’نجم سیٹھی کی چڑیا بوڑھی ہوگئی وہ ذہنی توازن کھو بیٹھی ہے‘

لاہور ( اُردو پوائنٹ اخبارتازہ ترین۔ 20 مئی 2025ء ) صوبہ پنجاب کی وزیر اطلاعات عظمیٰ بخاری نے پاکستان تحریک انصاف کے بانی چیئرمین عمران خان سے جیل میں غیرسیاسی شخصیت کی ملاقات کی خبر پر ردعمل دے دیا۔ تفصیلات کے مطابق پریس کانفرنس کے دوران جب ان سے سینئر صحافی نجم سیٹھی کی ایک خبر سے متعلق پوچھا گیا جس میں انہوں نے دعویٰ کیا تھا کہ پاک بھارت کشیدگی کے دوران عمران خان سے ایک اہم غیر سیاسی شخصیت نے ملاقات کی اور انہیں وزیراعظم کی طرح بریفنگ دی گئی، اس کے ردعمل میں صوبائی وزیر اطلاعت عظمی بخاری کا کہنا ہے کہ نجم سیٹھی کی چڑیا بوڑھی ہوگئی ہے اور وہ ذہنی توازن کھو بیٹھی ہے ان کوچاہیے اپنی چڑیا بدل لیں۔

یاد رہے کہ سینئر صحافی نجم سیٹھی نے دعویٰ کیا تھا کہ 6 مئی کو عمران خان سے ایک غیر سیاسی شخصیت نے اڈیالہ میں ملاقات کرکے بھارت کے ساتھ ہونے والی کشیدگی پر بریفنگ دی، انہیں بالکل ایسے بریفنگ دی گئی جیسے وزیراعظم کو بریفنگ دی جاتی ہے، جس میں عمران خان کو اعتماد میں لیا گیا اور انہیں بتایا گیا کہ بھارت پاکستان پر یہ الزامات لگا رہا ہے۔

(جاری ہے)

انہوں نے بتایا کہ عمران خان کو اڈیالہ جا کر کہا گیا کہ ملک کی خاطر آپ اور آپ کی یوتھ کی ضرورت ہے، پی ٹی آئی کی یوتھ فوج کو کافی عرصے سےاٹیک کر رہی ہے وہ اب نہ کرے، جس کے جواب میں عمران خان نے کہا کہ آپ کے ساتھ اختلافات سیکنڈری ہیں، ہم آپ کے اور قوم کے ساتھ ہیں، ملک کی خاطر میں اپنی اندرونی لڑائی کو روک دیتا ہوں اور مودی کے خلاف آپ کے ساتھ ہوں، جس پر کہا گیا کہ آپ کا بہت شکریہ، ہمیں آپ سے یہی توقع تھی۔

نجم سیٹھی کی جانب سے دعویٰ کیا گیا ہے کہ عمران خان سے بات چیت شروع ہوگئی ہے، تحریک انصاف کیلئے اچھی خبریں آئیں گی، عید سے پہلے بڑے رہنماء رہا ہوں گے جب کہ عمران خان نے کہا کہ میں نے ملاقات کرنے والی شخصیت سے کہا کہ میں نے عدالتوں کے ذریعے رہا ہونا ہے اور جون تک عمران خان کی رہائی کا امکان ہے، عمران خان کی سزا معطلی کا کیس لگنا ایک اہم پیشرفت ہے۔

سینئر صحافی نے یہ بھی کہا ہے کہ 6 مئی کو عمران خان کے ساتھ جیل میں ہونے والی ملاقات کے بعد ٹویٹر کھولا گیا، ڈی جی آئی ایس پی آر نے پی ٹی آئی سوشل میڈیا والوں کو سائبر وائیررز قرار دیا، پنجاب میں پاکستان زندہ بعد ریلیز نکالنے والوں کو چوبیس گھنٹوں کے اندر اندر رہا کردیا گیا، رانا ثناء اللہ اور عطا تارڑ نے پی ٹی آئی کی تعریف کی، الیکشن کمیشن کو گرین سگنل دیا گیا ہے کہ ثانیہ نشتر کی خالی کردہ سیٹ پر سینٹ کا الیکشن کروا دیں، اس ساری پیشرفت کے نتیجے میں مئی کے اختتام یا جون میں عمران خان کی رہائی ہو سکتی ہے۔