بینک الفلاح نے آئی سی بی سی کی کراچی میں واقع برانچ کے ساتھ دوطرفہ تعاون کے لیے شراکت داری قائم کرلی٬ مفاہمت کی یادداشت پر دستخط

کراچی (اُردو پوائنٹ اخبارتازہ ترین - آن لائن۔ 31 اکتوبر2016ء) بینک الفلاح نے چین کے سرفہرست بینک ’’انڈسٹریل اینڈ کمرشل بینک آف چائنا لمیٹڈ (آئی سی بی سی) ‘‘کی کراچی میں واقع برانچ کے ساتھ بینکاری اور مالیات کے مختلف شعبوں میں دوطرفہ تعاون کے لیے شراکت داری قائم کرلی ہے۔ اس سلسلے میں طے پانے والی مفاہمت کی یادداشت میںپاکستان اور چین کے علاوہ دونوں اداروں کی بین الاقوامی سطح پر موجودگی کے مقامات پر مالیاتی سرگرمیوں سے متعلق دوطرفہ تعاون کے لیے تصوراتی فریم ورک اور رہنماء اصولوں کا تعین کیا گیا ہے۔

اس معاہدے کے تحت دونوں اداروں نے ایک دوسرے کو ٹریڈ فنانس بزنس کے حصول میں مدد دینے پر اتفاق رائے کیا ہے۔ معاہدے کے تحت دونوں بینکوں میں ایک دوسرے کے اکائونٹس کھولے جائیں گے تاکہ لین دین کی خدمات انجام دی جاسکیں۔

(جاری ہے)

معاہدے کے تحت آئی سی بی سی کا بینک الفلاح کراچی میں روپیہ اکائونٹ کھولا جائے گا جبکہ بینک الفلاح بھی آئی سی بی سی کے ساتھ چینی کرنسی Yuanمیں Nostroاکائونٹ قائم کرے گا۔

مفاہمت کی یادداشت کے تحت دونوں ادارے کارپوریٹ اداروں کو قرضوں کی مشترکہ فراہمی اور پراجیکٹ فنانسنگ میں ایک دوسرے کے سا تھ تعاون کریں گے۔آئی سی بی سی پاکستان کی مقامی کرنسی میں فنڈنگ کے خواہش مند چینی کارپوریٹ کلائنٹس ترجیحی طور پر بینک الفلاح کو ریفر کرے گا جبکہ بینک الفلاح چینی کرنسی Yuan میں فنڈنگ کے خواہش مند پاکستانی کارپوریٹ کلائنٹس آئی سی بی سی کو ریفر کرے گا۔

دونوں اداروں کے مابین قائم ہونے والی اس شراکت داری کے تحت دونوں بینک پاکستان میں ہونے والے ترجیحی منصوبوںکی پراجیکٹ فنانسنگ کے لیے مشترکہ سنڈیکیٹ قائم کرسکیں گے۔معاہدے کے تحت دونوں اداروں نے ٹریژری سے متعلق ٹرانزیکشن عمل میں لانے پر بھی اتفاق کیا ہے۔ بینک الفلاح آئی سی بی سی کی سرمائے سے متعلق ضروریات کو پورا کرنے کے لیے حکومت پاکستان کے بانڈزتک رسائی ممکن بنانے کے لیے پرائمری ڈیلر کا کردار ادا کرے گا۔

اسی طرح آئی سی بی سی بینک الفلاح کو عالمی بانڈ مارکیٹ تک رسائی فراہم کرے گا۔ دونوں اداروں نے ایک دوسرے کی فارن ایکس چینج ٹرانزیکشن ضروریات کو پورا کرنے میں بھی اشتراک عمل پر اتفاق کیا ہے۔بینک الفلاح اور آئی سی بی سی نے پاکستان کی معیشت کے مختلف شعبوں سے متعلق صنعتی اور انفرااسٹرکچر کی ترقی کے انفرادی منصوبوں کی نشاندہی٬ فنانسنگ سے متعلق سرگرمیوں میں شمولیت ٬ پراجیکٹ فزیبلیٹی کے مالیاتی فیچرز٬ معاشی و تکنیکی پہلوئوں کے مشترکہ جائزہ مرتب کرنے سمیت سرمایہ کاروں کو مشاورت کی فراہمی اور مشترکہ فنانسنگ پر بھی اتفاق کیا ہے۔

اس کے علاوہ دونوں بینکوں کے مابین کسی تیسرے ملک یا خطے سے باہر بینکاری سے متعلق کاروباری سرگرمیوں کے لیے بھی اشتراک عمل پر اتفاق کیا گیا ہے۔ اس سلسلے میں دونوں بینک باہمی تعاون کو فروغ دیتے ہوئے معلومات کا بھی تبادلہ کریں گے۔ اس کے متعلق تبصرہ کرتے ہوئے انڈسٹریل اینڈ کمرشل بینک آف چائنا کے پاکستان آپریشنز کے چیف ایگزیکٹیو آفیسرHe Shenghu کا کہنا تھا٬ ’’ آئی سی بی سی کا اولین مقصد حکومتی و نجی دونوں شعبوں کے ساتھ تعاون قائم کرکے پاکستان کی معاشی ترقی میں مدد فراہم کرنا ہے۔

ہمارے کاروبار کی بنیاد ی اساس سی پیک کے منصوبوں کی باسہولت تکمیل کو یقینی بنانا ہے۔ ہمیں امید ہے کہ بینک الفلاح کے ساتھ تعاون سے ہم دونوں ممالک کی ترقی اور کامیابی میں بہتر طور پر حصہ ڈال سکیں گے۔‘‘اس پیش رفت پر اظہار خیال کرتے ہوئے بینک الفلاح کے سی ای او عاطف باجوہ نے کہا کہ ’’بینک الفلاح لمیٹڈ آئی سی بی سی کے ساتھ شراکت داری قائم کرکے پاکستان اور چین کی دوستی کو مزید مضبوط بنانے پر بے حد مسرور ہے۔

یہ ادارہ جاتی شراکت داری دونوں ملکوں کے بینکنگ اور فنانس سیکٹر کے لیے سود مند ثابت ہوگی۔ پاکستان اور چین کے مابین سماجی و معاشی ترقی کے لیے بڑھتے ہوا تعاون دونوں ملکوں کے بینکنگ سیکٹر میں مضبوط روابط کو فروغ دینے کے لیے نئے مواقع مہیا کرے گا۔ اس پیش رفت سے نہ صرف دونوں ملکوں میں پراجیکٹس کے لیے فنانسنگ کے حصول میں آسانی ہوگی بلکہ پاکستان اور چین میں سرمایہ کاری کو بھی فروغ ملے گا۔‘‘