Live Updates

پاک بھارت کشیدگی کے دوران عمران خان سے غیرسیاسی شخصیت کی ملاقات اور بریفنگ کا انکشاف

عمران خان نے کہا اس وقت ہم آپ اور قوم کے ساتھ ہیں، آگے سے کہا گیا تھینک یو، ہمیں آپ سے یہی توقع تھی؛ نجم سیٹھی کا دعویٰ، تحریک انصاف کیلئے اچھی خبریں آنے کی بھی نوید سنادی

ساجد علی ہفتہ 17 مئی 2025 11:47

پاک بھارت کشیدگی کے دوران عمران خان سے غیرسیاسی شخصیت کی ملاقات اور ..

اسلام آباد ( اُردو پوائنٹ اخبارتازہ ترین۔ 17 مئی2025ء ) پاکستان اور بھارت کے درمیان پیدا ہونے والی کشیدگی کے دوران سابق وزیراعظم عمران خان سے جیل میں ایک اہم غیرسیاسی شخصیت کی ملاقات اور بریفنگ کا انکشاف سامنے آگیا۔ سماء ٹی وی کے پروگرام میں سینئر صحافی نجم سیٹھی کا دعویٰ کیا کہ 6 مئی کو عمران خان سے ایک غیر سیاسی شخصیت نے اڈیالہ میں ملاقات کرکے بھارت کے ساتھ ہونے والی کشیدگی پر بریفنگ دی، انہیں بالکل ایسے بریفنگ دی گئی جیسے وزیر اعظم کو بریفنگ دی جاتی ہے، جس میں عمران خان کو اعتماد میں لیا گیا اور انہیں بتایا گیا کہ بھارت پاکستان پر یہ الزامات لگا رہا ہے۔

انہوں نے بتایا کہ عمران خان کو اڈیالہ جا کر کہا گیا کہ ملک کی خاطر آپ اور آپ کی یوتھ کی ضرورت ہے، پی ٹی آئی کی یوتھ فوج کو کافی عرصے سےاٹیک کر رہی ہے وہ اب نہ کرے، جس کے جواب میں عمران خان نے کہا کہ آپ کے ساتھ اختلافات سیکنڈری ہیں، ہم آپ کے اور قوم کے ساتھ ہیں، ملک کی خاطر میں اپنی اندرونی لڑائی کو روک دیتا ہوں اور مودی کے خلاف آپ کے ساتھ ہوں، جس پر کہا گیا کہ آپ کا بہت شکریہ، ہمیں آپ سے یہی توقع تھی۔

(جاری ہے)

نجم سیٹھی کی جانب سے دعویٰ کیا گیا ہے کہ عمران خان سے بات چیت شروع ہوگئی ہے، تحریک انصاف کیلئے اچھی خبریں آئیں گی، عید سے پہلے بڑے رہنماء رہا ہوں گے جب کہ عمران خان نے کہا کہ میں نے ملاقات کرنے والی شخصیت سے کہا کہ میں نے عدالتوں کے ذریعے رہا ہونا ہے اور جون تک عمران خان کی رہائی کا امکان ہے، عمران خان کی سزا معطلی کا کیس لگنا ایک اہم پیشرفت ہے۔

سینئر صحافی نے یہ بھی کہا ہے کہ 6 مئی کو عمران خان کے ساتھ جیل میں ہونے والی ملاقات کے بعد ٹویٹر کھولا گیا، ڈی جی آئی ایس پی آر نے پی ٹی آئی سوشل میڈیا والوں کو سائبر وائیررز قرار دیا، پنجاب میں پاکستان زندہ بعد ریلیز نکالنے والوں کو چوبیس گھنٹوں کے اندر اندر رہا کردیا گیا، رانا ثناء اللہ اور عطا تارڑ نے پی ٹی آئی کی تعریف کی، الیکشن کمیشن کو گرین سگنل دیا گیا ہے کہ ثانیہ نشتر کی خالی کردہ سیٹ پر سینٹ کا الیکشن کروا دیں، اس ساری پیشرفت کے نتیجے میں مئی کے اختتام یا جون میں عمران خان کی رہائی ہو سکتی ہے۔