پاکستان بھارت کے ساتھ مسئلہ کشمیر سمیت جامع مذاکرات کے لیے تیار ہے، اسحاق ڈار

جمعہ 22 اگست 2025 21:07

اسلام آباد (اُردو پوائنٹ اخبارتازہ ترین - آن لائن۔ 22 اگست2025ء) نائب وزیر اعظم اور وزیر خارجہ سینیٹر اسحاق ڈار نے کہا ہے کہ پاکستان بھارت کے ساتھ مسئلہ کشمیر سمیت جامع مذاکرات کے لیے تیار ہے، پاک بھارت جنگ بندی پر عمل جاری ہے۔ پارلیمنٹ ہاوس کے باہر میڈیا سے گفتگو کرتے ہوئے انہوں نے کہا کہ پاکستان بھارت کے ساتھ مسئلہ کشمیر سمیت جامع مذاکرات کے لیے تیار ہے، پاک بھارت جنگ بندی پر عمل جاری ہے۔

انہوں نے کہا کہ جنگ بندی کے لیے بھارت نے امریکا سے درخواست کی تھی۔ جنگ بندی کے لیے مجھے امریکا سے فون آیا تھا۔ میں نے واضح کیا کہ پاکستان جنگ چاہتا ہی نہیں تھا۔ ہم نے کسی سے نہیں کہا تھا کہ ہمیں بھارت کے ساتھ بٹھائیں۔ ہم سے کسی نیوٹرل مقام پر بٹھانے کی بات کی گئی تھی۔

(جاری ہے)

اس پر میں نے کہا تھا کہ اگر میٹنگ کسی نیوٹرل مقام پر ہوگی تو اس کے لیے پاکستان تیار ہے۔

نائب وزیراعظم نے کہا کہ ہم نے واضح کیا تھا کہ بھارت کے ساتھ کسی ایک نکاتی ایجنڈے پر بات نہیں ہوگی۔ بلکہ بھارت کے ساتھ مسئلہ کشمیر سمیت تمام تصفیہ طلب امور پر بات ہوگی۔ انہوں نے کہا کہ بھارت کی طرف سے بلاجواز بیان بازی جاری رہتی ہے۔ انہوں نے کہا کہ وزیراعظم شہباز شریف 30 اگست کو چین کے دورے پر روانہ ہوں گے۔ جبکہ او آئی سی کے وزرائے خارجہ کا اجلاس یکم ستمبر کو جدہ میں ہوگا۔ انہوں نے بتایا کہ ان کا بنگلہ دیش کا دورہ 2 روزہ ہے۔ دورے کا مقصد پاکستان اور بنگلہ دیش کو مزید قریب لانا ہے۔ امریکی وزیر خارجہ کے دورہ پاکستان سے متعلق ایک سوال کے جواب میں اسحاق ڈار نے کہا کہ ان کا دورہ ابھی شیڈول نہیں ہے۔