جشن آزادی کے موقع پر اسلام آباد چیمبرآف کامرس اینڈ انڈسٹری میں پرچم کشائی کی تقریب کا انعقاد

اسلام آباد (اُردو پوائنٹ اخبارتازہ ترین - این این آئی۔ 14 اگست2017ء) جشن آزادی کے موقع پر اسلام آباد چیمبر آف کامرس اینڈ انڈسٹری میں پرچم کشائی کی تقریب کا انعقاد کیا گیا۔ چیمبرکے صدر خالد اقبال ملک نے پاکستان کا پرچم سر بلند کیا۔اسلام آباد چیمبر آف کامرس اینڈ انڈسٹری کے سینئر نائب صدر خالد ملک، نائب صدر طاہر ایوب، فائونڈر گروپ کے چیئرمین خالد جاوید، سابق صدور میاں اکرم فرید، میاں شوکت مسعود ، محمد اعجاز عباسی اور ظفر بختاوری کے علاوہ خالد چوہدری، نعیم صدیقی، میاں رمضان ، مشرف جنجوعہ، ناصرہ علی سمیت تاجر برادری کی ایک بڑی تعداد تقریب میں شامل تھی۔

پرچم کشائی کے بعد جشن آزادی کی خوشی میں کیک کاٹا گیا۔ اس موقع پر خطاب کرتے ہوئے اسلام آباد چیمبر آف کامرس اینڈ انڈسٹری کے صدر خالد اقبال ملک نے کہا کہ پاکستان عظیم قربانیوں کے بعد ایک آزاد ملک کے طور پر حاصل کیا گیا تھا اور قوم کے ہر فرد کی یہ ذمہ داری بنتی ہے کہ وہ پوری محنت و لگن سے اس ملک کی ترقی کیلئے اپنا فعال کردار ادا کرے۔

(جاری ہے)

انہوں نے کہا کہ اللہ تعالیٰ نے اس ملک کو بے شمار وسائل سے مالا مال کیا ہے اور ضرورت اس بات کی ہے کہ ہم بحیثیت قوم انتھک محنت کر کے اس ملک کو مزید بلندیوں کی طرف لے جانے کی کوشش کریں ۔ انہوں نے کہا کہ تاجر برادری کاروبار ی سرگرمیوں کو فروغ دے کر اور ٹیکس ادا کر کے اس ملک کی ترقی میں کلیدی کردار ادا کرہی ہے اور اس عزم کا اظہارکیا کہ ہم مزید محنت کر کے پاکستان کو دنیا کی عظیم قوم بنانے کیلئے اپنی جدوجہد جاری رکھیں گے۔

اسلام آباد چیمبر آف کامرس اینڈ انڈسٹری کے سینئر نائب صدر خالد ملک نے کہا کہ پاکستان ایک عظیم مقصد کے تحت حاصل کیا گیا تھا اور اس مقصد کا مکمل حصول ہماری تمام کوششوں و کاوشوں کا مرکز و محور ہونا چاہیے۔ انہوں نے اس عز م کا اظہار کیا کہ علامہ اقبال نے جس پاکستان کا خواب دیکھا تھا اور قائد اعظم محمد علی جناح نے جس پاکستان کا تصور ہمارے سامنے پیش کیا تھا ہم میں سے ہر ایک نے اس کی تکمیل کیلئے اپنا کردار ادا کرنا ہے۔

اسلام آباد چیمبر آف کامرس اینڈ انڈسٹری کے نائب صدر طاہر ایوب نے کہا آزادی اللہ تعالیٰ کی بہت بڑی نعمت ہے اور ہماے بزرگوں نے پاکستان کے حصول کیلئے جو قربانیاں دی تھیں ہم ان کو کبھی رائیگاں نہیں جانے دیں گے۔ انہوں نے کہا کہ ہم اپنی محنت،جذبے اور ایمانداری سے پاکستان کو اقوام عالم میں اعلیٰ مقام دلوانے کیلئے اپنا بھرپور کردار ادا کرنے کی کوشش کرتے رہیں گے۔ فائونڈر گروپ کے چیئرمین خالد جاوید، میاںاکرم فرید، ظفر بختاوری، میاںشوکت مسعود، محمد اعجاز عباسی، خالد چوہدری اور دیگر نے بھی اس موقع پر خطاب کیا اور پاکستان کو دنیا کی عظیم قوم بنانے کیلئے بھرپور عزم کا اظہار کیا۔