ایل اے گیارہ میں پریذائیڈنگ افسران پر دبائو ڈال کر زبردستی ٹھپے لگوائے گئے اور بیلٹ باکسز بھرے گئے ،پیپلز پارٹی کا الزام

میرپور (اُردو پوائنٹ اخبارتازہ ترین - این این آئی۔ 28 جولائی2026ء) پاکستان پیپلز پارٹی نے الزام عائد کیا ہے کہ ایل اے گیارہ میں پریذائیڈنگ افسران پر دبائو ڈال کر زبردستی ٹھپے لگوائے گئے اور بیلٹ باکسز بھرے گئے ،الیکشن والے دن ہمارے کارکن مختار کو شہید کر دیا گیا اور 3 افراد زخمی ہوئے، الٹا ہمارے امیدوار کے خلاف مقدمہ درج کرلیا گیا۔ان خیالات کا اظہار سابق وزیر اعظم اور رہنما پاکستان پیپلز پارٹی راجہ پرویز اشرف، صدر پی پی پی آزاد جموں کشمیر چوہدری یاسین اور پیپلز پارٹی کے امیدوار چوہدری اخلاق نے پریس کانفرنس سے خطاب کرتے ہوئے کیا ۔

راجہ پرویز اشرف نے کہا کہ الیکشن کمیشن نے ووٹنگ کا وقت بڑھانے کا اعلان کیا تھا لیکن بدقسمتی سے چوہدری پرویز اشرف کے حلقوں میں یہ سہولت نہیں دی گئی۔

(جاری ہے)

انہوں نے کہا کہ یہ دوہرا معیار عوام کے مینڈیٹ پر ڈاکہ ہے۔ انہوں نے تنقید کرتے ہوئے کہا کہ LA-11 سمیت کئی حلقوں کی متعدد یونین کونسلوں میں منظم طریقے سے دھاندلی کی گئی اور اسی دوران دھاندلی کے ویڈیو ثبوت بھی دکھائے۔

انہوں نے کہا کہ 100 سے 150 افراد کے جتھے بنا کر پولنگ اسٹیشنز پر قبضے کیے گئے،ووٹروں کو گالیاں دی گئیں، مارا پیٹا گیا اور باہر نکال دیا گیا۔ لیکن پولیس تماشائی بنی رہی بلکہ بعض جگہوں پر خود پولیس ملوث تھی۔ راجہ پرویز اشرف کے مطابق پریذائیڈنگ افسران پر دباؤ ڈال کر زبردستی ٹھپے لگوائے گئے اور بیلٹ باکسز بھرے گئے۔ انہوں نے چیف الیکشن کمشنر سے مطالبہ کیا تھا کہ فورنزک آڈٹ کرا لیں تو ساری بات سامنے آجائے گی لیکن چیف الیکشن کمشنر نے صبح سویرے رزلٹ نشر کر دیا۔

سابق وزیراعظم نے انتخابات کے دوران تشدد کے واقعات کا بھی ذکر کیا۔ انہوں نے بتایا کہ الیکشن سے تین دن قبل ایک شخص کو فائرنگ کر کے قتل کیا گیا،فائرنگ کرنے والوں کی تصاویر وائرل ہوئیں لیکن کارروائی نہیں ہوئی، الٹا ہمارے امیدوار جاوید بڈھانوی کے خلاف ایف آئی آر درج کر دی گئی۔ انہوںنے کہاکہ الیکشن والے دن ہمارے کارکن مختار کو شہید کر دیا گیا اور 3 افراد زخمی ہوئے، عوام میں خوف پھیلایا گیا، فائرنگ کی گئی۔

اگر یہی شفافیت ہے تو پھر یہ عوام کے ساتھ مذاق ہے۔راجہ پرویز اشرف نے کہا کہ چوہدری یاسین نے 2 نشستوں پر کامیابی حاصل کی ہے، عوام نے انہیں واضح مینڈیٹ دیا ہے،ہم مطالبہ کرتے ہیں کہ ان کی دونوں نشستوں کا نتیجہ تسلیم کیا جائے اور دھاندلی کے ذریعے اسے تبدیل نہ کیا جائے۔ برنالہ کے حوالے سے انہوں نے کہا کہ چوہدری پرویز اشرف کے پولنگ اسٹیشنز 5 بجے بند کروا دیے گئے جبکہ ایک گھنٹے کی توسیع کا نوٹیفکیشن موجود تھا اور پھر رزلٹ 685 ووٹ کے فرق سے جتوا دیا گیا۔

راجہ پرویز اشرف نے چیف الیکشن کمشنر کو مخاطب کرتے ہوئے کہا کہ چیف الیکشن کمشنر کی آئینی ذمہ داری صاف شفاف الیکشن کروانا ہے لیکن انہوں نے لاکھوں لوگوں کے جذبات سے کھیلا ہے،اب بھی وقت ہے کہ وہ نوٹس لیں۔ انہوں نے دعویٰ کیا کہ پیپلز پارٹی میدان میں 10 نشستیں جیت چکی تھی لیکن غیر جمہوری ہتھکنڈوں سے نتائج تبدیل کر دیے گئے،پی ایم ایل این کو طنزیہ مبارکباد پیش کرتے ہوئے انہوں نے کہا کہ بیشک ان کی دھاندلی کامیاب ہو گئی، لیکن وہ کشمیر کے عوام کے دل نہیں جیت سکے۔

آخر میں انہوں نے کہا کہ پاکستان پیپلز پارٹی کے کارکنان سیاسی لوگ ہیں،ہار جائیں تو مان لیتے ہیں لیکن ووٹ چوری کرنا، ٹھپے لگانا، زبردستی کرنا یہ کیسی جمہوریت ہی پیپلز پارٹی اپنے کارکنوں اور ووٹرز کے ساتھ کھڑی ہے اور میڈیا کو بتایا کہ چیئرمین بلاول بھٹو زرداری کی سربراہی میں پارٹی آئندہ کا لائحہ عمل طے کرے گی۔ راجہ پرویز اشرف نے کہا کہ ہم آزاد کشمیر کی عوام کے ساتھ کھڑے ہیں اور وہ اداروں کا احترام کرتے ہیں لیکن اداروں کو بھی عوام کے مینڈیٹ کا احترام کرنا ہوگا۔