دبئی اور شارجہ طوفان کی زد میں آنے کے بعد مزید بارش کی پیشگوئی

تیز ہواؤں کی وجہ سے دھول کے مزید طوفان آ سکتے ہیں‘ ملک کے کچھ مشرقی اور مغربی علاقوں میں بارش کا امکان ہے

ساجد علی پیر 7 اگست 2023 16:30

دبئی اور شارجہ طوفان کی زد میں آنے کے بعد مزید بارش کی پیشگوئی

شارجہ ( اُردو پوائنٹ اخبارتازہ ترین ۔ 07 اگست 2023ء ) دبئی اور شارجہ کے طوفان کی زد میں آنے کے بعد امارات میں مزید بارش کی پیشگوئی کردی گئی۔ دی نیشنل نیوز کے مطابق دبئی اور شارجہ کے ہفتے کے آخر میں طوفان کی زد میں آنے کے بعد متحدہ عرب امارات پیر کو مزید بارش کے لیے تیار ہے، موسمیات کے قومی مرکز نے پیر کو فجیرہ اور العین میں بارش کی پیش گوئی کی ہے، اس دوران ملک کے کچھ مشرقی اور مغربی علاقوں میں بارش کا امکان ہے۔

اس حوالے سے کہا گیا ہے کہ ہوائیں طاقت میں بڑھ سکتی ہیں، جس سے دھول کے مزید طوفان آ سکتے ہیں، کم دباؤ کا موسمی نظام اب بھی ملک کے مغرب کی طرف مشرق کی طرف سفر کر رہا ہے، یہ مختلف شدتوں کی بارش کا سبب بنے گا، کچھ مشرقی علاقوں العین اور اس کے جنوب میں بعض اندرونی علاقوں تک پھیلی ہوئی گرج چمک کے ساتھ بارشوں کا امکان ہے۔

(جاری ہے)

معلوم ہوا ہے کہ دبئی کے حکام کو ہفتے کے روز غیر مستحکم موسم کے دوران 100 سے زیادہ ہنگامی کالیں موصول ہوئیں، کیونکہ تیز ہواؤں سے درخت اکھڑ گئے اور سڑکیں پانی سے بھر گئیں، دبئی میں موسلا دھار بارش اور گرج چمک کے ساتھ دھول کے طوفان آنے سے حد نگاہ بہت کم ہوگئی، جس پر دبئی میونسپلٹی نے موجودہ موسمی حالات کی وجہ سے شام 6 بجے سے پبلک پارکس کو عارضی طور پر بند کرنے کا اعلان کیا۔

بتایا گیا ہے کہ شارجہ میں بھی موسلا دھار بارش اور تیز ہواؤں نے تباہی مچائی جس سے علاقے میں متعدد عمارتوں کو نقصان پہنچا، تیز ہواؤں سے کھڑکیوں کے شیشے ٹوٹ گئے، جس کی وجہ سے شارجہ میونسپلٹی نے اپنے عوامی پارکوں کو عارضی طور پر بند کرنے کا اعلان کیا۔ اسی طرح راس الخیمہ میں پولیس نے عوام سے اپیل کی کہ وہ سیلاب کے خطرے والے علاقوں میں جانے سے گریز کریں کیوں کہ ہفتے کے آخر میں مسلسل بارش کی وجہ سے وڈی شوکا ڈیم مکمل صلاحیت تک پہنچ گیا۔