اسلامی ممالک کے حکمرانوں سے مطالبہ ہے کہ امریکا سے ڈرنے کی بجائے ڈٹ جائیں اور مظلومین کی مدد کریں
ٹرمپ انسانیت کا قاتل ہے ایران پر حملہ جنگی جرم ہے، پاکستانی قوم ایران کے ساتھ ہے، امریکا اور اسرائیل کو شکست ہوگی، امیرجماعت اسلامی کی اپیل پر امریکی جارحیت کیخلاف ملک گیر ” امریکا مردہ باد ‘‘ احتجاجی مظاہرے
ثنااللہ ناگرہ پیر 23 جون 2025 20:44
لاہور (اُردو پوائنٹ اخبارتازہ ترین۔ 23 جون 2025ء) جماعت اسلامی کے زیراہتمام ایران پرامریکی جارحیت کے خلاف سوموار کو ملک بھر میں مظاہرے ہوئے۔ ” امریکہ مردہ آباد “ احتجاجی مظاہرے امیر جماعت اسلامی حافظ نعیم الرحمن کی اپیل پر کیے گئے۔ اسلام آباد، لاہور، کراچی، پشاور، کوئٹہ اور دیگر چھوٹے بڑے شہروں میں ہونے والے احتجاج میں عوام، جماعت اسلامی کے کارکنان کی بڑی تعداد شریک تھی۔ جماعت اسلامی کی مرکزی، صوبائی، ضلعی اور مقامی قیادت نے مظاہرین سے خطابات کیے اور ایران کے خلاف امریکی اور اسرائیلی جارحیت کی پرزور مذمت کی۔ مقررین نے حکومت پاکستان اور دیگر اسلامی ممالک کے حکمرانوں سے مطالبہ کیا کہ وہ ایران کا ساتھ دیں، غزہ میں صہیونی دہشت گردی رکوانے کے لیے عملی اقدامات اٹھائیں اور امت کے جذبات کی ترجمانی کریں۔
(جاری ہے)
انہوں نے حکومت کی جانب سے ٹرمپ کی نوبل انعام برائے امن کے لیے نامزدگی کی بھی مذمت کی۔ مقررین نے اتحاد امت کی ضرورت پر زور دیا اور ایران کی بھرپور حمایت کے اعلانات کیے۔
تفصیلات کے مطابق امیر جماعت اسلامی لاہور ضیاالدین انصاری ایڈووکیٹ نے لاہور پریس کلب کے سامنے ”امریکہ مردہ آباد“ مظاہرے کی قیادت کی، مظاہرے میں خواتین بھی شریک تھیں۔
اسلام آباد آبپارہ چوک میں ہونے والے مظاہرے سے نائب امیر جماعت اسلامی میاں اسلم، امیر جماعت اسلامی اسلام نصراللہ رندھاوا نے خطاب کیا۔ مقررین نے کہا کہ امریکا نے ایران پر چودہ ہزار پونڈ بارود برسا کر دنیا کے امن کو تباہ کرنے کی کوشش کی، یہ عالمی قوانین کی دھجیاں بکھیرنے کے مترادف ہے، کسی کو حق نہیں پہنچتا کہ دوسرے ملک میں جا کر بم برسائے۔ ٹرمپ انسانیت کا قاتل ہے، اس کا ایران پر حملہ جنگی جرم ہے۔ سیاسی، سفارتی حمایت کی بجائے اب امت مسلمہ کے حکمران اپنا عملی فرض ادا کریں۔ پاکستانی قوم ایران کے ساتھ ہے، امریکا اور اسرائیل کو شکست ہو گی۔ مظاہرے سے صدر مرکزی تنظیم تاجران پاکستان کاشف چودھری نے بھی خطاب کیا۔
جے آئی یوتھ کراچی نے کراچی پریس کلب کے سامنے مظاہرے کا اہتمام کیا جس سے نائب امیر حلقہ کراچی مسلم پرویز نے خطاب کیا۔ سیکرٹری جنرل وسطی کے پی کے صابر اعوان اور امیر ضلع بحراللہ خان نے پشاور میں بڑے مظاہرے کی قیادت کی۔ کوئٹہ میں امریکہ کی مذمت میں ہونے والے مظاہرے سے ضلعی امیر مرتضیٰ خان کاکڑ نے خطاب کیا۔
ڈپٹی سیکرٹری جنرل جماعت اسلامی ممتاز حسین سہتو نے خیرپور میں امریکا مخالف مظاہرے کے شرکا سے خطاب کیا جب کہ امیر جماعت اسلامی پنجاب شمالی ڈاکٹر طارق سلیم نے گجرات میں ہونے والے مظاہرہ کی قیادت کی۔ تیمرگرہ میں ہونے والے مظاہرے سے امیر کے پی کے شمالی عنایت اللہ خان جب کہ بنوں میں ہونے والے مظاہرے سے صوبائی سیکرٹری جنرل ظہور خٹک نے خطاب کیا۔
ملتان پریس کلب کے سامنے ہونے والے احتجاجی مظاہرہ سے ضلعی امیر صہیب عمار صدیقی نے خطاب کیا۔ فیصل آباد کے چنیوٹ بازار میں ہونے والے ”امریکا مردہ باد“ بڑے مظاہرے سے ضلعی امیر پروفیسر محبوب الزماں بٹ نے خطاب کیا، شیخوپورہ میں امیر ضلع زاہد عمران کروٹانہ اور امیر شہر پروفیسر جاوید اقبال سندھو نے احتجاجی مظاہرے کے شرکا سے خطاب کیا۔ اٹک میں ہونے والے مظاہرے میں لوگوں کی بڑی تعداد شریک تھی،سیکرٹری جنرل پنجاب شمالی اقبال خان نے مظاہرہ سے خطاب کیا، گوجر خان میں مقامی رہنما جماعت اسلامی راجہ جواد نے مظاہرہ کی قیادت کی۔
امیر جماعت اسلامی کی ہدایت پر سندھ کے مختلف شہروں میں مظاہروں کا اہتمام کیا گیا جن میں لوگوں کی کثیر تعداد شریک ہوئی۔ مظاہرین نے جماعت اسلامی کے پرچم اور بینرز اٹھا رکھے تھے، انھوں نے امریکا اور اسرائیل کے خلاف جب کہ ایران کی حمایت میں نعرے لگائے اور اسلامی ممالک کے حکمرانوں سے مطالبہ کیا کہ وہ امریکا سے خوف زدہ ہونے کی بجائے اس کے خلاف ڈٹ جائیں اور مظلومین کی مدد کریں۔ لاڑکانہ میں جناح باغ چوک سے پریس کلب تک احتجاجی ریلی نکالی گئی جس کی قیادت امیر ضلع نادر علی کھوسہ ایڈووکیٹ نے کی، سکھر پریس کلب کے سامنے احتجاجی مظاہرہ کی قیادت صوبائی رہنما حزب اللہ جھکرو، قائم مقام امیر سکھر امان اللہ تینیو نے کی۔ٹھٹھہ پریس کلب کے سامنے ہونے والے مظاہرہ سے امیر ضلع عبدالمجید سموں اور قیم ضلع عبداللہ آدم نے خطاب کیا۔ کندھ کوٹ، فریدآباد دادومیں بھی احتجاجی مظاہرے ہوئے۔
ایران اسرائیل کشیدگی سے متعلق تازہ ترین معلومات
ثنااللہ ناگرہ
پیر 23 جون 2025
20:44
