(ن) لیگ نے ایٹمی دھماکے کرکے ثابت کردیا پاکستا ن کا دفاع ہم بہترکرنا جانتے ہیں ، نواز شریف

لاہور(اُردو پوائنٹ اخبارتازہ ترین - آن لائن۔ 17 مئی2025ء)صدر ن لیگ نواز شریف کا کہنا ہے کہ ن لیگ نے ایٹمی دھماکے اور اب جنگ جیت کر کے ثابت کر دیا پاکستان کا دفاع ہم بہتر کرنا جانتے ہیں۔انہوں نے یہ بات وزیر اعظم شہباز شریف سے ملاقات کے دوران کہی، ملاقات میں وزیراعلیٰ پنجاب مریم نواز بھی شریک تھیں۔ وزیراعظم نے نوازشریف کو بھارت کیساتھ سیز فائر کے بعد کی صورتحال سے آگاہ کیا۔

ذرائع کے مطابق ذرائع کے مطابق ملاقات میں آپریشن بنیان مرصوص کی کامیابی اور ملکی سلامتی کے امور پر تبادلہ خیال کیا گیا، ملاقات میں قومی یکجہتی کو قائم رکھنے اور ملکی سیاسی و معاشی صورتحال پر بھی غور ہوا۔ مسلم لیگ ن کے صدر نواز شریف نے آپریشن بنیان مرصوص کی کامیابی پر وزیر اعظم شہباز شریف کو مبارکباد پیش کی۔

(جاری ہے)

۔اس موقع پر ان کا کہنا تھا کہ چین،ترکیے، آذربائیجان نے مشکل وقت میں پاکستان کیساتھ دوستی کا حق ادا کیا۔

پاکستان کی بہادر فورسز نے عالمی سطح پر پاکستان کا سر فخر سے بلند کر دیا ہے۔نواز شریف نے کہا کہ بھارت کی کسی بھی جارحیت سے نمٹنے کیلئیدفاعی نظام کو ہمہ وقت تیار رکھا جائے، بھارت کے جنگی جنون نے خطے کے امن و سلامتی کو داو پر لگا دیا ہے۔ذرائع کے مطابق انہوں نے کہا کہ پاک فضائیہ نے بھارت کے غرور گھمنڈ کو گھر بیٹھے خاک میں ملا دیا۔ن لیگ نے ایٹمی دھماکے اور اب جنگ جیت کر کے ثابت کر دیا پاکستان کا دفاع ہم بہتر کرنا جانتے ہیں۔

دوران ملاقات شہباز شریف کا گفتگو کرتے ہوئے کہنا تھا کہ افواج پاکستان اور پوری قوم نے یہ جنگ لڑی، اس کی مثال کہیں نہیں ملتی، عوام کی ثابت قدمی ملک کی عسکری تاریخ کا ایک فیصلہ کن باب بن چکی ہے، ہم نے بہترین حکمت عملی کے تحت مقابلہ کیا۔انہوں نے کہا کہ بھارت ہمیشہ کی طرح اس بار بھی الزام لگا کر بھاگ گیا، پہلگام واقعے کی تحقیقات کے لئے بھارت تیار نہیں ہے، چند گھنٹوں میں جرات، بہادری اور دلیری سے جوانوں نے وہ تاریخ رقم کی ہے جو قیامت تک دوست اور دشمن پڑھتے رہیں گے۔

وزیراعظم کا کہنا تھا کہ افواج پاکستان اور عوام نے دشمن کو شکست دے کر ملک کا جھنڈا بلند کیا، دنیا اب اس جھنڈے کو احترام سے دیکھ رہی ہے، پوری قوم یکجان اور دو قالب ہے اور اس جنگ کے دوران پوری قوم افواج پاکستان کے ساتھ کھڑی رہی ہے۔شہباز شریف نے کہا کہ پاکستان کی معاشی صورتحال سے متعلق بھی نوازشریف کو آگاہ کیا، بھارت کی سخت مخالفت اور کوششوں کے باوجود آئی ایم ایف نے پاکستان کو ایک ارب ڈالر کی قرض کی قسط جاری کی، آئی ایم ایف کے جائزہ مشن نے پاکستان کی معیشت کا جائزہ لینے کے بعد قسط جاری کرنیکی سفارش کی۔

ان کا کہنا تھا کہ پاکستان کی معیشت بہترین سمت پر گامزن ہے، حکومت پاکستان آئی ایم ایف کے ساتھ نئے مالی سال کے بجٹ پر مشاورت جاری رکھے ہوئے ہے، آئندہ مالی سال 26-2025 بجٹ کیاہداف کا باہمی مشاورت سے تعین کیا جائے گا۔ملاقات کے دوران قازان فورم میں کراچی، کوئٹہ اور گوادر سے سینٹر ل ایشیا ئ اور یورپ کے روٹ پر بھی گفتگو ہوئی۔