ٹرمپ کا ٹیرف میں اضافہ، پاکستان کا امریکہ سے مذاکرات کیلئے وفد بھیجنے کا فیصلہ

اسلام آباد(اردوپوائنٹ اخبار تازہ ترین۔09اپریل 2025)امریکی صدر ڈونلڈٹرمپ کی جانب سے ٹیرف میں اضافے کے معاملے پر حکومت پاکستان کا امریکہ سے مذاکرات کیلئے وفد بھیجنے کا فیصلہ،وزیراعظم کی وفد کی تشکیل کے دوران معروف کاروباری شخصیات اور برآمد کندگان کی شمولیت یقینی بنانے کی ہدایت،وزیراعظم شہباز شریف کی زیر صدارت ملکی برآمدات میں اضافے اور امریکہ کی جانب سے درآمدات پر لگائے گئے نئے ٹیرف سے متعلق جائزہ اجلاس اسلام آباد میں منعقد ہوا جس میں نائب وزیراعظم و وزیر خارجہ اسحاق ڈار، وفاقی وزرا احد خان چیمہ، محمد اورنگزیب، علی پرویز ملک، مشیر وزیرِ اعظم سید توقیر شاہ، معاونین خصوصی طارق فاطمی، ہارون اختر،وزیراعظم کے کوارڈینیٹر رانا احسان افضل اور متعلقہ اعلی حکام نے شرکت کی اجلاس میں امریکہ کی جانب سے لگائے گئے نئے ٹیرف، سٹیئرنگ کمیٹی اور ورکنگ گروپ کی رپورٹ سے متعلق بریفنگ دی گئی اور مستقبل کا مجوزہ لائحہ عمل پیش کیا گیا۔

(جاری ہے)

اجلاس میں فیصلہ کیاگیا کہ امریکہ کے ساتھ تجارتی تعلقات کے فروغ اور نئے ٹیرف کے حوالے سے مذاکرات کیلئے اعلیٰ سطح کا وفد بھیجا جائے گا۔اجلاس کو بتایا گیا کہ امریکہ میں پاکستانی سفارتخانہ مسلسل امریکی حکومت کے ساتھ رابطے میں ہے۔وفد کو امریکہ کی جانب سے درآمدات پر لگائے گئے نئے ٹیرف پر مذاکرات کے بعد مستقبل کیلئے باہمی طور پر مفید لائحہ عمل طے کرنے کا ٹاسک سونپ دیا گیا۔

وزیراعظم شہباز شریف کاکہنا ہے کہ امریکہ پاکستان کے تجارتی تعلقات دہائیوں پر محیط ہیں۔ حکومت امریکہ کے ساتھ تجارتی شراکت داری کو مزید مضبوط بنانے کی خواہاں ہے۔یاد رہے کہ چند روز قبل امریکی صدر ڈونلڈ ٹرمپ نے پاکستان سمیت دنیا کے کئی ممالک پر بھاری ٹیکس عائد کرنے کا اعلان کیا تھا۔امریکی صدر نے پاکستان پر 29 فیصد جوابی ٹیرف لگانے کابھی اعلان کیا تھا۔

بتایا گیا تھا کہ امریکی صدر نے وائٹ ہاوس میں منعقدہ تقریب میں یوم آزادی کے موقع پر یورپی یونین اور 46 ممالک پر نئے تجارتی محصولات کے نفاذ کا اعلان کیا تھا۔ ڈونلڈٹرمپ کا کہنا تھا کہ بھارت پر 26، چین پر 34، یورپی یونین پر 20 فیصد ٹیرف عائد کرے گا۔ سعودی عرب، قطر اور افغانستان پر دس، دس فیصد ٹیرف عائد کیاجائیگا۔اس کے ساتھ ساتھ امریکی صدر ڈونلڈ ٹرمپ کایہ بھی کہنا تھا کہ بنگلا دیش پر37، جاپان پر 24، اسرائیل پر 17 اور برطانیہ پر 10 فیصد ٹیرف عائد کریں گے۔ گاڑیوں کی درآمد پر 25 فیصد اضافی ٹیکس عائد کریں گے۔امریکی صدر ٹرمپ نے وائٹ ہاوس میں جوابی ٹیرف کے ایگزیکٹو آرڈر پر دستخط کئے تھے۔