکستان کے ڈپٹی ہیڈ آف مشن سید فراز حسین زیدی، اسد نواز بھی اس ملاقات میں موجود تھے۔