جھنڈیال میں تیل اور گیس کے نئے ذخیرے کی دریافت پنجاب کے صنعتکاروں کیلئے بہت بڑی نعمت ہے

فیصل آباد(اُردو پوائنٹ اخبارتازہ ترین - آئی این پی۔ 14 اکتوبر2017ء) فیصل آباد چیمبر آف کامرس اینڈانڈسٹری کے قائم مقام صدر شیخ فاروق یوسف نے کہا ہے کہ جھنڈیال میں تیل اور گیس کے نئے ذخیرے کی دریافت پنجاب کے صنعتکاروں کیلئے بہت بڑی نعمت ہے 18 ویں ترمیم کی آڑ میں سندھ کے صنعتکاروں کو 24 گھنٹے گیس مہیا کرنے کے ساتھ قیمت بھی صرف 488 روپے فی ایم ایم بی ٹی یو وصول کی جار رہی ہے جبکہ پنجاب کے صنعتکاروں کو گیس 1100 روپے فی ایم ایم بی ٹی یو کے حساب سے مہیا کی جا رہی ہے جس کی وجہ سے پنجاب کی صنعتوں کی پیداواری لاگت میں غیر معمولی اضافہ ہو جاتا ہے ان کیلئے دوسرے ملکوں سے مقابلے سے پہلے اندرون ملک ہی غیر ضروری مشکلات کھڑی کر دی جاتی ہیں اپنے جاری کردہ بیان میں امہوں نے کہا کہ پنجاب کے ضلع اٹک کے علاقے جھنڈیا ل میں تیل اور گیس کے نئے اور سب سے بڑے ذخیرے کی دریافت پر اطمینان کا اظہار کر تے ہو ئے کہا کہ حکومت کو تیل اور گیس کی دریافت کیلئے اپنی کوششیں مزید تیز کرنی چاہیں تاکہ درآمدی تیل پر انحصار کو کم کر کے قیمتی زرمبادلہ بچایا جا سکے انہوں نے کہا کہ موجودہ حکومت کے دور میں توانائی بحران کے خاتمہ کیلئے سنجیدہ کوششیں کی گئیں اور اس کی وجہ سے آج تمام گھریلو ، صنعتی ، زرعی صارفین اور پاور پلانٹس کو 24 گھنٹے گیس میسر ہے انہوں نے کہا کہ حکومت بڑی صنعتوں کو پہلے ہی 24 گھنٹے بجلی مہیا کر رہی ہے اور توقع ہے کہ آنے والے مہینوں میں اس کی قلت پر بھی مکمل طور پر قابو پا لیا جائے گا انہوں نے کہا کہ اس وقت ملک کی مجموعی گیس کا تقریباً 46 فیصد حصہ پنجاب میں استعمال ہو تا ہے جبکہ اس کے زیادہ تر کنویں سندھ اور بلوچستان میں ہیں فیصل آباد چیمبر آف کامرس اینڈانڈسٹری کا واضح اصولی موقف ہے کہ ملک بھر میں صنعتوں کو یکساں نرخوں پر بجلی اور پٹرولیم مصنوعات مہیا کی جائیں تاکہ وہ پوری یکسوئی سے برآمدات بڑھانے پر توجہ دے سکیں انہوں نے کہا کہ اس وقت سندھ اور پنجاب میں گیس کی قیمتوں میں تقریباً تین گنا کے فرق نے پنجاب کے برآمد کنندگان کیلئے مسائل کو بہت بڑھا دیا ہے اور حکومت کو اس مسئلے پر فوری توجہ دینی چاہیے انہوں نے وزیر اعلیٰ پنجاب میاں محمد شہباز شریف کے مطالبے پر جھنڈیا ل میں ٹیکنیکل کالج کے قیام کے اعلان کا بھی خیر مقدم کیا ہے اور کہا ہے کہ اس کے ذریعے نہ صرف مقامی لوگوں کے بچوں کو تعلیم اور ٹیکنیکل تعلیم کی سہولتیں میسر ہونگی بلکہ وہ تعلیم مکمل کرنے کے بعد اس اہم اور قومی منصوبے میں روزگار بھی حاصل کر سکیں گے۔