8 فروری کے عام انتخابات کیلئے سیاسی رہنماؤں کے حلقے طے ہوگئے

ہفتہ 13 جنوری 2024 15:52

اسلام آباد (اُردو پوائنٹ اخبارتازہ ترین - این این آئی۔ 13 جنوری2024ء) 8 فروری کے عام انتخابات کے لیے سیاسی رہنماؤں کے حلقوں کافیصلہ ہوگیا، الیکشن کمیشن نے انتخابات کے امیدواروں کی حتمی فہرست جاری کردی۔تفصیلات کے مطابق عام انتخابات کیلئے بڑے سیاسی رہنماؤں کی صف بندی مکمل ہوگئی، اہم سیاسی رہنما بھی اپنے حلقوں سے انتخاب لڑیں گے۔لیگی قائد نوازشریف این اے 130 لاہور اور لیگی صدر شہباز شریف این اے 123 لاہور سے انتخابی رنگ میں اتریں گے، خواجہ آصف این اے 71 سیالکوٹ، احسن اقبال این اے 76، خرم دستگیر این اے 78 سے قومی اسمبلی کا الیکشن لڑیں گے۔

سعد رفیق این اے 122 سے اور جاوید لطیف این اے 115 سے انتخابی دنگل میں شرکت کریں گے۔بلاول بھٹو این اے 127 لاہور اور این اے 194 لاڑکانہ سے قومی اسمبلی کاانتخاب لڑیں گے۔

(جاری ہے)

جمعیت علما اسلام ف کے سربراہ مولانافضل الرحمٰن این اے 44 ڈی آئی خان سے قومی اسمبلی کارکن بننے کی کوشش کریں گے، امیرجماعت اسلامی سراج الحق این اے 7 لوئردیر اور سیکرٹری جنرل لیاقت بلوچ این اے 123 سے قسمت آزمائیں گے۔

بلوچستان نیشنل پارٹی (بی این پی) کے اخترمینگل این اے 246 سے ایوان زیریں کاانتخاب لڑیں گے، پی ٹی آئی کے چیئرمین بیرسٹر گوہر این اے 10 سے سابق اسپیکر قومی اسمبلی اسد قیصر این اے 19 سے الیکشن لڑیں گے۔پی ٹی آئی کے سردارلطیف کھوسہ این اے 122، سلمان اکرم راجا این اے 128 سے اور شعیب شاہین ایڈووکیٹ اسلام آباد کی نشست کیلئے انتخابی اکھاڑے میں اتریں گے۔آئی پی پی کے جہانگیرترین این اے 145 اور این اے 155 سے قسمت آزمانے کوتیار ہیں، آئی پی پی کے ہی عبدالعلیم خان نے این اے 117 سے الیکشن لڑنے کا فیصلہ کیا ہے۔