ہم حکومت گرنے نہیں دیں گے

لاہور (اُردو پوائنٹ اخبارتازہ ترین۔ 26 جون2025ء) سابق وفاقی وزیر اطلاعات و نشریات قمر زمان کائرہ نے کہا ہے کہ پیپلز پارٹی کو بجٹ پر اعتراض ہے مگر ہم حکومت گرنے نہیں دیں گے ،اختلافات ایک طرف رکھ کے قومی یکجہتی کو فروغ دینا ہو گا،ہمیں بڑے تدبر اور تحمل سے آگے بڑھنا ہو گا،پاکستان پیپلز پارٹی کثرت رائے سے نہیں اتفاق رائے سے کام کرنے پر یقین رکھتی ہے،26ویں ترمیم پر کثرت رائے ہوئی،اتفاق رائے نہیں ہو سکا،چیئرمین بلاول بھٹو نے آئینی بنچ بنانے پر ساری جماعتوں کو متفق کیا،بی بی اور بھٹو شہید کے وژن کا جھنڈا اب بلاول بھٹو لیکر چل رہے ہیں۔

ان خیالات کا اظہار انہوں نے پیپلز لائرز فورم لاہور ڈویژن کے زیر اہتمام ’’آئین،قانون،انصاف اور بے نظیر بھٹو‘‘ کے موضوع پر لاہور ہائیکورٹ کے کانفرنس ہال میں سیمینار سے خطاب کرتے ہوئے کیا۔

(جاری ہے)

سیمینار کی صدارت پی ایل ایف لاہور ڈویژن کے صدر شاہد عباس ایڈوکیٹ نے کی ۔اس موقع پر دختر مشرق کی سالگرہ کا کیک بھی کاٹا گیا۔سپریم کورٹ بار ایسوسی ایشن کے سابق صدر احسن بھون،لاہو پریس کلب کے صدر ارشد انصاری، چودھری اسلم گل،عثمان ملک،عارف خان،رحمن عزیز ملک،شکیل پاشا اور دیگر نے بھی خطاب کیا،اس موقع پر رانا جمیل منج،عارف خان،راوخالدایڈوکیٹ جاوید الیاس ججی،نوید الحسن، بشری ملک،رانا ذوالفقار،آغا تقی شاہ،حمزہ عباس بھی موجود تھے۔

قمر زمان کائرہ نے کہا کہ حکمران عوام کے ذہنوں سے محو ہو جاتے ہیں صرف چند رہنما دل میں رہتے ہیں،لیڈر مسائل کا حل لیکر آتا ہے۔حکمراں صرف حکومت کرتے ہیں۔انہوں نے کہا کہ پیپلز پارٹی واحد جماعت ہے جس نے پاکستان کے ریاستی سٹرکچر کی چولیں ہلا دیں اور پرانی شناختیں ختم کر کے جمہوری شناختیں متعارف کرائیں۔انہوں نے بتا یاکہ پاکستان بحران میں آ کر دو لخت ہوتا ہے تو بھٹو کو منتیں کر کے اقتدار دیا جاتا ہے،اسوقت ملک مارشل لاء ریگولیشن کے تحت چل رہا تھا۔

بھٹو نے بکھری ہوئی قوم کو اکھٹا کر کر کے متفقہ آئین اور ہاری ہوئی قوم کو امید دے کر باوقار قوم بنایا۔سابق وفاقی وزیر کا کہنا تھا کہ بینظیر بھٹو کی میزائل ٹیکنالوجی کیوجہ سے ہم نے بھارت کے 6طیارے گرائے۔بی بی شہید نے ضیاء کی ساتھی جماعتوں کو ساتھ ملا کر میثاق جمہوریت کیا،میاں نواز شریف پر برا وقت آیا تو بی بی خود انکے پاس چلا کر گئیں۔

سیاسی جماعتیں کمزور ہوتی ہیں تو ملک اور سیاسی عمل کمزور ہوتا ہے ،قوموں کو سمت دینا بڑا کام ہوتا ہے جو بڑا لیڈر ہی کرتا ہے۔بی بی شہید ہوئیں تو پاکستان میں آگ لگ گئی۔اسوقت آصف زرداری نے پاکستان کھپے کا نعرہ لگایا۔انہوں نے کہا کہ پیپلز پارٹی کو بجٹ پر اعتراض ہے مگر ہم حکومت گرنے نہیں دیں گے ۔ہمیں اپنے تضادات اور اختلافات ایک طرف رکھ کے قومی یکجہتی کو فروغ دینا ہو گا۔

انہوں نے کہا کہ پیپلز پارٹی نے ہر دور میں بحرانوں سے نکال کر ملک کو سمت دی ہے،ہمیں بڑے تدبر اور تحمل سے آگے بڑھنا ہو گا۔سپریم کورٹ بار ایسوسی ایشن کے سابق صدر احسن بھون نے کہا کہ اس ملک میں بھٹو شہید نے عوام کے لئے جو ورثہ چھوڑا کوئی اور نہیں چھوڑ سکا،پاکستان کا دفاعی نظام بھٹو شہید کی دین ہے،چیئرمین بلاول بھٹو نے سفارتی محاذ پر پاکستان کے مخالف کو چاروں شانے چت گرایا ہے۔

انہوں نے کہا کہ صدر آصف زرداری نے اپنے اختیارات کم کر کے پارلیمانی نظام کو مضبوط بنایا، پارلیمان کے استحکام تک ملکی نظام بہتر نہیں بنایا جا سکتا۔مطالبہ کرتا ہوں کہ پیپلز پارٹی تمام صوبوں سے ججز لیکر آئینی عدالت بنوائے ۔ممبر پیپلز پارٹی سینٹرل ایگزیکٹو چودھری اسلم گل نے کہا کہ بھٹو کی شہادت کے بعد بیگم بھٹو اور پھر بی بی شہید نے جمہوریت کا جھنڈا اٹھایا،صدر آصف زرداری نے سیاسی سفر میں جو صعوبتیں برداشت کیں وہ تاریخ کا حصہ ہیں،شاہی قلعے ہوں یا جیلیں،بھٹو کے جیالے کبھی نہیں گھبرائے،بلاول بھٹو کی قیادت میں شہید بی بی کا مشن مکمل کرینگے۔

عثمان ملک نے کہا کہ ہمارے ملکی مسائل کا حل صرف بھٹو کی واپسی میں ہے۔صدر لاہور پریس کلب ارشد انصاری نے کہا کہ بی بی شہید اور انکے پورے خاندان جیسی قربانیاں کوئی اور خاندان نہیں دے سکا،محترمہ کا وژن اور سیاسی بصیرت ملک کے کسی اور لیڈر میں نہیں،آج پاکستان میں جمہوریت بینظیر شہید کی سیاسی جدوجہد کی مرہون منت ہے۔سیمینار سے مبشر رحمن،علی عمران نقوی، زاہد شیرازی،عارف خان،شکیل پاشا،رحمن عزیز چن ،عبد الستار جیند،راشد شریف،قمر عباس،ملک خرم،رانا اظہر،عمران کھوکھر ایڈوکیٹ،عدنان کھوکھر ایڈوکیٹ نے بھی خطاب کرتے ہوئے دختر مشرق کو خراج عقیدت پیش کیا۔