میں اور فیلڈ مارشل سید عاصم منیر ہر معاملے پر مشاورت کرتے ہیں‘ الحمدُللہ ہم ایک پیج پر ہیں، وزیراعظم

فیلڈ مارشل کی قیادت میں معرکہ حق میں ہم نے بھارت کو شکست فاش دی، پاک افواج نے بھارت کو جوسبق سکھایا وہ ہمیشہ یاد رکھےگا، جنگ کے دوران قوم بہادر مسلح افواج کے ساتھ کھڑی تھی؛ شہبازشریف کی لندن میں گفتگو

ساجد علی پیر 29 ستمبر 2025 11:52

میں اور فیلڈ مارشل سید عاصم منیر ہر معاملے پر مشاورت کرتے ہیں‘ الحمدُللہ ..

لندن ( اُردو پوائنٹ اخبارتازہ ترین۔ 29 ستمبر2025ء ) وزیراعظم شہبازشریف کا کہنا ہے کہا میں اور فیلڈ مارشل سید عاصم منیر ہر معاملے پر مشاورت کرتے ہیں، الحمدُللہ ہم ایک پیج پر ہیں، پاکستان خارجی محاذ، عسکری اور معاشی میدان میں آگے بڑھ رہا ہے۔ لندن میں صحافیوں سے گفتگو کرتے ہوئے انہوں نے کہا کہ فیلڈ مارشل کی قیادت میں معرکہ حق میں ہم نے بھارت کو شکست فاش دی، پاک افواج نے بھارت کو جوسبق سکھایا وہ ہمیشہ یاد رکھے گا، جنگ کے دوران قوم بہادر مسلح افواج کے ساتھ کھڑی تھی، خارجی ہاتھ پاکستان کو پھلتا پھولتا نہیں دیکھنا چاہتے، دہشت گردی کا چیلنج دوبارہ سر اٹھا رہا ہے جس کا مکمل صفایا کیا جائے گا۔

وزیراعظم کہتے ہیں کہ پاکستان کی سیاسی وعسکری قیادت خارجہ پالیسی سمیت تمام اہم معاملات پر ایک پیج پر ہے، میں اور فیلڈ مارشل ہر قومی مسئلے پر مشاورت کرتے ہیں، اقتصادی صورتحال کے حوالے سے بھی باہمی مشاورت کی جاتی ہے، دعا ہے یہ ہم آہنگی جاری رہے تاکہ ماضی کے نقصانات کا ازالہ ہوسکے، پاکستان اور امریکہ کے تعلقات میں بہتری آئی ہے، امریکی صدر ڈونلڈ ٹرمپ سے واشنگٹن میں ملاقات انتہائی مفید رہی،اچھے ماحول میں ہونے والی اس میٹنگ سے پاکستان اور امریکہ کے تعلقات میں مزید مضبوطی آئے گی۔

(جاری ہے)

انہوں نے کہا کہ نیویارک اورواشنگٹن کا دورہ بہت کامیاب اورمفید رہا، اقوام متحدہ کی عمارت میں غزہ کی صورتحال پر اجلاس خوش آئند پیشرفت ہے، قطر، متحدہ عرب امارات، سعودی عرب، اردن اورمصر بھی اہم اجلاس میں شریک ہوئے، صدر ٹرمپ نے غزہ پر اجلاس کی صدارت کی جس میں پاکستان کو خصوصی طور پر مدعو کیا گیا، غزہ سے متعلق اجلاس میں حوصلہ افزاء بات چیت ہوئی، یقین کامل ہے غزہ پر حالیہ اجلاس کا مثبت نتیجہ بہت جلد سامنے آئے گا۔