حکومت فوری طور پر افغانستان کے ساتھ معمول کے تجارتی معاملا ت اور تجارتی حجم کی بحالی میں اپنا کردار ادا کری: میاں ناصر حیات مگوں

کراچی(آن لائن) ایف پی سی سی آئی کے صدر میاں ناصر حیات مگوں نے مطالبہ کیا ہے کہ حکومت فوری طور پر افغانستان کے ساتھ معمول کے تجارتی معاملا ت اور تجارتی حجم کی بحالی میں اپنا کردار ادا کرے اور ضروری سہولیات فراہم کری؛ جو کہ پچھلے کچھ سالوں کے دوران عام طور پر 1.5-2.0 بلین ڈالر سالانہ رہا ہے۔ وہ برآمدات پر مبنی قیمتی آمدنی کے نقصان اور اس کو دیگر علاقائی اور بین الاقوامی مسابقتی ممالک کو کھو دینے پر اپنے شدید تحفظات کا اظہار کر رہے تھے۔

انہوں نے یہ بھی وضاحت کی کہ مسئلے کے حل سے پاکستان کے ذریعے افغان تجارت کو بھی سہولت فراہم کی جانی چاہیے تاکہ قیمتی غیر ملکی زرمبادلہ حاصل کیا جا سکے۔میاں ناصر حیات مگوں نے کہا کہ امریکی ڈالر میں تجارت کی لازمی شرط دو طرفہ تجارت میں ایک بڑی رکاوٹ ثابت ہو رہی ہے اور اس نے با ہمی تجا رت کو روک دیا ہے اور پاکستانی ایکسپورٹرز کو بھاری مالی نقصان ہو رہا ہے۔

(جاری ہے)

انہوں نے مطالبہ کیا کہ حکومت موخر ادائیگی کی شرائط پر تجارت کی اجازت دی؛ جیسا کہ دو طر فہ تجارتی کمپنیاں مناسب سمجھیں۔بلوچستان سے ایف پی سی سی آئی کے نائب صدر ناصر خان نے اس مسئلے کے دو حل تجویز کیے ہیں یعنی یا تو حکومت افغانستان کے ساتھ پاکستانی روپے میں تجارت کی اجازت دے یا بارٹر ٹریڈ کی بنیاد پر تجا رت کی اجازت دے۔ انہوں نے پاکستان اور افغانستان کے وسیع ملحقہ سرحدی علاقوں میں افغانستان کے ساتھ سرحدی بازاروں کی ضرورت پر بھی زور دیا۔

ناصر خان نے مزید کہا کہ آسان ٹیرف اور لیویز اور ساتھ ہی ساتھ بارڈر مینجمنٹ سسٹم میں بہتری سے دونوں پڑوسی ممالک کے درمیان تجارت میں اضافہ ہوگا۔ سندھ سے ایف پی سی سی آئی کے نائب صدر عدیل صدیقی نے کہاکہ صورتحال کی بہتری کے لیے افغانستان کے ساتھ مشترکہ دوطرفہ تجا رتی میکانزم پر کام کیا جانا چاہیے اور افغانستان کو برآمدات پر انحصار کرنے والی برآمدات پر مبنی صنعتوں کے ذریعے روزگار اور پیداواری سرگرمیوں کو مستحکم رکھا جا سکتا ہے۔

انہوں نے مزید کہا کہ یہ افغانستان کے ساتھ اسپیشل ٹر یڈ ایگریمنٹ (STA) کے ذریعے حاصل کیا جا سکتا ہے۔میاں ناصر حیات مگوںنے مزید کہا کہ ہم نے وزیر خزانہ و محصولات، وزیر تجارت و پیداوار اور اسٹیٹ بینک آف پاکستان کو گزشتہ کئی مہینوں سے افغانستان کو برآمدات کے حوالے سے تیزی سے خراب ہوتی صورتحال سے آگاہ کیا ہے۔ لیکن ملک کی تاجر برادری کے تحفظ کے لیے کوئی اقدامات نہیں کیے گئے۔

ایف پی سی سی آئی کا موقف ہے کہ دو نو ں ممالک کی کاروباری اور تجارتی برادریوں کو بھی آن بورڈ لیا جانا چاہیے کیونکہ وہ حقیقی اسٹیک ہولڈرز ہیں اورایف پی سی سی آئی مشاورتی عمل میں اپنا کردار ادا کرنے کے لیے ہمہ وقت تیار ہے ۔میاں ناصر حیات مگو ں نے کہا کہ اگر ترجیحی بنیادوں پر مشاورت کے ذریعے مسائل حل نہ کیے گئے تو تاجر برادری کے پاس قانونی چارہ جوئی کے لیے مجاز عدالت سے رجوع کرنے کے علاوہ کوئی چارہ نہیں بچے گا۔