فارن فنڈنگ کیس

عوام اور اپوزیشن بہت ظالم ہیں کہ وزیراعظم سے فارن فنڈنگ کا جواب مانگتے ہیں اور ریاست مدینہ کےدعویدار وزیر اعظم فرماتے ہیں کہ میں کسی عام شہری کو جواب دہ نہیں اب عوام اور اپوزیشن کو سمجھ نہ آۓ تو اور بات ورنہ وزیراعظم نے تو جواب دے ہی دیا ہے گناہ اتنے تھے کہ ان کا حساب کیا دیتے سوال ایسے تھے کہ ان کا جواب کیا دیتے ریاست مدینہ کا ڈھونگ رچانے والے کو شائد معلوم نہیں کہ فارن فنڈنگ کیس نے تحریک انصاف کی قانونی ہی نہیں اخلاقی حیثیت کو بھی بحران کا شکار کر دیا ہے قانونی اعتبار سے تو جیسا بھی ہو اور فیصلہ جو بھی آۓ مگر  ان کو علم ہی نہیں کہ ان کا اخلاقی وجود کتنے بڑے بحران سے دوچار ہو چکا ہے مجھ سمیت ہر عام شہری فارن فنڈنگ کے حوالے سے اپنے اندر تحفظات اور سوالوں کے انبوہ رکھتا ہے
اگر ان سوالات کے جوابات مل گۓ توہم سمجھیں گے کہ تحریک انصاف کا اخلاقی وجود انحطاط کا شکار نہیں بصورت دیگر سب گول مال ہے
ہم جاننا چاہتے ہیں کہ اکبر ایس بابر نے عمران نیازی سے جن تحفظات کا ذکر کیا  تھا کیا ریاست مدینہ کے دعویدار کی یہ ذمیداری نہیں بنتی تھی کہ وہ غیر معمولی توجہ سے اس مسئلے کو دیکھ کر حقائق عوام اور اپنے کارکنوں کے سامنے لاتے اور انہیں مطمئن کرتے اکبر ایس بابر نے شروع سے ہی کہا تھا کہ جسٹس وجیہہ الدین کی سربراہی میں کمیٹی تشکیل دی جاۓ اور اس سے فیصلہ کرا لیا جاۓ کہ حقائق کیا ہیں تو اس تجویز کو کیوں رد کر دیا گیا جسٹس وجیہہ الدین جیسے شخص سے تحقیق کرانے میں آخر کیا خوف مانع تھا دوسرا اگر تحریک انصاف یا عمران نیازی کا دامن صاف ہے تو سیکروٹنی کے عمل سے انھیں کیوں خوف آتا ہے صرف یہی نہیں اپنے اکاؤئنٹس کی سکروٹنی سے بچنے کیلۓ تحریک انصاف نے اسلام آباد ہائی کورٹ میں ایک نہیں دو نہیں تین نہیں بلکہ پورے گیارہ مرتبہ پٹیشنز دائر کیں کیا عوام پوچھ سکتے ہیں کہ اس کی وجہ کیا ہے
خان صاحب اپنے سیاسی حریفوں کو تو الیکشن کمیشن سے رجوع کرنے کے مشورے دیتے رہتے ہیں مگر جب اپنا فارن فنڈنگ کیس الیکشن کمیشن کے پاس آیا تو انھوں نے الیکشن کمیشن کے حق سماعت کو بھی چیلنج کر دیا یہ حربے اور ہتھکنڈے اتنے طویل ہو گۓ کہ الیکشن کمیشن کو بالآخر کہنا پڑا کہ تحریک انصاف قانونی طریقہ کار کے غلط استعمال کی تاریخ اور مثال قائم کر چکی ہے کیا الیکشن کمیشن سے اس تمغہ حسن کارکردگی سے کسی نے ازرہ مروت ہی بد مزہ ہونے کی کوشش کی؟
الیکشن کمیشن میں نیازی صاحب نے کہا کہ میں تو اپنی پارٹی کے فنڈز کے بارے میں کسی عام شہری کو جواب دہ نہیں اور نہ معلومات فراہم کر سکتا ہوں شائد ریاست مدینہ کا ڈھونگ رچانے والے یہ بھول چکے ہیں یا انھیں معلوم نہیں کہ ریاست مدینہ میں تو حضرت عمر جیسے جلیل القدر صحابی رسول اور خلیفہ وقت سے ایک عام شہری اٹھ کر ایک کُرتے کے بارے میں سوال کر سکتا تھا تو نیازی صاحب کو یہ غلط فہمی کیسے ہوگئی کہ وہ کسی عام شہری کو جواب دہ نہیں ستم یہ ہے کہ اکبر ایس بابر کو عدالت میں حاضر ہوکر یہ ثابت کرنا پڑا کہ میں عام شہری نہیں بلکہ تحریک انصاف کا حصہ ہوں اور ہر پارٹی ورکر قانون کے مطابق اپنی پارٹی کے اکاؤنٹس کی تفصیل طلب کر سکتا ہے الیکشن کمیشن نے ایک دو تین چار یا پانچ مرتبہ نہیں بلکہ پورے چوبیس مرتبہ تحریک انصاف کو تحریری طور پر حکم دیا ہے کہ اپنے ملکی اور غیرملکی فنڈز اور اکاؤنٹس کی تفصیل پیش کریں مگر تحریک انصاف نے ان دو درجن احکامات کو ہوا میں آڑا دیا میں سمجھتا ہوں کہ اگر معاملات اتنے سادہ اور شفاف ہیں تو الیکشن کمیشن سے بینک اکاؤنٹ چھپانے کی کیا ضرورت ہے اور بالآخر مجبور ہوکر الیکشن کمیشن کو سٹیٹ بینک آف پاکستان کو خط لکھنا پڑا کہ تحریک انصاف کے اکاؤنٹس کی تمام تر معلومات اور ریکارڈ فراہم کیا جائے جب یہ ریکارڈ آیا تو معلوم ہوا کہ پی ٹی آئی کے بینک آکاؤنٹس کی تعداد 23 ہے جبکہ تحریک انصاف نےان کی   تعداد آٹھ بتائی تھی
اب سوال یہ پیدا ہوتا ہے کہ آخر ان پندرہ اکاؤنٹس کو الیکشن کمیشن آف پاکستان سے پوشیدہ رکھنے کا کیا جواز تھا اور الیکشن کمیشن سے غلط بیانی کیوں کی گئی بات یہاں ختم نہیں ہوتی بلکہ جب سٹیٹ بینک سے اکاؤنٹس کی تمام تر تفصیلات آ گئیں تو تحریک انصاف نے نئی درخواست دائر کردی کہ جناب مہربانی کیجیۓ اب سیکروٹنی کی کاروائی خفیہ رکھی جاۓ قارئین حضرات سوال جواب طلب یہ ہے کہ  سیکروٹنی کی کاروائی خفیہ رکھنے کی درخواست آخر کیونکر کی گئی ؟ کیا ہے جس کی پردہ داری مقصود ہے کیا معاملات کو خفیہ رکھنے کی درخواست اس چیز کی گواہی نہیں کہ تہہ خاک کوئی بڑا سونامی یا بھوکمپ انگڑائی لے رہا ہے ایک اور سوال جس کا تعلق صرف اور صرف نیو ریاست مدینہ کے خلیفہ سے ہے کہ ایک بیان حلفی جو ہر سال الیکشن کمیشن میں جمع کروایا جاتا ہے جو الیکشن ایکٹ 2017 کے مطابق ہر سیاسی پارٹی ہر مالی سال کے ختم ہونے کے ساٹھ دنوں کے اندر اپنی پارٹی کے اثاثے آمدن آخراجات اور فنڈز کے ذرائع کی تفصیل الیکشن کمیشن میں جمع کرانے کے پابند ہوتی ہے اور ساتھ ساتھ جماعت کا سر براہ ایک بیان حلفی بھی دیتا ہے کہ اس نے کسی غیر ملکی شہری ، ادارے یا کسی دوسرے ملک سے کوئی رقم نہیں لی یہ کوئی نیا قانون بھی نہیں بلکہ یہ بات پولیٹیکل پارٹیز آرڈر 2002 میں بھی موجود ہے اور نیازی صاحب نے بھی یہ بیان حلفی دیا ہوا ہے اب اگر آئین کے آرٹیکل 62 کو چھوڑ دیجیۓ الیکشن ایکٹ کو بھی نظر انداز کر لیجئے جس کے تحت سربراہ اور پارٹی دونوں نااہل ہو سکتے ہیں لیکن اتنا تو بتا دیجئے کہ فارن فنڈنگ کے ثبوت موجود ہونے کے باوجود یہ حلف نامہ جمع کرانا کہ ہم نے کسی غیر ملک یا غیر ملکی باشندے سے فنڈ نہیں لیا آپ کے آدرش اصول نظریات اور اخلاقیات کے خلاف نہیں ہے آخر اس کیس میں ایسا کون سا خوف اور پیچیدگی ہے کہ عمران خان کو بار بار وکیل بدلنے کی ضرورت پیش آئی ہے یا حقیقت سے آگہی اور جان کاری کے بعد وکلا حضرات خود معذرت کر لیتے  ہیں کہ یہ مقدمہ لڑنا ہمارے بس کی بات نہیں یا پھر معاملے کو طول دینے کی شعوری کوشش کی جارہی ہے ہر دو صورتوں میں کیا یہ طرز عمل آعلی آدرش رکھنے والی پارٹی کو زیب دیتا ہے جبکہ وہ انصاف کے نام پر وجود میں آئی ہو اور ہمیشہ دعویدار رہی ہو کہ ہمارے علاوہ باقی تمام پارٹیز اور ان کے لوگ چور ڈاکو اور کرپٹ ہیں یا غدار اور مشکوک ہیں۔