ٹانک میں دہشت گردوں کا پولیس لائن پر حملہ، 2 اہلکار شہید،3زخمی

پولیس لائن پر رات گئے دہشت گر دوں نے بھاری ہتھیاروں سے حملہ کیا، جوابی کارروائی میں حملہ آور ہلاک

فیضان ہاشمی جمعہ 15 دسمبر 2023 10:34

ٹانک میں دہشت گردوں کا پولیس لائن پر حملہ، 2 اہلکار شہید،3زخمی

ٹانک(اُردو پوائنٹ اخبارتازہ ترین۔ 15 دسمبر2023ء) خیبرپختونخوا کے ضلع ٹانک میں پولیس لائن پر دہشت گردوں کے حملے میں 2 پولیس اہلکار شہید جبکہ تین زخمی ہوگئے۔ تفصیلات کے مطابق ٹانک میں واقع پولیس لائن پر رات گئے دہشت گرد بھاری ہتھیاروں سے حملہ آور ہوئے، دہشتگردوں نے پولیس لائن میں داخل ہوتے ہی چار دستی بم پھینکے جبکہ ایک خودکش حملہ آور نے خود کو دھماکے سے اڑایا۔

پولیس کے مطابق حملے میں 2 پولیس اہلکار شہید اور 3 زخمی ہوگئے۔

(جاری ہے)

حملے کے بعد پولیس اور سکیورٹی فورسز نے علاقے کو گھیرے میں لے لیا، ملزمان اور پولیس کے درمیان فائرنگ کا تبادلہ کئی گھنٹوں تک جاری رہا، پولیس کی جوابی کارروائی میں حملہ آور ہلاک ہوگیا۔ اس سے قبل ڈیرہ اسماعیل خان میں دہشت گردوں کے خودکش حملے میں 3 سکیورٹی اہلکار شہید اور 16 زخمی ہوگئے تھے۔ پولیس کے مطابق ڈی آئی خان میں درابن سکول میں رہائش پذیر سکیورٹی فورسز پر دہشت گردوں نے رات 3 بجےحملہ کیا اور خود کش گاڑی سکول کی عمارت سے ٹکرا دی، جس کے نتیجے میں عمارت گرگئی اور خود کش حملے میں 3 سکیورٹی اہلکار شہید و 16 زخمی ہو گئے۔ پولیس کی جانب سے بتایا گیا ہے کہ درابن سکول میں فورسز کے جوان رہائش پذیر تھے۔