�راچی(اُردو پوائنٹ اخبارتازہ ترین - این این آئی۔ 05 فروری2025ء)جماعت اسلامی پاکستان کے مرکزی نائب امیر لیاقت بلوچ نے نیو ایم اے جناح روڈ پر ’’یکجہتی کشمیرریلی ‘‘سے صدارتی خطاب کرتے ہوئے کہاہے کہ پاکستان ایٹمی طاقت ، بہترین افرادی قوت اور وبھرپور وسائل سے مالا مال ہے ، حکومت وافواج پاکستان اورپالیسی ساز بھی کشمیر پر سودے بازی کے تاثر کو ختم کر کے ،بھارت کے خلاف واضح ،دو ٹوک اور جرات مندانہ حکمت عملی اپنائیں،5 فروری سے قبل وزیر اعظم پاکستان کو اسلام آباد میں تنازع کشمیر پر قومی کانفرنس منعقد کرنی چاہیئے تھی تاکہ قومی مؤقف کی ترجمانی ہوتی اور بھارت کو بھی پیغام جاتا،کشمیری ہمارے ہیں اور پاکستان کشمیریوں کا ہے ، کشمیر کا تنازع پیدا کرکے کروڑوں انسان کو معاشی ،سیاسی و جمہوری حقوق سے محروم کیا گیا۔
(جاری ہے)
بھارتی وزیر اعظم نریندر سنگھ مودی نے یک طرفہ طور پر اقوام متحدہ کی قراردادوں اور فیصلوں کو نظر انداز کرکے بھارتی آئین کے آرٹیکل 35-A اور 370 کو ختم کر کے کشمیر کوغصب کرنے کی کوشش کی۔ اس اقدام کے بعد مقبوضہ کشمیر میں موجود جماعتیں بھی جو دہلی کا ساتھ دے رہی تھی ان کے لیے بھی ممکن نہیں رہا کہ بھارت کے موقف کے ساتھ کھڑی رہیں ،بانی پاکستان قائد اعظم محمد علی جناح نے اعلان کیا تھا کہ کشمیر پاکستان کی شہ رگ اوراسرائیل یورپ کا ناجائز بچہ ہے۔
دنیا میں امن اسی وقت ہوگا جب تنازع کشمیر حل ہوگا اور فلسطین فلسطینیوں کو ملے گا۔ ہمارا ایمان اور یقین ہے کہ کشمیر پاکستان کا حصہ بنے گا اور انبیاء کی سرزمین فلسطین ضرور آزاد ہوگی ۔حکمرانوں کو متنبہ کرتے ہیں کہ امریکی صدر ڈونلڈ ٹرمپ کے اشاروں پر فلسطینیوں کی عظیم فتح اورکامیابی کو شکست میں بدلنے کا سوچا بھی گیا تو پوری ملت اسلامیہ کی مزاحمت کا سامنا کرنا پڑے گا۔
ریلی سے امیرجماعت اسلامی کراچی منعم ظفر خان ،سکریٹری کراچی توفیق الدین صدیقی ،نائب امیرکراچی و اپوزیشن لیڈر کے ایم سی سیف الدین ایڈوکیٹ،ڈپٹی اپوزیشن لیڈر کے ایم سی جنید مکاتی ،جماعت اسلامی کراچی منارٹی ونگ کے صدر یونس سوہن ایڈوکیٹ،ہندو برادری کے رہنما کشور کمار ودیگر نے بھی خطاب کیا۔ قبل ازیں ریلی کے شرکاء نے جیل چورنگی تا اسلامیہ کالج تک پیدل مارچ کیا ، مارچ کی قیادت مرکزی نائب امیرجماعت اسلامی پاکستان لیاقت بلوچ و امیر کراچی منعم ظفر خان نے کی ۔
شرکاء نے آزادی کشمیر ،بھارتی تسلط ،اقوام متحدہ و بڑی طاقتوں کے دوہرے معیارکے خلاف بینرز وپلے کارڈز اٹھائے ہوئے تھے اور کشمیر بنے گا پاکستان کے پرجوش نعرے لگاتے رہے ۔اس موقع پر فلسطین فاؤنڈیشن کے رہنما صابر ابو مریم ، جماعت اسلامی آزادجموں و کشمیر (سندھ )کے صدر سردار عبد الحمید ودیگر بھی موجود تھے ۔لیاقت بلوچ نے مزیدکہاکہ حکمرانوں کو عزت و وقار امریکی غلامی اور اغیار کی نوکری سے نہیں عالم اسلام کے اتحاد کی صورت میں ملے گی ۔
انفارمیشن ٹیکنالوجی کے میدان میں عالم اسلام کو متحد ہوناہوگا۔ ملک میں موجود سیاسی بحران ومعاشی استحکام کے لیے ضروری ہے کہ قومی قیادت امریکہ و اسٹیبلشمنٹ سے بھیک مانگنے کے بجائے غلطیوں کو تسلیم کرے اور کم سے کم ایجنڈے پر قومی اتفاق رائے اور استحکام پیدا کیا جائے۔ حکومت افغانستان سے تعلقات ٹھیک کرے،دونوں ممالک کو سوچنا چاہیے کہ پاکستان اور افغانستان کے تعلقات کی مضبوطی خطے کی ضرورت ہے۔
پاکستان ایران سے گیس پائپ لائن منصوبے کی تکمیل کو یقینی بنائے اور ایران سے بھی اپنے تعلقات میں پائیداری پیدا کرے۔ ترکی کے صدر رجب طیب اردگان کا دورہ پاکستان کا خیر مقدم کرتے ہیں۔ پاکستان اور ترکیہ کے تعلقات دنیا میں امن کا ذریعہ بنیں گے۔بنگلہ دیش سے تعلقات کی نئی راہوں سے دونوں ممالک کو استفادہ کرنے کی ضرورت ہے ۔انہوں نے مزیدکہاکہ ڈونلڈ ٹرمپ چاہتے ہیں کہ اہل غزہ مصر اوراردن میں منتقل ہو جائیںان کا کہنا ہے کہ مسلم ممالک کے حکمرانوں کو منالیں گے،ڈونلڈ ٹرمپ امریکہ کی اندرونی حالاتِ سے پریشان ہے۔
آج امریکہ دنیا کا سپر پاور ملک نہیں رہا،امریکہ یہ سمجھ لے کہ اسرائیل کی سرپرستی کرکے پوری دنیا میں نفرت کا شکارہورہا ہے۔ امریکہ اگر تمام یہودیوں کو فلسطین سے واپس بھیجے گا تب ہی امن نافذ ہوسکے گا۔15ماہ مسلسل اہل غزہ و فلسطین کی نسل کشی کی گئی، لوگ سمجھنے لگے کہ اسرائیل غزہ کو ہڑپ کرلے گالیکن اسرائیل حماس کے مجاہدین کے ساتھ مذاکرات کرنے پر مجبور ہوا اور تاریخ نے دیکھ لیا کہ اسرائیل کا تکبر خاک میں مل گیا اور غزہ کے عوام اور حماس کے مجاہدین سرخرو ہوگئے ہیں۔
منعم ظفر خان نے کہاکہ ہم حکمرانوں کو پیغام دینا چاہتے ہیں کہ کشمیر سے غداری پاکستان سے غداری ہے۔ ہمارے حکمران بھارت سے دوستی کی پینگیں بڑھاتے ہیں۔حکمران سن لیں کہ ان کو کشمیریوں کا مقدمہ لڑنا ہوگا جہاں جہاں سفارت خانے ہیں وہاں کشمیریوں کے لیے ڈیسک قائم کی جائے۔ آج پوری دنیا کو پیغام دیا جائے کہ امریکہ اور برطانیہ کے پیدا کردہ مسائل کے خلاف آواز بلند کی جائے۔
ہم پر عزم ہیں کہ کشمیر ایک دن ضرور آزاد ہوگا۔انہوں نے کہاکہ آج کراچی کے شہری 5 فروری کی مناسبت سے جمع ہیں اور اظہار کررہے ہیں کہ بھارتی ریاستی دہشت گردی کا خاتمہ ہونا چاہییے۔ عوام مطالبہ کررہے ہیں کہ بھارتی تسلط اور کشمیری مسلمانوں کی نسل کشی ختم ہونا چاہیے۔ کشمیر کے مسلمانوں نے تاریخ کے کسی بھی موڑ پر بھی کسی کے سامنے سر نہیں جھکایا ہے۔
انگریزوں نے 75 لاکھ روپے کے عوض کشمیر کا سودا کیا تب بھی کشمیریوں نے سر نہیں جھکایا۔ برصغیر پاک و ہند کی تقسیم کے موقع پر کشمیریوں نے پاکستان کے ساتھ الحاق کا اعلان کردیا۔ بھارت نے مقبوضہ کشمیر میں 8 لاکھ سے زائد فوجیوں کو تعینات کردیا۔ موجودہ آزاد کشمیر بھی قبائلیوں نے آزاد کروایا۔جنوری 1948 سے آج تک اقوام متحدہ اپنی قراردادوں پر عمل درآمد نہیں کرواسکا۔
ایک جانب مشرقی تیمور اور جنوبی سوڈان کا مسئلہ ہوتا ہے تو اقوام متحدہ آگے بڑھ کر مسئلہ حل کروا دیتا ہے۔ کشمیر اور فلسطین کے مسئلے پر اقوام متحدہ کوئی کردار ادا نہیں کررہا۔ سابق امیر جماعت اسلامی پاکستان قاضی حسین احمد مرحوم نے پوری دنیا میں بیداری پیدا کرنے کے لیے 5 فروری کا دن یکجہتی کشمیر کے لیے منایا۔ اہل کشمیر اور سید علی گیلانی کو سلام پیش کرتے ہیں جنہوں نے سید مودودی کے پیغام کے مطابق مزاحمت کا راستہ اختیار کیا۔
سید علی گیلانی ظلم و جبر کے ماحول میں نعرہ لگاتے تھے کہ ہم پاکستانی ہیں پاکستان ہمارا ہے۔ سید علی گیلانی 92 سال تک کشمیر کی آزادی کی تحریک چلاتے رہے۔5 اگست 2019 کو بھارت نے اقوام متحدہ کی تمام قراردادوں کو ملیا میٹ کردیااور کشمیر کی خصوصی حیثیت ختم کردی۔کشمیر اور فلسطین سے صبر و استقامت کا پیغام مل رہا ہے۔ صبر و استقامت کے پیغام کو بلند رکھنا ہے ۔
سیف الدین ایڈوکیٹ نے کہاکہ پوری دنیا میں سامراجی قوتوں نے ظلم وستم کا بازار گرم کیا ہوا ہے۔اسلامی ممالک کو تباہ کیا جارہا ہے۔ بد قسمتی سے ہمارے ملک میں بھی سامراجی قوتیں اپنا کام کررہی ہیں۔ سامراجی قوتیں جانتی ہیں کہ مسلمان ہی ایسی قوت ہے جو برائیوں کا خاتمہ کرنے کی صلاحیت رکھتی ہے۔جنید مکاتی نے کہاکہ فلسطین کے مسلمانوں نے ثابت کیا ہے کہ سپر پاور امریکہ، اسرائیل ایمان کو شکست نہیں دے سکتی۔
کشمیریوں کے دل پاکستان کے ساتھ دھڑکتے ہیں۔ بانی پاکستان قائد اعظم کے فرمان کے مطابق کشمیر پاکستان کی شہ رگ ہے اور کشمیر پاکستان کا حصہ بن کر رہے گا۔ یونس سوہن ایڈوکیٹ نے کہاکہ پوری دنیا میں اتنا ظلم کہیں بھی نہیں ہوتا جتنا فلسطین اور کشمیر میں ہورہا ہے۔ پاکستان ایسا ملک ہے کہ جس میں رہنے والی اقلیتیں آزادی سے زندگی گزار رہی ہیں۔
اقلیتی برادری مطالبہ کرتی ہے کہ کشمیریوں کو ان کا حق خودارادیت دیا جائے۔کشور کمار نے کہاکہ کشمیر کے مسلمان بھائیوں کے ساتھ عرصہ دراز سے ظلم کیا جارہا ہے۔ پاکستان میں مقیم ہندو برادری بھی کشمیریوں کے ساتھ ہے۔ اقوام متحدہ کی قرارداد کے مطابق کشمیریوں کا فیصلہ نہیں کیا جارہا ہے۔بھارتی فوج کشمیر میں طاقت کے زور سے زبردستی تسلط قائم کرنا چاہتی ہے۔ ہندو برادری جماعت اسلامی کے موقف کے ساتھ ہے اور ہمارا مطالبہ ہے کہ کشمیر کو اقوام متحدہ کی قرارداد کے مطابق حق دیا جائے۔
