مقبوضہ کشمیر میں ہندی زبان تھوپنے کی سازش تیار

مقبوضہ کشمیر میں بڑی تعداد میں بسنے والے مسلمانوں کے حق خود ارادیت کو سلب کرنے کے لئے جس طرح مودی حکومت گھناونے ہتھکنڈے استعمال کر رہی ہے اس کی مثال دنیا میں نہیں ملتی ۔مقبوضہ کشمیر میں جبری پابندیوں کو 345 روز سے زائد بیت چکے ہیں لیکن بھارتی فوج کی مقبوضہ کشمیر میں بربریت تھم نہ سکی۔بھارت کی ہٹ دھرمی اور دوسروں کے حق چھیننے کی پالیسی کی وجہ سے اسے بین الاقوامی سطح پرہونے والے ہر محاذ پر ناکامیوں کا سامنا ہے۔

چین کے بعدحال ہی میں مودی سرکار کو ایران نے بھی ایک بڑا جھٹکادے دیا ہے۔چین نے چابہار ریل منصوبے سے بھارت کو نکال دیاجس پرحسب روایت بھارتی میڈیا پر شدید واویلا مچایا گیا جبکہ بھارتی اپوزیشن جماعت نے حکمران پارٹی کو خوب سنائی۔

(جاری ہے)

کانگرس پارٹی نے بی جے پی حکومت پر تنقید کرتے ہوئے اسے ملکی و سفارتی سطح پر ایک ناکام حکومت قرار دیا۔ادھر نیپال نے بھی ایک نیا دعویٰ کرکے بھارت کی نیندیں اڑا دی ہیں نیپال نے دعویٰ کیا ہے کہ اصل ایودھیا ہندوستان میں نہیں بلکہ نیپال میں ہے،انھوں نے یہ دعویٰ بھی کیا ہے کہ ہندو مذہب کے بھگوان ہندوستانی نہیں بلکہ نیپالی تھے۔

نیپالی وزیراعظم کے اس چونکا دینے والے بیان نے رام مندر کے دعوے پربھی کئی سوال کھڑے کردیئے ہے اس کے علاوہ لداخ میں چین نے بھارت کو جوسرپرائزز دیئے وہ سب آپ اچھی طرح جانتے ہیں۔اس سے قبل پاکستان بھی بھار ت کو ابھینندن جیسے سرپرائز دے چکا ہے۔
بی جے پی کی حکومت بننے کے بعد سے بھارت کی دنیا بھر میں جگ ہنسائی ہورہی ہے،اسے ہر محاز پر رسوا ء ہونا پڑ رہا ہے اس کے باوجود مودی سرکار مقبوضہ کشمیر میں ظلم و بر بریت کو ختم کرنے کی بجائے اسے دن بہ دن مزید بڑھا رہی ہے،کبھی معصوم نہتے کشمیریوںکو دہشت گرد بنا کر شہید کردیا جاتا ہے تو کبھی گھر گھر ناجائز تلاشی کے بہانے عورتوں ،بچوں ،بزرگوں کو ذدو کوب کرنے کے علاوہ نوجوانوں کو ماوں، بہنوں، بیٹیوں اور بیویوں کے سامنے بے دردی سے شہید کرنے کے بعد لواحقین کوان شہیدوں کی قبروں پر بھی جانے سے بھی روکا جاتا ہے۔

مقبوضہ کشمیر میں ہندوں کی جھوٹی اکثریت ثابت کرنے کے لئے ہندووں کے خاندان بسائے جارہے ہیں۔کشمیر کی اہم شاہراہوںاورعلاقوں کے نام تبدیل کر کے اس کی اصل شناخت مسخ کی جارہی ہے۔ان دنو ں ایک نئی سازش تیار کی گئی ہے جس کے تحت مقبوضہ کشمیر سے اردو کو ختم کرکے ہندی زبان رائج کرنے کے لئے مختلف طریقے اختیار کئے جارہے ہیں حالانکہ کشمیر کے پورے خطے میں اردو کو ایک مشترکہ زبان سمجھا جاتا ہے یہ کشمیر اور ہندوستانی انتظامیہ کے مابین بھی ایک لنک زبان کے طور پر کام کرتی ہے۔

مقبوضہ کشمیر میں اردو نہ صرف مسلمان بلکہ اعلیٰ ذات کے ہندوؤں کے علاوہ سکھوں ، عیسائیوں ، بدھ مت اور دیگر مذہبی و نسلی گروہوں کے درمیان بھی بات چیت کا ذریعہ ہے۔
مقبوضہ کشمیر میں ہندی زبان کو زبردستی تھوپنے کے لئے ایک نئی چال چلی گئی ہے،ایک نام نہاد سماجی کارکن مگو کوہلی نے جموں کشمیر ہائی کورٹ میں ایک درخواست دی ہے جس میں کہا گیا کہ سرکاری دستاویز اردو میں ہونے کی وجہ سے مقامی آبادی کو مشکل کا سامنا کرنا پڑتا ہے،اردو نہ تو ان کی مادری زبان ہے اور نہ ہی مرکز کے زیر انتظام علاقہ میں استعمال کی جانے والی زبان ہے۔

اپنی درخواست میں کوہلی نے عدالت سے کہا ہے کہ جموں کشمیر تنظیم نو ایکٹ 2019کے نفاذ کے بعد بھی جموں و کشمیر انتظامیہ،محکمہ مالیات،پولیس اور عدالتوں سے متعلق سبھی دستاوزیزات اردو میں ریکارڈ کئے جارہے ہیں۔اس درخواست پر جموں کشمیر ہائی کورٹ نے جموں کشمیر انتظامیہ کو ایک نوٹس جاری کیاہے جس میں ہندی زبان کو سرکاری زبان بنائے جانے کامطالبہ کیا گیا ہے۔

چیف جسٹس گیتا مغل اور جسٹس سنجے دھر کی بینچ نے جموں کشمیر انتظامیہ سے پوچھا ہے کہ وہ وجہ بتائیں کہ اس عرضی کو کیوں نہ منظورکیا جائے۔ادھر بی جے پی نے بھی جموں و کشمیر ہائی کورٹ میں داخل درخواست کی حمایت کردی ہے۔کشمیر میں کٹھوعہ ضلع کے بی جے پی کے نائب صدر اور انچارج یدھ دیر سیٹھی نے مرکز کے زیر انتظام علاقہ میں ہندی کو سرکاری زبان بنانے کی حمایت کی ہے۔ایک نیوز چینل پر اس نے کہا کہ جموں کشمیر میں آرٹیکل370کے بعد اگر ہندی سرکاری زبان بنتی ہے تو وہ جموں و کشمیر کے لوگوں کے لئے یہ سب سے بڑا گفٹ ہوگا۔بھارت کی اس طرح کی حرکتیں بتاتی ہیں کہ مقبوضہ کشمیر پر چھائے ظلم اور بربریت کے بادل چھٹنے والے ہیں اور بہت جلد کشمیر ی آزادی کی سانس لیں گے۔