Live Updates

فوج سے مذاکرات کیلئے محمود اچکزئی کو نامزد کیا گیا ہے

عمران خان جو مانگ رہے ہیں وہ شاید محمود اچکزئی کو قبول نہ ہو، ڈکٹیشن اگربانی پی ٹی آئی نے دی ہے تو بات کی ابتدا ہی نہیں ہوسکتی، جب تک 9 مئی کی بغاوت کا سدباب نہیں ہوتا کوئی دہلیز پار نہیں ہوسکتی۔ وزیردفاع خواجہ آصف

ثنااللہ ناگرہ جمعرات 1 اگست 2024 20:46

فوج سے مذاکرات کیلئے محمود اچکزئی کو نامزد کیا گیا ہے

اسلام آباد ( اردوپوائنٹ اخبارتازہ ترین۔ یکم اگست 2024ء) وزیردفاع خواجہ آصف نے کہا ہے کہ فوج سے مذاکرات کیلئے محمود اچکزئی کو نامزد کیا گیا پتا نہیں ان کا نام عمران خان سے پوچھ کردیا گیا یا نہیں، ڈکٹیشن یا ٹی اوآر اگربانی پی ٹی آئی نے دیئے ہیں تو بات کی ابتدا ہی نہیں ہوسکتی۔ انہوں نے جیو نیوز سے گفتگو کرتے ہوئے کہا کہ فوج سے مذاکرات کیلئے محمود اچکزئی کو نامزد کیا گیا ہے، پتا نہیں محمود اچکزئی کا نام بانی پی ٹی آئی سے پوچھ کردیا گیا ہے یا نہیں۔

بانی پی ٹی آئی جو مانگ رہے ہیں وہ شاید محمود اچکزئی کو قبول نہ ہو۔ پہلے 9 مئی کو جو بغاوت ہوئی تھی اس کا سدباب ہونا چاہیئے۔ 9 مئی کی بغاوت کا جب تک سدباب نہیں ہوتا کوئی دہلیز پار نہیں ہوسکتی۔ 9 مئی کی بغاوت کی ذمہ داری بانی پی ٹی آئی نے قبول کرلی ہے جبکہ پہلے بانی پی ٹی آئی 9 مئی کی ذمہ داری مان نہیں رہے تھے۔

(جاری ہے)

اگر سیاسی قوتوں سے مذاکرات کی بات ہو تو وزیراعظم نے پہلے بھی پیشکش کی ہے، سیاسی قوتوں کے مل بیٹھنے سے کوئی انکاری نہیں ہوسکتا۔

ڈکٹیشن یا ٹی اوآر بانی پی ٹی آئی نے دیئے ہیں تواس کی ابتداء ہی نہیں ہوسکتی، ان چیزوں کا سیاسی حل نکل سکتا ہے۔ انہوں نے کہا کہ 9مئی کو فوج کے ادارے کے خلاف جو کچھ کیا گیا اور جو زبان استعمال کی گئی، بانی پی ٹی آئی اب بھی وہی زبان استعمال کررہے ہیں، فوج کے ادارے سے متعلق بانی پی ٹی آئی مشروط بات کررہے ہیں۔دوسری جانب اپوزیشن لیڈر قومی اسمبلی عمر ایوب خان نے کہا کہ نوازشریف این آراو لے کر کیسز معاف کرا کے واپس آئے، جب تک چیف جسٹس بندیال تھے وہ واپس نہیں آئے، قانونی طور پر چیف جسٹس سپریم کورٹ اور چیف جسٹس اسلام آباد ہائیکورٹ کو عمران خان کا کیس نہیں سننا چاہیئے۔

پی ٹی آئی رہنماء اسد قیصر نے کہا کہ فیصلہ کیا گیا ہے کہ آئندہ 15روز میں گرینڈ الائنس بنائیں گے، جس میں تمام ہم خیال سیاسی جماعتوں کو ساتھ ملائیں گے، وہ جماعتیں جو موجودہ حکومت کے خلاف آواز اٹھا رہی ہے۔بلوچستان ، پنجاب، سندھ اور کے پی کے میں ہوں ، جو بھی اس وقت تحریک چلا رہے ہیں سب کو اکٹھا کررہے ہیں۔ ہمارا صوابی میں جلسہ ہوگا ،اس کا بنیادی مقصد عمران خان کو ناجائز گرفتار کیا گیا، گرفتاری غیرقانونی ہے۔