آرمی چیف کا نواز شریف کی والدہ کے انتقال پر اظہار تعزیت

راولپنڈی (اُردو پوائنٹ اخبارتازہ ترین ۔ 22 نومبر2020ء) آرمی چیف نے شریف برادران کی والدہ کی وفات پر اظہار افسوس کرتے ہوئے کہا کہ اللہ تعالیٰ مرحومہ کے درجات بلند کرے ۔ سماجی رابطوں کی ویب سائٹ ٹوئٹر پر ڈی جی آئی ایس پی آر کی جانب سے جاری پیغام میں آرمی چیف کی جانب سے کہا گیا ہے کہ میاں نواز شریف اور میاں شہباز شریف کی والدہ بیگم شمیم اختر کی وفات پر گہرا دکھ ہوا ہے، اللہ تعالی مرحومہ کے درجات بلند کرے ۔

آمین اس سے قبل صدر اور وزیراعظم سمیت کئی اہم شخصیات نے شریف برادران سے اظہار افسوس کیا ہے ۔ صدر مملکت عارف علوی نے شریف برادران کی والدہ کے انتقال پر اظہار افسوس کرتے ہوئے کہا کہ اللہ مرحومہ کو جنت الفردوس میں اعلیٰ مقام عطا فرمائے ۔

(جاری ہے)

وزیراعظم عمران خان نے نواز شریف کی والدہ کے انتقال پر تعزیت کا اظہار کرتے ہوئے کہا کہ اللہ تعالی مرحومہ کے درجات بلند فرمائے۔

چیئرمین پیپلز پارٹی بلاول بھٹو زرداری نے بھی بیگم شمیم اختر کے انتقال پر دلی افسوس کا اظہارکیا۔ بلاول بھٹو زرداری کا کہنا تھاکہ آپ کے غم میں برابر کا شریک ہوں، دعاگو ہوں اللہ تعالیٰ مرحومہ کو جنت الفردوس میں جگہ عطا فرمائیں اور سوگواران کو صبر جمیل عطا فرمائیں۔ وزیراعلیٰ پنجاب عثمان بزدار نے اپنے تعزیتی پیغام میں کہا کہ اللہ تعالی مرحومہ کو اپنی جوار رحمت میں جگہ اور غمزدہ خاندان کو صبر جمیل عطا فرمائیں۔

گورنر پنجاب چوہدری سرور نے بیگم شمیم اختر کی وفات پر دکھ کا اظہار کرتے ہوئے کہا کہ دکھ کی اس گھڑی میں لواحقین کے ساتھ کھڑے ہیں ۔ ڈپٹی اسپیکر قومی اسمبلی قاسم سوری نے میاں برادران سے تعزیت کرتے ہوئےکہا کہ اللہ لواحقین کو صبر عطا فرمائے ۔ سینیٹر شبلی فراز نے دکھ کا اظہار کرتے ہوئے کہا کہ اللہ مرحومہ کے درجات بلند کرے ، پاک سرزمین پارٹی کے چیئرمین مصطفیٰ کمال کا تعزیتی پیغام میں کہنا تھا کہ دکھ کی اس گھڑی میں شریف خاندان کے غم میں برابر کے شریک ہیں۔

وزیر ریلوے شیخ رشید کا نواز شریف اور شہبازشریف کی والدہ کی وفات پر افسوس کا اظہار کرتے ہوئے کہنا تھا کہ اللہ تعالی مرحومہ کے درجات بلند فرمائے اور جنت الفردوس میں اعلی مقام عطا کرے۔ بیگم شمیم اختر کے انتقال پر کنوینر ایم کیو ایم پاکستان ڈاکٹر خالد مقبول صدیقی کا کہنا تھا کہ اللہ تعالی مرحومہ کی مغفرت اور شریف برادران سمیت تمام لواحقین کو صبر جمیل عطا کرے۔

چیئرمین سینیٹ صادق سنجرانی نے میاں برادران کی والدہ کی وفات پر تعزیت کرتے ہوئے کہاکہ اللہ لواحقین کو صبر عطا کرے ۔ سینیٹ میں قائد حزب اختلاف راجا ظفرالحق نے نواز شریف کی والدہ کی وفات پر اظہار تعزیت کرتے ہوئے کہا کہ مرحومہ نہایت نیک سیرت انسان تھیں، اللہ تعالیٰ ان کے درجات بلند فرمائے اوراللہ تعالی میاں صاحبان کو صبر جمیل عطا فرمائے۔ اس کے علاوہ گورنر سندھ، وزیراعلیٰ سندھ سید مراد علی شاہ، سابق وزیراعظم سید یوسف رضا گیلانی، اسپیکر پنجاب اسمبلی چوہدری پرویز الہیٰ ، چوہدری شجاعت حسین، عبدالعلیم خان، شہباز گل اور وزیراعلیٰ بلوچستان جام کمال سمیت متعدد اہم شخصیات نے شریف برادران سے اظہار افسوس کیا ۔