مون سون کے نئے سپیل میں لاہور سمیت ملک کے مختلف علاقوں میں موسلا دھار بارش

لاہور/اسلام آباد/ایبٹ آباد/مری/مانسہرہ(اُردو پوائنٹ اخبارتازہ ترین - این این آئی۔ 30 اگست2025ء)مون سون کے نئے سپیل میں لاہور سمیت ملک کے مختلف علاقوںمیں موسلا دھار بارش ہوئی جس سے سیلاب کی زد میں آئے ہوئے لوگوں کی مشکلات میں مزید اضافہ ہو گیا ،مری ، آزاد کشمیر ، میر پور اور باغ سمیت دیگر علاقوں میں موسلا دھار بارش سے ندی نالوں میں ایک بار پھر طغیانی کا خطرہ بڑھ گیا، بارش سے کئی علاقوں میں بجلی کا نظام معطل ہو گیا جبکہ نشیبی علاقے زیر آب آ گئے ، کئی مقامات پر بارش کا پانی گھروں اور مارکیٹوں میں داخل ہو گیا ۔

محکمہ موسمیات کے مطابق 2ستمبرتک ملک کے بیشترعلاقوں میں شدید بارشوں کی پیشگوئی ہے ، پنجاب، خیبرپختونخواہ ، بلوچستان اور سندھ میں مزید بادل برسیں گے، راوی، ستلج اور چناب کے ملحقہ علاقوں میں سیلابی صورتحال میں شدت متوقع ہے، نشیبی علاقوں میں اربن فلڈنگ کا خدشہ بڑھ گیا ہے ۔

(جاری ہے)

گزشتہ روز ہونے والی موسلا دھار بارش کی وجہ سے لاہور سمیت کئی علاقوں میں نشیبی علاقے کئی کئی فٹ پانی میں ڈوب گئے جس سے معمولات زندگی بری طرح متاثر ہوئے ۔

ڈپٹی ڈائریکٹر محکمہ موسمیات عرفان ورک کے مطابق مون سون بارشوں کا موجودہ سلسلہ نے بالائی علاقوں کا رخ کر لیا ہے، سیلابی علاقوں میں بھی مزید بارشیں ہوں گی۔ ستمبر کے پہلے ہفتے کے آخری دنوں میں بارشوں کا ایک اور اسپیل پاکستان میں داخل ہونے کی پیشگوئی ہے ،ملک میں اب تک معمول سے 12 فیصد زائد مون سون بارشیں ریکارڈ کی جاچکی ہیں۔محکمہ موسمیات کی رپورٹ کے مطابق موسلادھار بارشوں کے باعث، دیر، سوات، شانگلہ، بونیر، کوہستان، مانسہرہ، ایبٹ آباد، نوشہرہ، صوابی، مری، گلیات، اسلام آباد/راولپنڈی، شمال مشرقی پنجاب، کشمیر، ڈیرہ غازی خان اور اس سے ملحقہ مقامی،برساتی ندی نالوں میں طغیانی کا خطرہ ہے۔

رپورٹ کے مطابق خیبرپختونخوا ہ کے پہاڑی علاقوں، مری، گلیات اور کشمیر میں لینڈ سلائیڈنگ کے باعث ٹریفک کی آمد و رفت متاثر ہونے کا خدشہ ہے جبکہ موسلادھار بارش کے باعث اسلام آباد،راولپنڈی، گوجرانوالہ، لاہور، سیالکوٹ، نارووال، پشاور، نوشہرہ اور مردان کے نشیبی علاقے زیر آب آنے کا بھی خطرہ ہے۔محکمہ موسمیات کا کہنا ہے کہ موسلادھار بارش/آندھی،جھکڑ چلنے اور گرج چمک کے باعث روزمرہ کے معمولات متاثر ہونے، کمزور انفرااسٹرکچر ،کچے گھر،دیواریں، بجلی کے کھمبے، بل بورڈز، گاڑیاں، سولر پینل وغیرہکو نقصان کا اندیشہ ہے۔

مسافروں اور سیاح حضرات کو سفر کے دوران زیادہ محتاط رہنے کی ہدایت کرتے ہوئے کہا گیا ہے کہ موسمی حالات کے مطابق اپنے سفر کا انتظام کریں اور بارشوں کے دوران کسی بھی ناخوشگوار صورتحال سے بچنے کیلئے موسم کے بارے میں آگاہی حاصل کریں۔