شہداء ہمارا فخرہیں

دو دن پہلے آرمی ایوی ایشن کا ہیلی کاپٹر گلگت بلتستان میں گر کر تباہ ہو ا جس میں افواج پاکستان کے دو افسروں اور دو جوانوں نے جام شہادت نوش کیا۔پاک فوج کے شعبہ تعلقات ِعامہ کے مطابق آرمی ایوی ایشن کے ہیلی کاپٹر کو حادثہ گلگت بلتستان کے علاقے منی مرگ میں تکنیکی خرابی کے باعث پیش آیا۔ہیلی کاپٹر شہید سپاہی عبد القدیر کی میت لے کر CMHاسکردو جا رہا تھا ۔

حادثے میں کو پائلٹ میجر ایاز حسین،نائیک انضمام عالم اور سپاہی محمد فاروق بھی شہید ہوئے۔اِس حادثے میں شہید میجر ایاز کا تعلق ملیر کراچی جبکہ میجر حسین شہید کاتعلق اسکردو کے علاقے خپلو سے ہے۔ کل کے دن ایک اور افسوسناک واقعہ پیش آیا ۔آئی ایس پی آ ر کے مطابق بلوچستان میں ہرنائی کے قریب شارک کے علاقہ میں ایف سی پر دہشتگردوں نے حملہ کیا ،دہشتگردوں سے لڑتے سات ایف سی اہلکاروں نے جامِ شہادت نوش کیا۔

(جاری ہے)

شہید ہونے والوں میں نائب صوبیدار گلزار،سپاہی فیصل،سپاہی عبد الوکیل ،سپاہی شیر زمان ،جمال ،عبد الرؤف اور فقیر محمد شامل ہیں ۔آئی ایس پی آر کا کہنا تھا کہ بزدلانہ کاروائی کرنے والے دہشتگردوں کو بلوچستان کا امن تباہ کرنے نہیں دیں گے۔اِن افسوسناک سانحات پر جناب وزیر اعظم عمران خان اور وفاقی وزیر داخلہ شیخ رشید نے افسوس کا اظہار کیا اور حملے کی شدیدالفاظ میں مذمت کی ۔

بھارت نے ہمیشہ بلوچستان میں مداخلت کر کے پاکستان کے امن کو تباہ کرنے کی ناکام کوشش کی ہے ۔کچھ دن پہلے اقوام متحد ہ میں پاکستان کے سفیر منیر اکرم نے اقوام متحدہ کے سیکر ٹری جنرل انتونیو گوترس سے ملاقات کی اور پاکستان میں بھارتی مداخلت کے ثبوت پیش کیے۔بھارت ہمیشہ سے پاکستان میں دہشتگردی کروا رہا ہے ۔اِس بات کے ٹھوس شواہد موجود ہیں ۔

بھارت کو اِس امر کا بخوبی ادراک ہے کہ پاکستانی قوم کا ہر بچہ اِس ملک کا سپاہی ہے اور وقت آنے پر افواج پاکستا ن کے ساتھ کندھے سے کندھا ملا کر دشمن کا مقابلہ کرے گا۔بھارت کی 1.3ارب آبادی کے مقابلہ میں پاکستا ن 22کروڑ افراد اور تعداد میں نسبتاََ چھوٹی فوج کا ملک ہے لیکن ہم نے ہمیشہ اپنے عزم و حوصلے سے اپنے سے پانچ گنا بڑے دشمن کو ناکوں چنے چبوائے ہیں ۔

ہماری فوج دنیا کی بہترین فورس ہے جس نے ہر طرح کے مشکل حالات میں اپنی برتری ثابت کی ہے ۔یہی وجہ ہے کہ بھارت لائن آف کنٹرول پر چھوٹی موٹی شرارتوں سے بڑھ کر پاکستان پر حملے کی ہر گز جرات نہیں کر سکتا۔بھارت نے ہمیشہ چھپُ کر وار کیا ہے ۔1965ء کی جنگ میں محدود اسلحہ اور دفاعی ساز و سامان کے باوجود جس طرح پوری قوم نے سیسہ پلائی دیوار کی طرح دفاع وطن میں افواج پاکستان کے شانہ بشانہ بہادری اور جرات کی تاریخ رقم کی تھی آج بھی وہی جذبہ ہمارا فخر اور مضبوطی کی علامت ہے ۔

دشمن کس طرح اس قوم کو شکست دے سکتا ہے جس کا بچہ بچہ وطن پر قربان ہونے کے لیے بے قرار اور پر عز م ہو ۔
پاکستان آرمی دنیا کی بہادر ترین اور تجربہ کار فورس ہے ۔روایتی جنگ ہو یا دہشتگردی کے خلاف معرکے، پاکستانی افواج نے ہمیشہ بہادری اور عزم و ہمت کے ساتھ دشمن کو شکست دی ہے ۔ پاکستان ایک امن پسند ملک ہے ۔پاکستان نے ہمیشہ ہمسایہ ممالک کے ساتھ تعلقات بہتر بنانے کی کوشش کی ہے ۔

دوسری طرف بھارت ایک شر پسند ریاست ہے جس نے ہمیشہ ہمسایہ ممالک کے ساتھ تعلقات خراب رکھے ہیں ۔اِس بات کا ثبوت اکسائی چن میں حال ہی میں چین اور بھارت کے درمیان ہونے والی جھڑپیں ہیں ۔اِن جھڑپوں میں چین کی افواج نے بھارتی فوجیوں کو ناکوں چنے چبوائے ۔بھارتی افواج کو ہمیشہ کی طرح اِس محاذپرہزیمت اٹھانا پڑی۔اسی طرح حال ہی میں ہمسایہ ملک نیپال کے ساتھ بھی بھارت نے ایک نیا سرحدی تنازع کھڑا کردیا۔

بھارت عالمی امن کے لئے ایک خطرہ بن چکا ہے۔عالمی برادری کو بھارت کے مذموم ارادوں کو لگام دینی چاہیے۔بھارت اپنی عوام کے لئے بھی خطرناک ریاست بن چکا ہے۔ بھارت میں مسلمانوں، سکھوں، اور دلتوں کے ساتھ ناروا سلوک کیا جارہا ہے۔ بھارت کی سکھ برادری مودی حکومت کے خلاف سراپا احتجاج ہے۔ سکھ کسانوں کا یہ احتجاج ایک زبردست تحریک کی شکل اختیار کر چکا ہے۔

پاک فوج دنیا کی بہادر ترین فوج ہے۔ پاک فوج کی قربانیاں رائیگاں نہیں جائیں گی۔شہداء ہمارا فخر ہیں۔آرمی چیف جنرل قمرجاوید باجوہ او ر آئی ایس آئی کے سربراہ جنرل فیض حمیدکی سربراہی میں ہماری بہادر افواج دشمن کے ناپاک عزائم کو ناکام بنانے میں پر عزم ہیں۔ہمارے شہدا ء کی قربانیاں رائیگاں نہیں جائیں گی۔