کشمیری عوام نے ہندو توا ایجنڈے کو یکسر مسترد کر دیا ہے ، صدر آزاد کشمیر کی آل پارٹیز حریت کانفرنس کے وفد سے ملاقات میں گفتگو

اسلام آباد (اُردو پوائنٹ اخبارتازہ ترین - اے پی پی۔ 15 اگست2025ء) صدر آزاد کشمیر بیرسٹر سلطان محمود چوہدری نے کہا ہے کہ بھارت دنیا کی سب بڑی جمہوریت نہیں بلکہ آمریت ہے کیونکہ مودی نہ صرف اپنے غیر قانونی زیر تسلط جموں و کشمیر میں عوام پر ظلم و جبر کے پہاڑ توڑ رہا ہے جبکہ خود بھارت میں اقلیتیں مودی سرکار کی ہندو توا پالیسیوں کے باعث زیر عتاب ہیں اور وہاں اقلیتوں سے غیر انسانی سلوک روا رکھا جا رہا ہے،آج دنیا بھر میں مقیم کشمیری عوام بھارت کا یوم آزادی یوم سیاہ کے طور پر منا کر یہ ثابت کر دیں کہ وہ جموں و کشمیر پر بھارت کے غیر قانونی اور غاصبانہ قبضے کو کسی صورت تسلیم نہیں کریں گے۔

ان خیالات کا اظہار انہوں نے جمعہ کو یہاں ایوان صدر کشمیر ہاؤس اسلام آباد میں آل پارٹیز حریت کانفرنس کے رہنما عبدالحمید لون کی قیادت میں ایک وفد سے ملاقات میں کیا۔

(جاری ہے)

اس موقع پر وفد میں عبدالحمید لون، راجہ خام حسین، سید اعجاز رحمانی اور زاہد صفی شامل تھے۔بیرسٹر سلطان نے کہا کہ پاکستان، آزاد کشمیر اور دنیا بھر میں بسنے والے کشمیریوں نے 15 اگست بھارت کا یوم آزادی یوم سیاہ کے طور پر مناتے ہوئے، دنیا بھر میں عالمی برادری کو یہ باور کروائیں کہ بھارت اپنے غیر قانونی زیر تسلط جموں کشمیر میں ظلم و جبر کے ذریعے قابض ہے اور وہاں مسلسل انسانی حقوق کی سنگین خلاف ورزیاں جاری رکھے ہوئے ہے۔

بھارت نے 5 اگست 2019 کے بعد یکطرفہ اقدامات کے ذریعے جموں و کشمیر میں جغرافیائی تبدیلیاں کرنے کی کوششیں تیز کر دی ہیں لیکن بھارت یہ جان لے کہ کشمیری عوام بھارت کے جابرانہ اور غاصبانہ قبضہ کو تسلیم نہیں کرتے اور ہماری یہ جدو جہد اس وقت تک جاری و ساری رہے گی جب تک کہ کشمیر بھارتی تسلط سے آزاد نہیں ہو جاتا۔اس موقع پر وفد نے صدر ریاست آزادکشمیر بیرسٹر سلطان محمود چوہدری کو بھارت کے غیر قانونی زیر تلسط جموں و کشمیر کی تازہ ترین صورتحال سے آگاہ کیا۔

اس موقع پر بیرسٹر سلطان محمود چوہدری نے کہا کہ بھارت پاکستان سمیت دنیا بھر میں دہشت گردی کی کارروائیوں میں ملوث ہے اس کا برملا اور دو ٹوک ثبوت کنیڈین وزیراعظم نے اپنی پارلیمنٹ میں پیش کیا جس سے بھارت عالمی دہشت گرد کے طور پر سامنے آیا۔ لہذا عالمی برادری بھارت کو اس کے مذموم عزائم سے باز رکھنے کے لیے اپنا اثر و رسوخ استعمال کرے،کشمیر کا معاملہ اقوام متحدہ میں ہے اور مسئلہ کشمیر پر اقوام متحدہ کی قراردادیں اب بھی موثر ہیں لہذا بھارت یکطرفہ اقدامات کے ذریعے مقبوضہ کشمیر میں تبدیلیاں نہیں کر سکتا۔

صدر آزاد کشمیرنے مزید کہا کہ مودی کشمیری عوام کو بے گھر کرنے، ان کی جائیدادیں ضبط کرنے، حریت قائدین کو قید رکھنے اور نہتے شہریوں کے گھروں پر چھاپے مار کر بزرگوں،خواتین اور بچوں کو ہراساں کرنے کے لیے ریاستی جبر کا سہارا لے رہاہے۔ بھارتی فوج ایک دہشت گردفوج بن چکی ہے اور بھارت ایک عالمی دہشتگرد کے طور پر سامنے آیا ہے۔ لہذا انٹرنیشنل کمیونٹی کشمیری عوام کو اقوام متحدہ کی قراردادوں کے مطابق ان کا حق خود ارادیت دلوانے کے لیے اپنا کردار ادا کرے۔

بیرسٹر سلطان محمود چوہدری نے کہا کہ کشمیری عوام نے ہندو توا کے ایجنڈے کو یکسر مسترد کر دیا ہے، انشاء اللہ شہداکشمیر کا لہو رنگ لائے گا اور بھارت کے غیر قانونی زیر تسلط جموں و کشمیر جلد جابرانہ اور غاصبانہ قبضہ سے آزاد ہو گا۔