uہمیں ائر پورٹ کی حدود میں سٹینڈ فراہم کئے جائیں:مجید غوری

۔لاہور (اُردو پوائنٹ اخبارتازہ ترین - آن لائن۔ 10 مئی2026ء) عوامی رکشہ یونین پاکستان کے زیر اہتمام پریس کلب کے سامنے پٹرولیم مصنوعات کی قیمتوں میں ظالمانہ اضافے، بڑھتی ہوئی مہنگائی، ہائی وے پولیس اور ائرپورٹ انتظامیہ کے مبینہ ناروا سلوک کے خلاف ایک بھرپور احتجاجی مظاہرہ کیا گیا۔ احتجاجی مظاہرے کی قیادت عوامی رکشہ یونین کے مرکزی چئرمین مجید غوری نے کی جبکہ رکشہ ڈرائیوروں کی کثیر تعداد نے شرکت کرکے اپنے مطالبات کے حق میں شدید نعرے بازی کی۔

اس موقع پر خطاب کرتے ہوئے مرکزی چئرمین مجید غوری نے کہا کہ پٹرولیم مصنوعات کی قیمتوں میں مسلسل اضافے نے ملک میں مہنگائی کا ایک خطرناک طوفان برپا کر دیا ہے۔ آٹا، چینی، گھی، دالیں، سبزیاں اور دیگر اشیائے ضروریہ عام آدمی کی قوتِ خرید سے باہر ہو چکی ہیں، جس کے باعث غریب رکشہ ڈرائیوروں کے گھروں کے چولہے ٹھنڈے پڑ گئے ہیں۔

(جاری ہے)

انہوں نے کہا کہ محنت کش طبقہ دو وقت کی روٹی کے لیے شدید پریشانی اور اذیت کا شکار ہے لیکن حکمران عوامی مشکلات کم کرنے کے بجائے مزید بوجھ ڈال رہے ہیں۔

آئین پاکستان کے مطابق جہاز والے کواور رکشہ والے کو برابر سلوک حاصل ہوں گے۔ہمیں ائر پورٹ کی حدود میں سٹینڈ فراہم کئے جائیں۔پٹرول اور اشیاء خورد و نوش مہنگی ہونے سے ہمارے گھروں میں فاقے ہیں۔پٹرول، ایل پی جی، آٹا، اشیاء ضروریہ اور خوردو نوش سستی کر و۔ مجید غوری نے کہا کہ آئینِ پاکستان ہر شہری کو برابر کے حقوق فراہم کرنے کی ضمانت دیتا ہے، مگر افسوس کے ساتھ کہنا پڑتا ہے کہ ہائی وے پولیس اور ائرپورٹ انتظامیہ رکشہ ڈرائیوروں کے ساتھ ناروا سلوک روا رکھے ہوئے ہیں۔

انہوں نے الزام عائد کیا کہ رکشہ ڈرائیوروں کو نہ ائرپورٹ کے اطراف روزگار کمانے دیا جاتا ہے اور نہ ہی ہائی وے پر چلنے کی اجازت دی جاتی ہے، جبکہ آئے روز گالی گلوچ، توہین آمیز رویہ اور تشدد معمول بن چکا ہے۔ انہوں نے کہا کہ یہ رویہ غریب محنت کشوں کا معاشی قتل ہے جسے کسی صورت برداشت نہیں کیا جائے گا۔انہوں نے وزیراعظم پاکستان میاں شہباز شریف اور وزیراعلیٰ پنجاب مریم نوازسے مطالبہ کیا کہ فوری طور پر ہائی وے پولیس اور ائرپورٹ انتظامیہ کے خلاف سخت نوٹس لے اور رکشہ ڈرائیوروں کو باعزت روزگار فراہم کرنے کے لیے عملی اقدامات کیے جائیں۔

انہوں نے مزید مطالبہ کیا کہ پٹرولیم مصنوعات کی قیمتوں میں فوری کمی کی جائے تاکہ مہنگائی کا بوجھ کم ہو سکے اور غریب عوام کو ریلیف ملے۔مرکزی چئرمین مجید غوری نے حکومت سے یہ بھی مطالبہ کیا کہ گراں فروشی کرنے والے مافیا کے خلاف سخت کارروائی کی جائے اور ناجائز منافع خوروں کو عبرتناک سزائیں دی جائیں تاکہ ملک میں مصنوعی مہنگائی اور ذخیرہ اندوزی کا خاتمہ ممکن بنایا جا سکے۔انہوں نے خبردار کیا کہ اگر عوامی رکشہ یونین کے مطالبات فوری طور پر تسلیم نہ کیے گئے تو احتجاج کا دائرہ پورے ملک تک وسیع کر دیا جائے گا، جس کی تمام تر ذمہ داری متعلقہ حکام اور حکومت پر عائد ہوگی