Live Updates

پانی کے نئے ذخائر کی تعمیر وقت کی ضرورت، کئی چھوٹے ڈیم بنانے کی صلاحیت موجود ہے، وزیراعظم

جمعرات 28 اگست 2025 16:21

نارووال(اُردو پوائنٹ اخبارتازہ ترین - این این آئی۔ 28 اگست2025ء)وزیراعظم شہباز شریف نے کہا ہے کہ آئندہ آنے والے سالوں میں ماحولیاتی تبدیلی کے چیلنج سے نمٹنا ہے، پانی کے نئے ذخائر کی تعمیر وقت کی ضرورت ہے۔ وزیر اعلیٰ پنجاب مریم نواز، وفاقی و صوبائی وزراء اور این ڈی ایم اے حکام سے خطاب کرتے ہوئے وزیراعظم شہباز شریف کا کہنا تھا بارشوں سے گلگت بلتستان اور کے پی میں بہت جانی و مالی نقصان ہوا جبکہ پنجاب کیمیدانوں سے شدید طغیانی گزر رہی ہے، سیلاب سے انسانی جانوں کے ضیاع پر ہم سب کو افسوس ہے۔

انہوںنے کہاکہ پنجاب حکومت، ریسکیو، پولیس، محکمہ ایری گیشن دن رات کام کر رہے ہیں جس پر انہیں دل کی گہرائیوں سے مبارکباد پیش کرتا ہوں، ٹیم ورک کی وجہ سے نقصان کو کم سے کم کیا جا رہا ہے۔

(جاری ہے)

وزیراعظم شہباز شریف نے کہاکہ 2022 میں اس طرح کی آفت آئی اور تباہی ہوئی، 2022 کی تباہی کا مرکزی نشانہ سندھ اور بلوچستان تھا، لاکھوں ایکڑ پر کاشت تیار فصلیں تباہ ہو گئی تھیں۔

انہوں نے کہا کہ پاکستان ان ممالک میں شامل ہے جو ماحولیاتی تبدیلی سے زیادہ متاثر ہو رہے ہیں، آئندہ آنے والے سالوں میں ماحولیاتی تبدیلی کے چیلنج سے نمٹنا ہے۔شہباز شریف نے کہاکہ پانی کے نئے ذخائر کی تعمیر وقت کی ضرورت ہے، پانی ذخیرہ کرنے کے لیے اپنے وسائل کو بروئے کار لانا ہو گا، ملک میں پانی ذخیرہ کرنے کی گنجائش میں اضافہ کرنا ہوگا، ہمارے پاس کئی نئے چھوٹے ڈیمز تعمیر کرنے کی صلاحیت موجود ہے۔