آئی ایم ایف کو خدا حافظ کہہ دیا تھا لیکن بدقسمتی ہے کہ ترقی کرتا ملک پٹڑی سے اتار دیا گیا

لاہور (اُردو پوائنٹ اخبارتازہ ترین۔ آئی پی اے۔ 17 فروری 2025ء) پاکستان مسلم لیگ (ن) کے صدر محمد نواز شریف اور وزیراعلیٰ پنجاب مریم نوازشریف سے پنجاب اسمبلی کے ارکان نے ملاقات کی۔ ساہیوال، خانیوال، ملتان، لودھراں، وہاڑی اور بہاولنگر سے تعلق رکھنے والے ارکان پنجاب اسمبلی ملاقات کرنے والوں میں شامل تھے۔ ملاقات میں عوامی فلاح کے منصوبوں اور مستقبل کی سیاسی حکمت عملی پر مشاورت کی گئی ارکان پنجاب اسمبلی  نے وزیراعلیٰ مریم نوازشریف کے چولستان میں گرین پاکستان منصوبے کے انقلابی پروگرام کے آغاز کا خیرمقدم کیا۔

پاکستان مسلم لیگ (ن) کے صدر محمد نوازشریف نے ارکان پنجاب اسمبلی سے گفتگو کرتے ہوئے کہا کہ بدقسمتی ہے کہ ترقی کرتا ملک پٹڑی سے اتار دیا گیا اور سیاست میں گند ڈال کر اسے تباہ کیا گیا۔

(جاری ہے)

بد تہذیبی، بدتمیزی، بغض اور انتقام کو سیاست بنادیا گیا۔ قائد محمد نوازشریف نے کہا کہ معیشت اور اقدار تباہ کیں، جمہوریت کی پیٹھ میں خنجر گھونپا گیا۔

پاکستان ڈیفالٹ کے منہ سے واپس آیا ہے۔ شہبازشریف کی محنت سے معاشی استحکام واپس آ رہا ہے۔ پالیسیوں کے تسلسل سے معاشی ترقی یقینی ہوگی۔ محمد نوازشریف نے کہا کہ کرپشن، معاشی تباہی، مہنگائی اور بدتمیزی تبدیلی کی سوغاتیں تھیں۔ ہم نے آئی ایم ایف کو خدا حافظ کہہ دیا تھا۔ ہمارا بیانیہ ملک کی ترقی اور عوام کو مہنگائی سے نجات دلاکر خوشحال بنانا ہے۔

جو وعدے کئے تھے اللہ تعالی کے فضل وکرم سے وہ آج عوام کو پورے ہوتے نظر آرہے ہیں۔ ارکان پنجاب اسمبلی نے گفتگو کرتے ہوئے کہا کہ نوازشریف اور شہبازشریف وعدوں کی تکمیل اور وطن سے وفا کے نام ہیں۔ نوازشریف اور شہبازشریف نے ذاتی تکالیف بھلا کر ہمیشہ پاکستان اور عوام کی تکلیفیں دور کی ہیں۔ پاکستان کے چپے چپے پر نوازشریف اور شہبازشریف کی ترقی کے نشان موجود ہیں۔

وزیراعظم شہباز شریف نے پاکستان کے معاشی استحکام کے لئے شہباز سپیڈ سے کام کیا ہے۔ ارکان اسمبلی نے کہا کہ وزیراعظم شہباز شریف کی ذاتی کوششوں سے آئی ایم ایف پروگرام بحال ہوا اور ملک ڈیفالٹ سے بچ گیا۔ مریم نوازنے نوازشریف اور شہبازشریف کے دور کی یاد تازہ کردی ہے، اپنی وزیر اعلیٰ پرہمیں فخر ہے۔ پہلی خاتون وزیراعلیٰ کے طورپر مریم نوازشریف کی عوامی خدمت کا ہر طرف اعتراف ہو رہا ہے۔

ارکان اسمبلی نے مزید کہا کہ بے مثال سیاسی جدوجہد کے بعد عوامی خدمت میں بھی مریم نوازشریف نے اپنی صلاحیتوں کا اعتراف کرایا ہے۔ مریم نوازشریف جیسی عوامی خدمت کا تقاضا آج ہر صوبے میں ہورہا ہے۔ سیاسی وابستگی سے بالا تر ہوکر پورے پنجاب کی مساوی خدمت جاری ہے۔ کسانوں کو جدید مشینری، وسائل اور زرعی مالز کے ذریعے ایک چھت تلے تمام سہولیات کی فراہمی سے زرعی انقلاب برپا ہورہا ہے۔

وزیراعلیٰ مریم نوازشریف نے ارکان پنجاب اسمبلی سے اظہار خیال کرتے ہوئے کہا کہ عوام کی خدمت کا مشن چیلنج سمجھ کر سنبھالا، قیادت اور جماعت کا شکریہ مجھے یہ ذمہ داری دی۔ پارٹی کے سینئر رہنما سینیٹر پرویز رشید، رانا ثناء اللہ، پنجاب کی سینئر وزیر مریم اورنگزیب اور راشد نصر اللہ بھی ملاقات میں موجود تھے۔ ملاقات کرنے والوں میں پیر ولایت شاہ، ملک قاسم ندیم، محمد ارشد ملک، نوید اسلم خان لودھی، رانا ریاض احمد، محمد اکبر حیات ہراج، اسامہ فضل، عامر حیات ہراج، بابر حسین عابد، چوہدری ضیاء الرحمن، رانا محمد سلیم اور محمد اصغر حیات ہراج  شامل تھے۔

محمد سلمان نعیم، محمد نازک کریم، ملک لعل محمد، شازیہ حیات، محمد زبیر خان، محمد یوسف، ملک نوشیر خان انجم لنگڑیال، محمد ثاقب خورشید، محمد نعیم اختر خان، میاں فدا حسین وٹو، محمد سہیل خان زاہد، چوہدری کاشف پنسوتا اور چوہدری زاہد اکرم بھی ملاقات میں شریک تھے۔