بدقسمتی ہے کہ ترقی کرتا ملک پٹڑی سے اتار دیا گیا، سیاست میں گند ڈال کر اسے تباہ کیا گیا‘نواز شریف

لاہور (اُردو پوائنٹ اخبارتازہ ترین - این این آئی۔ 17 فروری2025ء) پاکستان مسلم لیگ (ن) کے صدر محمد نواز شریف نے کہا ہے کہ بدقسمتی ہے کہ ترقی کرتا ملک پٹڑی سے اتار دیا گیا، سیاست میں گند ڈال کر اسے تباہ کیا گیا ، بد تہذیبی، بدتمیزی ،بغض اور انتقام کوسیاست بنادیا گیا، معیشت اور اقدار تباہ کیں ، جمہوریت کی پیٹھ میں خنجر گھونپا گیا،پاکستان ڈیفالٹ کے منہ سے واپس آیا ہے، ہمارا بیانیہ ملک کی ترقی اور عوام کو مہنگائی سے نجات دلاکر خوش حال بنانا ہے۔

ان خیالات کا اظہار انہوں نے وزیراعلیٰ پنجاب مریم نوازشریف کے ہمراہ پنجاب اسمبلی کے ارکان سے ملاقات کے دوران کیا ۔ ساہیوال، خانیوال، ملتان ، لودھراں، وہاڑی اور بہاول نگر ڈویژن سے تعلق رکھنے والے ارکان پنجاب اسمبلی ملاقات کرنے والوں میں شامل تھے۔

(جاری ہے)

نواز شریف نے کہا کہ بدقسمتی ہے کہ ترقی کرتا ملک پٹڑی سے اتار دیا گیا، سیاست میں گند ڈال کر اسے تباہ کیا گیا ، بد تہذیبی، بدتمیزی ،بغض اور انتقام کوسیاست بنادیا گیا، معیشت اور اقدار تباہ کیں ، جمہوریت کی پیٹھ میں خنجر گھونپا گیا۔

انہوں نے کہا کہ پاکستان ڈیفالٹ کے منہ سے واپس آیا ہے، شہبازشریف کی محنت سے معاشی استحکام واپس آیا ہے، پالیسیوں کے تسلسل سے معاشی ترقی یقینی ہوگی۔کرپشن، معاشی تباہی، مہنگائی اور بدتمیزی تبدیلی کی سوغاتیں تھیں، ہم نے آئی ایم ایف کو خدا حافظ کہہ دیا تھا۔ ہمارا بیانیہ ملک کی ترقی اور عوام کو مہنگائی سے نجات دلاکر خوش حال بنانا ہے، جو وعدے کئے تھے اللہ تعالی کے فضل وکرم سے وہ آج عوام کو پورے ہوتے نظر آرہے ہیں ۔

ارکان اسمبلی نے گفتگو کرتے ہوئے کہا کہ نوازشریف اور شہبازشریف وعدوں کی تکمیل، وطن سے وفا کے نام ہیں ، نوازشریف اور شہبازشریف نے ذاتی تکالیف بھلا کر ہمیشہ پاکستان اور عوام کی تکلیفیں دور کی ہیں، پاکستان کے چپے چپے پر نوازشریف اور شہبازشریف کی ترقی کے نشان موجود ہیں ۔ارکان اسمبلی نے کہا کہ وزیراعظم شہباز شریف نے پاکستان کے معاشی استحکام کے لیے ’’شہباز سپیڈ‘‘سے کام کیا ہے، وزیراعظم شہباز شریف کی ذاتی کوششوں سے آئی ایم ایف پروگرام بحال ہوا اور ملک ڈیفالٹ سے بچ گیا، مریم نوازنے نوازشریف اور شہبازشریف کے دور کی یاد تازہ کردی ہے ، ہمیں اپنی وزیر اعلی پر فخر ہے ۔

پہلی خاتون وزیراعلی کے طورپر مریم نوازشریف کی عوامی خدمت کا ہر طرف اعتراف ہو رہا ہے ، بے مثال سیاسی جدوجہد کے بعد عوامی خدمت میں بھی مریم نوازشریف نے اپنی صلاحیتوں کا اعتراف کرایا ہے، مریم نوازشریف جیسی عوامی خدمت کا تقاضا آج ہر صوبے میں ہورہا ہے۔ سیاسی وابستگی سے بالا تر ہوکر پورے پنجاب کی مساوی خدمت جاری ہے۔ارکان پنجاب اسمبلی نے چولستان میں گرین پاکستان منصوبے کے انقلابی پروگرام کے آغاز کا خیرمقدم کرتے ہوئے کہا کہ کسانوں کو جدید مشینری ، وسائل اور زرعی مالز کے ذریعے ایک چھت تلے تمام سہولیات کی فراہمی سے زرعی انقلاب برپا ہورہا ہے۔

اس موقع پر وزیر اعلیٰ پنجاب مریم نواز شریف نے کہا کہ عوام کی خدمت کا مشن چیلنج سمجھ کر سنبھالا ، قیادت اور جماعت کا شکریہ مجھے یہ ذمہ داری دی۔اجلاس میں عوامی فلاح کے منصوبوں اور مستقبل کی سیاسی حکمت عملی پر مشاورت بھی ہوئی۔ پارٹی کے سینئر رہنما سینیٹر پرویز رشید، رانا ثنا اللہ، پنجاب کی سینئر وزیر مریم اورنگزیب اور راشد نصر اللہ بھی اجلاس میں موجود تھے، پیر ولایت شاہ ،ملک قاسم ندیم ،محمد ارشد ملک، نوید اسلم خان لودھی، رانا ریاض احمد، محمد اکبر حیات ہراج، اسامہ فضل، عامر حیات حراج، بابر حسین عابد ،چوہدری ضیاالرحمن، رانا محمد سلیم اور محمد اصغر حیات حراج ملاقات کرنے والوں میں شامل تھے ۔

محمد سلمان نعیم ، محمد نازک کریم ،ملک لعل محمد، شازیہ حیات محمد زبیر خان ،محمد یوسف، ملک نوشیر خان انجم لنگڑیال ،محمد ثاقب خورشید ،محمد نعیم اختر خان ،میاں فدا حسین وٹو ،محمد سہیل خان زاہد، چوہدری کاشف پنسوتا اور چوہدری زاہد اکرم بھی ملاقات میں شریک تھے۔