ملک میں کار، موٹر سائیکل، بس اور ٹریکٹر کی پیداوار معطل

آٹو انڈسٹری پہلے ہی مشکلات سے دوچار تھی کورونا کے باعث اب انڈسٹری کو بحرانی کیفیت کا سامنا ہے، ترجمان پاک سوزوکی

ملک میں کار، موٹر سائیکل، بس اور ٹریکٹر کی پیداوار معطل
کراچی(اُردو پوائنٹ اخبارتازہ ترین - این این آئی۔ 25 مارچ2020ء) کورونا وائرس کی وجہ سے پاکستان میں کاروں، موٹر سائیکل، بسوں اور ٹریکٹرز کی پیداوار معطل ہوگئی ہے، کار ساز کمپنیوں پاک سوزوکی، ہونڈا کارز، انڈس موٹرز نے پیدواری یونٹ بند کر دیئے ہیں۔ لاک ڈائون کی وجہ سے سندھ میں کاروں اور موٹر سائیکل کی پیداوار بند کردی گئی ہے۔ کورونا کی وبا سے انسانی جانوں کو کم نقصان ہوا تاہم پاکستان کا صنعتی شعبہ بری طرح متاثر ہورہا ہے۔

ہونڈا، یاماہا، سوزوکی نے موٹر سائیکلوں کے پلانٹس بند کر دیئے ہیں۔ ہینو موٹرز، ملت ٹریکٹرز اور ڈائے زان آٹو موبائلز نے بھی پیداوار بند کردی ہے۔پاک سوزوکی کے ترجمان شفیق احمد شیخ کے مطابق آٹو انڈسٹری پہلے ہی مشکلات سے دوچار تھی کورونا کی وبا کے باعث پیدا ہونے والی صورتحال میں انڈسٹری کو بحرانی کیفیت کا سامنا ہے، آٹو انڈسٹری بڑے پیمانے پر روزگار اور ریونیو فراہم کرنے کا ذریعہ ہے اسی لیے آٹو انڈسٹری کو صنعتوں کی ماں کا درجہ حاصل ہے۔

(جاری ہے)

انہوں نے کہا کہ بحران کی وجہ سے روزگار اور ریونیو میں کمی واقع ہوگی آٹو انڈسٹری سے لاکھوں افراد کا براہ راست اور بالواسطہ روزگار وابستہ ہے، موجودہ حالات میں روزگار کے مواقع برقرار رکھنا سب سے ضروری ہے جس کے لیے آٹو انڈسٹری کو مشکلات سے نکالنے کے لیے حکومت کو بیل آئوٹ پیکیج دینا ہوگا۔

Your Thoughts and Comments