ن لیگ کی ٹکٹ اب ’’ ہاٹ کیک ‘‘ بن چکی ہے، ہر نشست پر الیکشن کیلئے15، 15 امیدوار آگئے ہیں

لاہور (اردوپوائنٹ اخبارتازہ ترین۔ انٹرنیشنل پریس ایجنسی۔ 09 اگست 2025 ) وزیر اطلاعات و ثقافت پنجاب عظمیٰ بخاری نے کہا ہے کہ مسلم لیگ (ن) کے پارلیمانی بورڈ کے اجلاس میں ضمنی انتخابات اور تنظیمی معاملات پر تفصیلی بات چیت ہوئی ہے۔ انہوں نے کہا کہ ن لیگ کی ٹکٹ اب '' ہاٹ کیک '' بن چکی ہے، ہر نشست پر 15، 15 امیدوار دلچسپی کا اظہار کر رہے ہیں۔ عظمیٰ بخاری نے کہا کہ ضمنی انتخابات میں کون ٹکٹ کا حقدار ہے، اس کا حتمی فیصلہ قائد میاں نواز شریف کریں گے۔

پارلیمانی بورڈ صرف موزوں امیدواروں کی سفارش کرے گا۔ انہوں نے بتایا کہ پارٹی نے ضمنی انتخابات لڑنے کے خواہش مند افراد سے تجاویز بھی طلب کی ہیں اور بہت جلد پارلیمانی بورڈ کی اگلی میٹنگ طلب کی جائے گی۔ ان کا مزید کہنا تھاکہ پی ٹی آئی ضمنی انتخابات میں میدان سے بھاگ چکی ہے، انہیں ن لیگ کے مقابلے میں کھڑا ہونے کے لیے امیدوار تک دستیاب نہیں۔

(جاری ہے)

انہوں نے مزید کہا کہ ن لیگ پوری تیاری کے ساتھ میدان میں موجود ہے جبکہ مخالفین کی صفوں میں انتشار اور مایوسی ہے۔ مزید برآں پاکستان مسلم لیگ (ن) پنجاب کی تنظیم کا اہم اجلاس ماڈل ٹاؤن میں صدر پنجاب رانا ثناء اللہ کی زیر صدارت منعقد ہوا، جس میں عظمی بخاری، پرویز رشید، انوشے رحمان، سعود مجید، سیف اللہ کھوکھر,ذیشان رفیق، نوشین افتخار رانا ارشد، محسن رانجھا، تمام ڈویژنل کوآرڈینیٹرز اور تنظیمی عہدیداروں نے شرکت کی۔

اجلاس میں آئندہ ضمنی اور متوقع بلدیاتی انتخابات کے سلسلے میں حکمتِ عملی اور تیاریوں پر مشاورت کی گئی۔ رانا ثناء اللہ نے اجلاس سے خطاب کرتے ہوئے کہا کہ مسلم لیگ (ن) پنجاب کی تنظیم کو ہدایت کی گئی ہے کہ وہ فوری طور پر تنظیمی ڈھانچے کو مکمل کرے اور ہر سطح پر انتخابی تیاریوں کو حتمی شکل دے۔ اجلاس میں وزیراعلیٰ پنجاب مریم نواز کی کارکردگی پر مکمل اطمینان کا اظہار کیا گیا۔

رانا ثناء اللہ نے کہا کہ مریم نواز کی عوام دوست پالیسیوں نے پارٹی کی مقبولیت میں نمایاں اضافہ کیا ہے، پنجاب حکومت کے تمام اقدامات براہ راست عام آدمی کی فلاح سے متعلق ہیں۔ انہوں نے کہا کہ دوسرے صوبے بھی مریم نواز کی کارکردگی کے معترف ہیں۔ رانا ثناء اللہ نے وزیراعظم شہباز شریف کی کوششوں کو سراہتے ہوئے کہا کہ وزیراعظم دن رات ملکی وقار کی بحالی اور معیشت کے استحکام کیلئے سرگرم عمل ہیں، جبکہ پاکستان کی خارجہ پالیسی بھی عالمی سطح پر کامیابیوں سے ہمکنار ہو رہی ہے۔

صدر مسلم لیگ (ن) پنجاب نے پاکستان کی حالیہ سفارتی فتح کو '' اللہ کی مدد سے حاصل ہونے والی بڑی کامیابی'' قرار دیا اور کہا کہ پاکستان کی اس تاریخی کامیابی کی گونج پوری دنیا میں سنائی دے رہی ہے۔ رانا ثناء اللہ نے کہا کہ میاں نوازشریف کی قیادت میں مسلم لیگ (ن) ایک بار پھر ملک کو بحرانوں سے نکال رہی ہے، جبکہ وفاق اور پنجاب کی حکومتیں ان کی سرپرستی میں عوام کی خدمت میں مصروف ہیں۔ اجلاس میں ضمنی انتخابات سے متعلق مشاورت کی گئی اور ضلعی عہدیداروں کو انتخابی تیاریوں کی ہدایات جاری کی گئیں۔ صدر پنجاب نے کہا کہ پارٹی جلد قیادت سے مشاورت کے بعد ضمنی انتخابات کے موزوں امیدواروں کا اعلان کرے گی۔