وزیراعظم پاکستان نے اقوام متحدہ کی جنرل اسمبلی کے 80ویں اجلاس سے ایک تاریخی، جرات مندانہ اور مدبرانہ خطاب کیا ،سردار ایاز صادق

اسلام آباد(اُردو پوائنٹ اخبارتازہ ترین - این این آئی۔ 26 ستمبر2025ء)سپیکر قومی اسمبلی سردار ایاز صادق نے وزیراعظم پاکستان میاں محمد شہباز شریف کے اقوام متحدہ کی جنرل اسمبلی کے 80ویں اجلاس سے خطاب کو ایک تاریخی، جرات مندانہ اور مدبرانہ خطاب قرار دیا ہے ۔ جمعہ کو اپنے ایک بیان میں انہوں نے کہا کہ وزیراعظم نے خطاب کا آغاز قرآنی آیات کی تلاوت سے کر کے دنیا کو امن، بھائی چارے اور بین المذاہب ہم آہنگی کا پیغام دیا۔

انہوں نے امتِ مسلمہ کے جذبات اور امنگوں کی بھرپور ترجمانی کرتے ہوئے عالمی برادری کو موجودہ چیلنجز پر توجہ دینے کی دعوت دی۔سپیکر قومی اسمبلی نے کہا کہ وزیراعظم نے اپنے خطاب میں فلسطین کے مسئلے پر پاکستان کے دیرینہ اور اصولی مقف کو جرات مندی سے اجاگر کیا۔

(جاری ہے)

انہوں نے اسرائیلی جارحیت اور معصوم جانوں کے قتل عام کی مذمت کی اور عالمی ضمیر کو جھنجھوڑتے ہوئے عالمی برادری سے فوری اور مثر اقدامات اٹھانے کا مطالبہ کیا۔

انہوں نے مزید کہا کہ وزیراعظم نے قطر پر اسرائیلی جارحیت کی بھی شدید مذمت کی اور واضح کیا کہ خطے میں امن کے قیام کے لیے اسرائیلی مظالم کا خاتمہ ناگزیر ہے۔ سپیکر سردار ایاز صادق نے کہا کہ وزیراعظم نے بھارت کی جانب سے پاکستان پر حملے اور معصوم بچوں کی شہادت کے واقعے کو دنیا کے سامنے پیش کیا اور بھارتی پروپیگنڈے، خصوصا پہلگام واقعے سے متعلق جھوٹے دعوں کو بے نقاب کیا۔

انہوں نے مقبوضہ جموں و کشمیر میں بھارتی ریاستی دہشتگردی اور انسانی حقوق کی سنگین خلاف ورزیوں کو اجاگر کیا۔سپیکر سردار ایاز صادق نے کہا کہ وزیراعظم نے آپریشن بنیان المرصوص کی کامیابی اور پاکستان کی مسلح افواج کی پیشہ وارانہ صلاحیتوں کو دنیا کے سامنے پیش کرتے ہوئے باور کرایا کہ پاکستان ایک خودمختار ریاست ہے جو ہر قسم کی جارحیت اور دہشتگردی کی شدید مذمت کرتا ہے اور اپنے دفاع کی بھرپور صلاحیت رکھتا ہے۔

انہوں نے کہا کہ وزیراعظم نے اپنے خطاب میں امن و ترقی کے حصول کو تنازعات کے منصفانہ حل کے ساتھ مشروط قرار دیا اور بتایا کہ پاکستان نے دہشتگردی کے خلاف جنگ میں 90 ہزار سے زائد قیمتی جانوں کی قربانیاں دی ہیں اور بڑے پیمانے پر معاشی نقصانات برداشت کیے ہیں۔انہوں نے کہا کہ وزیراعظم نے افغان سرزمین سے پاکستان میں ہونے والی دہشتگردی پر عالمی برادری کو آگاہ کیا اور پاکستان کے غیر متزلزل عزم کا اعادہ کیا کہ دہشتگردی کے خاتمے تک دہشتگردی کے خلاف جنگ جاری رہے گی۔

سپیکر سردار ایاز صادق نے کہا کہ وزیراعظم نے عالمی برادری کو موسمیاتی تبدیلی کے تباہ کن اثرات، خصوصا پاکستان میں آنے والے ہولناک سیلاب اور اس کے نتیجے میں ہونے والی تباہ کاریوں سے آگاہ کیا اور ماحولیاتی انصاف اور عالمی تعاون کی ضرورت پر زور دیا۔انہوں نے کہا کہ وزیراعظم نے اپنی تقریر میں ملکی معیشت میں بہتری اور ترقی کے اہداف کے حصول کیلئے حکومت کے لائحہ عمل کو بھی پیش کیا جو ایک پرعزم، باشعور اور وژنری قیادت کا مظہر ہے۔انہوں نے کہا کہ وزیراعظم کا خطاب درحقیقت پاکستان کے عوام، امت مسلمہ اور عالمی امن کے لیے ایک جامع اور جراتمندانہ پیغام تھا جو تاریخ میں یاد رکھا جائے گا۔