Live Updates

ملکی مفاد میں آج بھی مذاکرات کیلئے تیار ہیں،خواجہ آصف

عمران خان کے اپنے قتل سے متعلق الزامات جھوٹے ہیں،عام انتخابات اکتوبر میں ہوں گے،وزیر دفاع کی غیر ملکی میڈیا سے گفتگو

عبدالجبار جمعہ 24 مارچ 2023 12:58

ملکی مفاد میں آج بھی مذاکرات کیلئے تیار ہیں،خواجہ آصف

اسلام آباد (اُردو پوائنٹ،اخبارتازہ ترین ۔ 24 مارچ 2023ء) وزیر دفاع خواجہ آصف کا کہنا ہے کہ عمران خان روز ایک نئی آئینی بحران پیدا کرنے کی کوشش کر رہے ہیں۔ سکیورٹی مسائل کی وجہ سے انتخابات کیلئے فنڈز فراہم نہیں کر سکتے،مسائل کے حل کیلئے جامع مذاکرات پر یقین رکھتے ہیں اور ملکی مفاد میں آج بھی مذاکرات کیلئے تیار ہیں۔ تفصیلات کے مطابق خواجہ آصف نے وزیر اطلاعات مریم اورنگزیب کے ہمراہ غیر ملکی میڈیا سے گفتگو کرتے ہوئے کہا ہے کہ ہم سب نے اتفاق سے فیصلہ کیا الیکشن اکتوبر تک نہیں کرائیں گے،آئندہ صورتحال کیسی ہو گی علم نہیں اس لئے الیکشن کب ہوں گے،ضمانت نہیں دے سکتا۔

عمران خان جو بحران پیدا کر رہے ہیں ہم انہیں ہینڈل کر رہے ہیں،ہم ان بحرانوں سے کامیابی کے ساتھ نکلیں گے۔

(جاری ہے)

چیئرمین پی ٹی آئی کے اپنے قتل سے متعلق الزامات جھوٹے ہیں،عمران خان کیخلاف تحریک عدم اعتماد آئینی طریقے سے لائی گئی،آج عمران خان امریکی سینیٹرز،کانگریس مین اور دیگر سے اپنے حق میں بیانات دلا رہے ہیں۔ انہوں نے کہا کہ سابق وزیراعظم نے غیر آئینی طور پر قومی اسمبلی توڑی،عمران خان نے حکومت کے خاتمے کے بعد ہر مقام پر غیر آئینی اقدام اٹھایا۔

تحریک انصاف کا منفی رویہ سب کے سامنے ہے،سابق وزیراعظم مایوس آدمی ہیں اور وہ پرتشدد کارروائیوں پر یقین رکھتے ہیں۔ وزیر دفاع کا کہنا تھا کہ عمران خان بضد ہیں کہ عدالتوں کے سامنے پیش نہیں ہوں گے،چیئرمین پی ٹی آئی جتھوں کو لے کر عدالت پہنچتے ہیں،پاکستان کی تاریخ میں کبھی ایسا غیر قانونی اقدام کسی سیاست دان نے نہیں اٹھایا۔ انہوں نے نے بتایا کہ نواز شریف نے کبھی آئین اور قانون کی خلاف ورزی نہیں،گزشتہ ایک سال عمران خان کے مختلف الزامات کی وجہ سے مشکلات پیدا ہوئیں ہے۔

خواجہ آصف نے واضح کرتے ہوئے کہا کہ عام انتخابات اکتوبر میں ہوں گے،سکیورٹی کی وجہ سے مشکلات کا شکار ہیں،بیرونی اور اندرونی خطرات کے باعث پولنگ اسٹیشنز پر فوج کی تعیناتی مشکل ہے،آئی ایم ایف معاہدے سے متعلق علم نہیں۔