آئی سی سی آئی رواں سال جون کے آخر میں ملائیشیا کے شہر کوالا لمپور میں بزنس کانفرنس اور ایوارڈ تقریب منعقد کرے گی

اسلام آباد ۔ (اُردو پوائنٹ اخبارتازہ ترین - اے پی پی۔ 18 اپریل2019ء) اسلام آباد چیمبر آف کامرس اینڈ انڈسٹری (آئی سی سی آئی) رواں سال جون کے آخر میں ملائیشیا کے شہر کوالا لمپور میں بزنس کانفرنس اور ایوارڈ تقریب منعقد کرے گی۔ آئی سی سی آئی کے صدر احمد حسن مغل کی قیادت میں وفد نے ملائیشیا میں پاکستانی ہائی کمیشن کا دورہ کیا اور قائم مقام ہائی کمیشنر میاں عاطف شریف کے ساتھ ملاقات کی۔

وفد میں چیمبر کے سینئر نائب صدر رفعت فرید اور سابق صدر شیخ عامر وحید بھی شامل ہیں۔ اس موقع پر اپنے خیالات کااظہار کرتے ہوئے اسلام آباد چیمبر آف کامرس اینڈ انڈسٹری کے صدر احمد حسن مغل نے کہا کہ پاکستان اور ملائیشیا کے مابین متعدد شعبوں میں باہمی تعاون کو فروغ دینے کی عمدہ صلاحیت پائی جاتی ہے۔

(جاری ہے)

ضرورت اس بات کی ہے کہ دونوں ممالک کے نجی شعبوں کو قریب لانے کیلئے اقدامات کئے جائیں۔

انہوں نے کہا کہ اسی مقصد کیلئے چیمبر نے جون 25 اور 26 جون کوالالمپور میں ایک بزنس کانفرنس منعقد کرنے کا منصوبہ بنایا ہے تاکہ دونوں ممالک کی تاجر برادری کو ایک پلیٹ فارم پر اکٹھا کیا جائے اور وہ ایک دوسرے کے ساتھ براہ راست ملاقات کرکے باہمی کاروباری شراکتیں قائم کرنے کے مواقع تلاش کر سکیں جس سے پاکستان اور ملائیشیا کے درمیان باہمی تجارت بہتر ہو گی۔

انہوں نے کہا کہ ملائیشیا میں پاکستان کے ہائی کمیشن کے تعاون سے بزنس کانفرنس کو کامیاب بنایا جائے گا۔ انہوں نے کہا کہ گذشتہ سال چیمبر نے ترکی کے شہر استنبول میں ایک کامیاب بزنس کانفرنس منعقد کی تھی جس میں دونوں جانب سے نجی شعبہ کے تقریباً 500 نمائندگان نے شرکت کی تھی اور دلچسپی کے شعبوں میں ایک دوسرے کے ساتھ کاروبار کرنے کے امکانات پر بات چیت کی تھی۔

انہوں نے اس امید کا اظہار کیا کہ ملائشیا میں بزنس کانفرنس کے انعقاد سے دونوں ممالک کے درمیان کاروباری تعلقات کو مزید مستحکم کرنے میں مدد ملے گی۔ وفد سے خطاب کرتے ہوئے ملائیشیا میں تعینات پاکستان کے قائم مقام ہائی کمشنر میاں عاطف شریف نے چیمبر کی طرف سے کوالالمپور میں بزنس کانفرنس منعقد کرنے کی کوشش کو سراہا۔ انہوں نے کہا کہ اس طرح کی کانفرنسیں نجی شعبوں کے درمیان مضبوط روابط قائم کرنے میں مفید ثابت ہوتی ہیں اور یقین دہانی کرائی کہ ان کا ہائی کمیشن بزنس کانفرنس کے کامیاب انعقاد کیلئے چیمبر کے ساتھ ہر ممکن تعاون کرے گا۔

چیمبر کے سینئر نائب صدر رافعت فرید اور سابق صدر شیخ عامر وحید نے بھی اس موقع پر اپنے خیالات کا اظہار کیا اور دونوں ممالک کے درمیان باہمی تجارتی و اقتصادی تعلقات کو بہتر کرنے کے بارے میں مفید تجاویز دیں۔