پی ٹی آئی کے وزیر بننے والے رہنماء حکومتی گاڑیاں استعمال نہیں کریں گے،تحریک انصاف کے رہنماء ڈاکٹر عامر لیاقت کی نجی ٹی وی چینل سے گفتگو

بدھ 1 اگست 2018 00:30

اسلام آباد ۔ 31جولائی (اُردو پوائنٹ اخبار آن لائن۔ بدھ 1 اگست 2018ء) پاکستان تحریک انصاف کے رہنماء ڈاکٹر عامر لیاقت نے کہا ہے کہ پی ٹی آئی کے وزیر بننے والے رہنماء حکومتی گاڑیاں استعمال نہیں کریں گے کیونکہ اس سے قومی خزانے پر بوجھ پڑتا ہے۔ منگل کو ایک نجی ٹی وی چینل سے بات چیت کرتے ہوئے انہوں نے کہا کہ ہماری جماعت کے زیادہ تر لوگوں کے پاس اپنی گاڑیاں موجود ہیں اور ہم سب نے رضاکارانہ طور پر کہا ہے کہ ہم حکومتی عہدے ملنے کے بعد بھی اپنی گاڑیاں ہی استعمال کریں گے اور حکومتی گاڑیاں نہیں لیں گے کیونکہ اس سے قومی خزانے پر بوجھ پڑتا ہے جو پی ٹی آئی نہیں ڈالنا چاہتی اور اپنے قائد کے اعلان کے مطابق ہم سب سادگی اختیار کریں گے۔

(جاری ہے)

تحریک انصاف کے نو منتخب رکن حماد اظہر نے تنخواہ اور مراعات نہ لینے کا اعلان کر دیا ہے تو کیا یہ سوچ پوری پی ٹی آئی میں ہے کہ صاحب حیثیت رہنماء حکومتی اشیاء استعمال نہیں کریں گے اور تنخواہیں اور مراعات نہیں لیں گے کے سوال کے جواب میں ڈاکٹر عامر لیاقت کا کہنا تھا کہ عام انتخابات میں جیت کے بعد ہم کافی سارے لوگ بنی گالہ میں بیٹھے ہوئے تھے تو عمران خان نے کہا کہ جو لوگ بھی وزیر بنیں گے وہ 1300 سی سی گاڑی استعمال کریں گے، عمران خان کی اس بات پر وہاں بیٹھے تمام لوگوں نے کہا کہ ہم کیوں حکومتی گاڑیاں استعمال کریں، ہم سب اپنی اپنی گاڑیوں پر آئیں گے جس پر عمران خان نے خوشگوار حیرت سے کہا اچھا! تو آپ سب یہ سوچ رہے ہیں۔