اسلام آباد٬ بزنس مین پینل اور پاکستان بزنس گروپ کے وفد کا ایف پی سی سی آئی کے نو تعمیر شدہ کیپیٹل آفس کا دورہ

اسلام آباد٬ کراچی(اُردو پوائنٹ اخبارتازہ ترین - آن لائن۔ 31 اکتوبر2016ء) بزنس مین پینل اور پاکستان بزنس گروپ کے وفد نے اسلام آباد میں ایف پی سی سی آئی کے نو تعمیر شدہ کیپیٹل آفس کا دورہ کیا اور فیڈریشن کے صدر عبدالرؤف عالم سے ملاقات کی وفد میں سلطان احمد چائولہ ٬میاں زاہد حسین٬مہتاب الدین چاولہ ٬عبدالرحیم جانو ٬سینیٹر حاجی غلام علی ٬حنا منصب خان ٬میاں انجم نثار ٬سید عبدالوحید شاہ ٬نوید جان بلوچ مرزا عبدالرحمن ٬شیخ محمد اسلم ٬ثاقب فیا ض مگوں ٬خرم سعید ٬یحییٰ پولانی ٬شاہنواز اشتیاق ٬شبیر منشا چھر ا ٬احمد سعید ٬سلطان رحمن اور احمدجواد شامل تھے ۔

اس موقع پر وفد کے اعزاز میں ایف پی سی سی آئی کے صدر کی جانب سے ظہرانے کا اہتمام کیا گیا اور ان کو ایف پی سی سی آئی کی نوتعمیر شدہ بلڈنگ کا دورہ بھی کرایا ۔

(جاری ہے)

بزنس مین پینل اور پاکستان بزنس گروپ کے رہنماؤں نے ایف پی سی سی آئی بلڈنگ کی تعمیر پر فیڈریشن کے صدر عبدالرؤف عالم کو مبارکباد پیش کرتے ہوئے کہا کہ کراچی اور پورے ملک سے تعلق رکھنے والے اپوزیشن کے ارکان ایف پی سی سی آئی کے منتخب صدر کی عزت کرتے ہیں اور ان کی خدمات پر خراج تحسین پیش کرتے ہیں ۔

انہوںنے کہا کہ باوجود اس کے کہ فیڈریشن کے دروازے اپوزیشن پر بند کردیئے گئے حتیٰ ایک شخص کی خواہش پر ڈاکٹر شہلا اکرم کو محض تعمیری تنقید کی پاداش میں ایف پی سی سی آئی کی تقریبات میں شرکت سے روک دیا گیا ۔ہم نے بزنس کمیونٹی کے مفادات کے تحفظ کے لیے ذاتی انا کو بالائے طاق رکھتے ہوئے کمیونٹی کی بہتری کے لیے اپنی کاوشیں جاری رکھیں ۔ٹرانسپرنسی انٹرنیشنل نے ایکسپو پاکستان کی شفافیت کے حوالے سے سوالات اٹھائے ہیں ۔

اس حوالے سے بھی ہم نے محض تنقید برائے تنقید نہیں کی بلکہ معاملے کی تحقیقات کا مطالبہ کیا تھا ۔انہوںنے کہا کہ زیرو کو ہیرواور ہیرو کو زیرو بنانے سوشل بائیکاٹ اور بچھوجیسے مغلظات کے باوجود ہم سب کی عزت کرتے ہیں اور بحیثیت اپوزیشن تعمیری تنقید کرنا ہماری ذمہ داری ہے ۔وفد کے ارکان نے کہا کہ فیڈریشن کی ایف بی آرکمیٹیوں کی گزشتہ دو سال کی کارکردگی انتہائی ناقص رہی ہے ۔

بزنس کمیونٹی کو درپیش220بلین کے سیلز ٹیکس ریفنڈز ٬کسٹمز ٬انکم ٹکس ٬گیس کی قلت سمیت دیگر مسائل جوں کے توں اپنی جگہ موجود ہیں ۔ملکی برآمدات میں جی ایس پی پلس کا اسٹیٹس ملنے کے باوجود ریکارڈ کمی واقع ہوئی ہے ۔اسی کے باعث پاکستان نے آئی ایم ایف کو ترقیاتی بجٹ میں 420بلین روپے کی کمی کی یقین دہانی کرائی ہے ۔دونوں گروپوں کے ارکان نے کہا کہ پاکستان اور بھارت کے درمیان کشیدہ تعلقات کے باعث حکومت کو سنجیدہ اقدامات کرنا ہوں گے ۔

بہتر ہوگا کہ پاکستان بھارت کے ساتھ تجارت کا بائیکاٹ کردے کیونکہ وہ پاکستان میں دہشت گردی کو فروغ دے رہا ہے ۔بے گناہ پاکستان کے خون کے بدلے میں ہمیں بھارت سے تجارت قبول نہیں ہے ۔ایف پی سی سی آئی کے سالانہ انتخابات کے حوالے سے اپوزیشن ارکان نے کہا کہ الیکشن کا انعقاد منصفانہ ہونا چاہیے اور اس کے لیے ضروری ہے کہ انتظامیہ کسی کا ساتھ نہ دے ۔

ہم عزت کی سیاست کرنا چاہتے ہیں ٬کسی کی پگڑی اچھالنا ہمارا شیوہ نہیں ہے ۔بزنس مین پینل اور پاکستان بزنس گروپ کے مشترکہ صدارتی عبدالرحیم جانو ہر طبقہ فکر میں عزت کی نگاہ سے دیکھے جاتے ہیں ۔ان کے ایف پی سی سی آئی کے صدر منتخب ہونے سے فیڈریشن کے وقار میں مزید اضافہ ہوگا ۔اس موقع پر گفتگو کرتے ہوئے ایف پی سی سی آئی کے صدر عبدالرؤف عالم نے کہا کہ میں عبدالوحید شاہ کا ذاتی طور پر مقروض ہوں ۔

کوئی تسلیم کرے یا نہ کرے میں ان کی شانہ بشانہ کاوشوں سے ملک کی سب سے بڑی ٹریڈ باڈی کا صدر منتخب ہوا ۔یونائیٹڈ بزنس گروپ کی کامیابیوں میں عبدالوحید شاہ کے کردار سے کوئی انکار نہیں کرسکتا ہے ۔میاں زاہد حسین نے بھی شاندار الفاظ میں سید عبدالوحید شاہ کی خدمات کو خراج تحسین پیش کیااس موقع پر وفد کے ارکان نے صدرایف پی سی سی آئی عبدالرئوف عالم کو پھولوں کے ہار پہنا ئے اورانہیں پھولوں سے لاد دیا اور رئوف عالم کیلیئے گولڈمیڈل کا بھی اعلان کیا ۔