Live Updates

پاکستان خطے میں آگے بڑھنے ،پائیدار قیام امن اور مسائل کے حل کیلئے جامع مذاکرات کا حامی ہے، بلاول بھٹو زرداری

جمعرات 12 جون 2025 21:16

برسلز (اُردو پوائنٹ اخبارتازہ ترین - اے پی پی۔ 12 جون2025ء) سابق وزیر خارجہ و چیئرمین پاکستان پیپلز پارٹی بلاول بھٹو زرداری کی قیادت میں پارلیمانی وفد نےپرامن بقائے باہمی کے لئے پاکستان کے پختہ عزم کا اعادہ کرتے ہوئے اس بات پر زور دیا کہ ہے پاکستان خطے میں آگے بڑھنے ،پائیدار قیام امن اور مسائل کے حل کیلئے جامع مذاکرات کا حامی ہے۔جمعرات کو سفارتخانہ سے جاری کردہ بیان کے مطابق سابق وزیر خارجہ و چئیرمین پاکستان پیپلز پارٹی بلاول بھٹو زرداری کی قیادت میں اعلیٰ سطحی پارلیمانی وفد نے بیلجیئم فارن افیئر کمیٹی کی وائس چیئر ، مسز کیٹلین ڈیپورٹر اور چیئر آف پاکستان بیلجیئم پارلیمنٹری فرینڈشپ گروپ فرانکیم بیلجینڈ سمیت بیلجیئم کی سینیٹ اور ایوان نمائندگان کے ممبران سے ملاقات کی۔

(جاری ہے)

وفد نے دوران ملاقات جنوبی ایشیا میں امن و سلامتی کی صورتحال پر مفصل بریفنگ دی اور پرامن بقائے باہمی کے لیے پاکستان کے پختہ عزم کا اعادہ کیا۔ پارلیمانی وفد نے اس بات پر زور دیا کہ پاکستان خطے میں آگے بڑھنے ،پائیدار قیام امن اور مسائل کے حل کیلئے جامع مذاکرات کا حامی ہے۔دونوں اطراف نے پاکستان اور بیلجیئم تعلقات کو مزید وسعت دینے کے حوالے سے پارلیمانی وفود کے تبادلوں اور باہمی دلچسپی کے شعبوں میں دو طرفہ تعاون بڑھانے کے عزم کا اظہار کیا ۔

وفاقی وزیر برائے ماحولیاتی تبدیلی و ماحولیاتی ہم آہنگی ڈاکٹر مصدق مسعود ملک، سینیٹ کی قائمہ کمیٹی برائے ماحولیاتی تبدیلی و ماحولیاتی ہم آہنگی کی چیئرپرسن اور سابق وزیر اطلاعات و ماحولیاتی تبدیلی سینیٹر شیری رحمان، قومی اسمبلی کی قائمہ کمیٹی برائے امور خارجہ کی چیئرپرسن اور سابق وزیر خارجہ حنا ربانی کھر، سابق وزیر تجارت، دفاع اور امور خارجہ انجینئر خرم دستگیر خان، ایم کیو ایم کے سینیٹ میں پارلیمانی لیڈر اور سابق وزیر برائے بحری امور سینیٹر سید فیصل علی سبزواری بھی اس ملاقات میں موجود تھے۔