ملک بھر میں کپاس کی 35فیصد پیداوارکم

فیصل آباد (اُردو پوائنٹ اخبارتازہ ترین - آن لائن۔03 جولائی ۔2016ء)ملک بھر میں کپاس کی حالیہ 35فیصد کم پیداوارپر زرعی یونیورسٹی فیصل آباداور پنجاب ایگریکلچرریسرچ بورڈ پریشان ، کپاس کی کم پیداوارکی وجوہات کے تناظر میں مستقبل کیلئے ایک قابل عمل قومی ایکشن پلان متعارف کروانے کیلئے زرعی یونیورسٹی فیصل آبادکے سائنس دانوں حکمت عملی تیار کرناہوگی جس کے ذریعے موسمیاتی تبدیلیوں کے ہوتے ہوئے پیداوار میں کمی کے امکانات کو بروقت روکا جا سکے گا۔

یہ باتیں زرعی یونیورسٹی فیصل آبادکے وائس چانسلرپروفیسرڈاکٹر اقراراحمد خاں نے پنجاب ایگریکلچرریسرچ بورڈ کے چیف ایگزیکٹو آفیسر ڈاکٹر نورالاسلام خان کے ساتھ ملاقات میں کہیں۔ وائس چانسلرکے چیمبرمیں ہونیوالی ملاقات میں نب جی کے ڈائریکٹر ڈاکٹر شاہد ‘ چیئرمین شعبہ انٹومالوجی ڈاکٹر محمد جلال عارف‘ ڈاکٹر منصور ساہی ‘ ڈاکٹر وقاص وکیل اور ڈاکٹر دلدار گوگی بھی موجود تھے۔

(جاری ہے)

ڈاکٹر اقرار احمد خاں نے کہا کہ موسمیاتی تبدیلیاں ایک مکمل حقیقت کی صورت میں ہمیں متاثر کر رہی ہیں لہٰذا سائنس دانوں کو ان کی موجودگی میں پیداواری تسلسل کو یقینی بنانے کی راہ نکالنا ہوگی۔ انہوں نے کہاکہ موسمیاتی تبدیلیوں کے ساتھ کپاس میں گلابی سنڈی بھی پوری شدت کے ساتھ فصل پر حملہ آور ہوکر نقصان کے حجم میں اضافہ کرتی ہے لہٰذا اس کی موثر روک تھام اور مینجمنٹ کیلئے مربوط حکمت عملی سامنے لانا ہوگی۔

انہوں نے کہا کہ بڑھتی ہوئی انسانی آبادی کیلئے غذائی ضروریات میں ہونے والاممکنہ اضافہ سائنس دانوں کو فصلوں میں جینیاتی ادغام اور پری سائسیڈایگریکلچرکی رہنمائی کر رہا ہے جس کیلئے کم زرعی مداخل کے ساتھ زیادہ پیداوار کا حصول ایک اہم اور جواب طلب چیلنج ہوگا۔ پنجاب ایگریکلچرریسرچ بورڈ کے چیف ایگزیکٹو آفیسر ڈاکٹر نور الاسلام خاں نے کہا کہ دونوں ادارے مستقبل میں کپاس کی سٹیک ہولڈرڈ میٹنگ کا انعقاد کریں گے جس میں تمام اُمور پر سیرحاصل گفتگو کے بعد سفارشات کوحتمی شکل دی جائیگی۔

انہوں نے کہاکہ ان کا ادارہ کپاس پر گلابی سنڈی کے موثر تدارک اور روک تھام کیلئے تحقیقی منصوبوں کیلئے فنڈنگ میں چنداں دیر نہیں کرے گا لہٰذا ضرورت ہے کہ اس حوالے سے مکمل ہوم ورک کے ساتھ تحقیقی منصوبوں کا آغاز کیا جائے۔ اجلاس میں زرعی یونیورسٹی اور پارب کی قیادت نے اس امرپر اتفاق کیا کہ قومی سطح پر ایکشن پلان ترتیب دینے میں دونوں ادارے ایک دوسرے سے تعاون کریں گے۔

ڈاکٹر محمدجلال عارف نے کہاکہ کپاس کی گلابی سنڈی ایشیاء اور افریقہ میں پیداواری اضافہ کی راہ میں ایک بڑی رکاوٹ ہے جس کیلئے سائنس دانوں کو مل بیٹھ کر کامیاب حکمت عملی ترتیب دینا ہوگی۔ انہوں نے کہاکہ ان کے شعبہ میں کپاس میں گلابی سنڈی اور کجھور میں پام ویول کی موثر روک تھام کیلئے ورکنگ گروپ تشکیل دے دیا گیا ہے جو جلد ہی اپنی سفارشات پیش کرے گا۔