اینگرو فرٹیلائزر نے پہلے آئی سی اے پی نیشنل فنانس اولمپیاڈ میں فتح کا تاج اپنے سر کرلیا

اسلام آباد (اُردو پوائنٹ اخبار تازہ ترین۔06اگست۔2015ء) دی انسٹی ٹیوٹ آف چارٹرڈ اکاؤنٹنٹس آف پاکستان (آئی سی اے پی)کے زیر اہتمام ملکی تاریخ کا پہلا نیشنل فنانس اولمپیاڈ اینگرو فرٹیلائزرلمیٹڈ نے جیت لیا۔ انسٹی ٹیوٹ کی جانب سے اس اولمپیاڈ میں پاکستان بھر کے فنانس پروفیشنلز کو اپنی صلاحیتیں ، علم اور پیشہ وارانہ صلاحیتوں کا بھرپور اظہار کیا۔

اس پلیٹ فارم نے نوجوان فنانس پروفیشنلز کو اپنی صلاحیتوں اور اہلیت کو موثر انداز میں دنیا کے سامنے پیش کرنے کا موقع فراہم کیا گیا۔ اولمپیاڈ کا گرینڈ فنالے کا اہتمام میریٹ ہوٹل میں کیا گیا ۔جس میں معروف کمپنیوں کے سی ای اوز، سی ایف اوز، صدور، نائب صدور سمیت اہم اداروں کے ہیومن ریسورس پارٹنرز بھی شریک تھے۔گرینڈ فنالے میں پاکستان اسٹیٹ آئل کمپنی لمیٹڈ ، اینگرو فرٹیلائزرلمیٹڈ، کوٹ اددو پاور کمپنی لمیٹڈ، سینٹرل ڈپوزٹری کمپنی آف پاکستان لمیٹڈ، بائیکو پیٹرولیم پاکستان لمیٹڈاور حبیب فوڈز لمیٹڈ کی ٹیمیں شریک تھیں جن میں سے کامیابی کا سہرا اینگرو فرٹیلائزرلمیٹڈ کی ٹیم کے سر سجا۔

(جاری ہے)

فاتح ٹیم کو جگماتی ٹرافی دینے کے ساتھ ’نیشنل فنانس چمپیئن 2015‘کے اعزاز سے بھی نوازا گیا۔پہلی رنر اپ سینٹرل ڈپوزٹری کمپنی آف پاکستان لمیٹڈ کی ٹیم اور دوسری رنر اپ بائیکو پیٹرولیم پاکستان لمیٹڈ کی ٹیم رہی۔گرینڈ فنالے میں شریک ٹیموں نے تین مراحل میں اپنی صلاحیتوں کا اظہار کیا ، پہلے مرحلے میں انہوں نے شاندار پریذنٹیشنز پیش کیں، دوسری مرحلے میں سوالات کی مدد سے ٹیموں کی دماغی صلاحیتوں کا امتحان لیا گیا اورتیسرے مرحلہ بذر راؤنڈپر مشتمل تھا۔

ٹیموں کی کارکردگی کا جائزہ لینے کے لئے جیوری کے ارکان میں ایف سی اے مجاہد عیشائی، ایف سی اے سید مسعود علی نقوی، ایف سی اے فاخر سید اعجاز الدین شامل تھے۔ انسٹی ٹیوٹ کی پروفیشنل اکاؤنٹنٹس ان بزنس کمیٹی کے چیئرمین خلیل اﷲ شیخ نے اس موقع پر کہاکہ اس اولمپیاڈ کا مقصد فنانشل پروفیشنلز کو اپنی صلاحیتوں کو بہتر بنانے کا موقع فراہم کرنا ہے ۔

انہوں نے تکنیکی معاونین میسرز اے ایف فرگوسن اینڈ کو اور ڈیلوآئٹ یوسف عادل سمیت آرگنائزنگ کمیٹی کے ارکان کا شکریہ بھی ادا کیا۔ انہوں نے بھرپور مقابلے اور جان توڑ محنت پر ٹیموں کا مبارکباد بھی پیش کی۔ یونی لیور پاکستان کے چیف فنانشل آفیسر علی طارق نے کہا کہ ہمیں سوشل نیٹ ورکنگ کے پھیلاؤ اور پاکستان میں فنانس کے ٹیلنٹ کی صلاحیتوں کے اعتراف کے سلسلے میں منعقدہ مقابلے کا حصہ بننے پر انتہائی مسرت ہے۔

انسٹی ٹیوٹ کے صدر یعقوب ستار نے تمام کی کارکردگی کو سراہا اور فاتحین کو مبارکباد پیش کرتے ہوئے کہاکہ آئی سی اے پی اس منفرد پلیٹ فارم کے ذریعے نئے سنگ میل حاصل کر رہا ہے۔ہم ان کی صلاحیتوں معترف ہیں جوکہ اپنے اداروں کے ترقی کے سفر میں اہم کردار ادا کر رہے ہیں۔تقریب کے اختتا م پر فاتحین، ججوں، جیوری، منتظمین اور تکنیکی شراکت داروں کو ایوراڈز ، انعامات اور یادگاری شیلڈز سے نوازا گیا۔