ہربھجن سنگھ کی شادی کے دوران چار گارڈز کو صحافیوں کی تذلیل پر پنجاب پولیس نے گرفتار کرلیا

اتوار 1 نومبر 2015 10:15

نئی دہلی(اُردو پوائنٹ اخبارآن لائن۔1نومبر۔2015ء) بھارتی کرکٹر ہربھجن سنگھ اور بولی وڈ اداکارہ گیتا بسرا کی شادی کے دوران چار گارڈز کو صحافیوں کی تذلیل کرنے پر پنجاب پولیس نے گرفتار کرلیا۔ بھارتی میڈیا کے مطابق بھارتی کرکٹر ہربھجن سنگھ اور بولی وڈ اداکارہ گیتا بسرا کی شادی کے دوران ہربھجن سنگھ کے گارڈز نے وہاں موجود شادی کو کوریج کرنے والے صحافیوں سے بدتمیزی کرتے ہوئے ان کے کیمرے توڑ دیے۔

(جاری ہے)

اس واقعہ کے بعد میڈیا کے نمائندے ہربھجن سنگھ کے گھر کے باہر دھرنا دے کر بیٹھ گئے اور چاروں گارڈ کو فوری پولیس کے حوالے کرنے کا مطالبہ کیا۔پولیس کے مطابق اس نے چاروں گاڑدز کلدیپ، گرمیت، نوجوت، اور بون کو گرفتار کرلیا ہے۔ایک گارڈ کا کہنا تھا کہ انہیں کرکٹر کی جانب سے سخت ہدایات تھی کہ کسی صحافی کو بھی اندر نہ آنے دیا جائے جس کی وجہ شادی میں اہم شخصیات کی شرکت تھی۔ہربھجن سنگھ نے شادی کی تقریب کے بعد ذاتی طور پر میڈیا نمائندوں سے معافی بھی مانگی۔یاد رہے کہ کرکٹر ہربھجن بولی وڈ اداکارہ گیتا بسرا کے ساتھ جمعرات کے روز شادی کے بندھن میں بندھ گئے تھے۔