انسٹی ٹیوٹ آف اسٹریٹیجک اسٹڈیز اسلام آباد میں "مودی 3.0 کا ایک سال: بھارت کی خارجہ پالیسی کی عزائم اور داخلی حکمرانی" کے عنوان سے گول میز کانفرنس کا انعقاد

اسلام آباد (اُردو پوائنٹ اخبارتازہ ترین - اے پی پی۔ 11 اگست2025ء) انسٹی ٹیوٹ آف اسٹریٹیجک اسٹڈیز اسلام آباد (آئی ایس ایس آئی) میں "مودی 3.0 کا ایک سال: بھارت کی خارجہ پالیسی کی عزائم اور داخلی حکمرانی" کے عنوان سے گول میز کانفرنس کا انعقاد کیا اور ماہرین نے زور دیا کہ پاکستان کو سندھ طاس معاہدے سے متعلق بھارت کے اقدامات کے جواب میں بین الاقوامی قانون کے تحت اپنے حقوق کا دعویٰ کرنا چاہیے- پیر کو انسٹی ٹیوٹ آف اسٹریٹیجک اسٹڈیز اسلام آباد (آئی ایس ایس) کے انڈیا اسٹڈی سنٹر نے بی جے پی حکومت کی تیسری مدت کے پہلے سال کی کارکردگی کا جائزہ لینے کے لیے ایک گول میز کانفرنس کا اہتمام کیا۔

اس کانفرنس میں بھارت کی سماجی-سیاسی، معاشی، فوجی اور خارجہ پالیسی کے محاذوں پر "مودی 3.0" کی کارکردگی پر تبادلہ خیال کیا گیا۔

(جاری ہے)

کانفرنس میں سینئر سفارتکاروں، ماہرین اقتصادیات اور علاقائی تجزیہ کاروں نے شرکت کی۔ آئی ایس ایس آئی کے ڈائریکٹر جنرل سفیر سہیل محمود نے خیرمقدم کیا جبکہ ڈاکٹر راشد ولی جنجوعہ نے مودی 3.0 کے اندرونی سیاسی پہلوؤں پر روشنی ڈالی۔

سفیر رفعت مسعود نے خارجہ پالیسی کے پہلوؤں پر روشنی ڈالی۔ مباحثے میں یہ بات سامنے آئی کہ 2025 کے آغاز سے بی جے پی کو اندرونی سیاسی میدان میں نقصان اٹھانا پڑا ہے، جبکہ بھارت نے بین الاقوامی سطح پر ناکامی ہوئی اور ساکھ کافی حد تک کھو دی ہے۔ بھارتی معاشرے میں سیاسی، معاشی، نسلی اور لسانی تقسیم گہری ہوئی ہے۔ وقف بل، ہجرت کے قوانین اور بہار جیسی ریاستوں میں ووٹر لسٹوں کی نظرثانی سے مسلمانوں کے لیے جگہ مزید سکڑ رہی ہے۔

مودی دور میں منصوبہ بندی کمیشن، الیکشن کمیشن، عدلیہ اور فوج جیسے اہم اداروں کی بد نیتی نمایاں رہی ہے۔ ماہرین نے آر ایس ایس اور بی جے پی کے درمیان اختلافات کی بھی نشاندہی کی جن میں پارٹی صدر کی تقرری، وزیراعظم مودی کی 75 سال کی عمر تک پہنچنے اور بی جے پی کے کچھ حلقوں کا ناگپور سے آزادی کی خواہش شامل ہیں۔ مئی 2025 میں بھارت- پاکستان تنازعے کے بعد مودی کی مقبولیت میں کمی آئی ہے۔

شرکاء نے زور دیا کہ بھارت کی پالیسیوں کو سمجھنے کے لیے اس کے "ذہنیت" کو سمجھنا ضروری ہے۔ بی جے پی قیادت آر ایس ایس کے "اکھنڈ بھارت" کے نظریے پر یقین رکھتی ہے، اور مودی کی پاکستان کے تئیں نفرت اور توسیع پسندانہ عزائم اسی ذہنیت کی عکاسی کرتے ہیں۔ بھارت میں انتخابی مہموں کا مرکز پاکستان مخالف بیانات ہوتے ہیں، جو قوم پرستی بڑھانے اور ووٹ حاصل کرنے کے لیے استعمال ہوتے ہیں- یہ بھی واضح کیا گیا کہ بھارت اور امریکہ کے درمیان کشیدگی کے باوجود تعلقات برقرار رہیں گے، کیونکہ یہ تعلقات ادارہ جاتی ہیں۔

تاہم، بائیڈن انتظامیہ کے برعکس، صدر ٹرمپ نے بھارت اور پاکستان کے درمیان توازن برقرار رکھنے کا فیصلہ کیا ہے۔ کشمیر اور آبی معاہدے پر تشویش کرتے ہوئے شرکاء نے خبردار کیا کہ مودی کی حکومت میں کشمیر کے مذہبی اور ثقافتی تشخص کو خطرہ لاحق ہے۔ پاکستان کو جموں و کشمیر کے تنازعے اور سندھ طاس معاہدے (IWT) کو معطل کرنے کے بھارت کے فیصلے پر بین الاقوامی فورمز پر آواز بلند کرنی چاہیے۔ آئندہ اقوام متحدہ کی جنرل اسمبلی کا اجلاس ان مسائل کو اٹھانے کا اہم موقع ہوگا۔ ساتھ ہی، پاکستان کو اپنے آبی ذخائر بڑھانے اور پانی کے انتظام کو بہتر بنانے پر فوری توجہ دینی چاہیے۔ کانفرنس کا اختتام آئی ایس ایس آئی کے بورڈ آف گورنرز کے چیئرمین سفیر خالد محمود کے شکریہ کلمات پر ہوا۔